BELÇİKADA HİCABA QADAĞA QOYULMAYIB...

	22 may 2012


Onlayn ictimai-siyasi qəzet

Gündəm

BELÇİKADA HİCABA QADAĞA QOYULMAYIB...

2010-05-05

İlqar İbrahimoğlu: “KİV-də Belçika parlamentinin qərarı və Fransada müzakirələr barədə yanlışlıqlar yer alıb. Hicaba hansısa qadağadan söhbət belə getmir”
“Tarixin irəliyə hərəkətini, o cümlədən, müsəlmanların Avropaya kütləvi inteqrasiyasını əngəlləmək mümkün olmayan bir prosesdir. Bunun qarşısını almaq cəhdləri, yalnızca Avropanın yüzillər ərzində əldə etdiyi demokratik dəyərləri zəiflətməyə gətirir”

Ölkə mətbuatında Belçika parlamentinin ictimai yerlərdə niqab geyilməsinə qoyulan qadağa ilə bağlı müəyyən qeyri-dəqiqliklər getmişdir. Məsələ ilə bağlı DEVAMM sədri Hacı İlqar İbrahimoğlu açıqlama ilə çıxış etmişdir: “Həqiqətdə, Belçika parlamentinin qərarı niqaba aiddir. Hicaba hər hansı qadağadan söhbət belə getmir. Niqab ”“ sifəti tamamilə bağlayan bir örtükdür. Belçikada bəzi sağçı dairələr “təhlükəsizlik mülahizələri”ni əsas gətirərək, parlamentin aşağı palatasından ictimai yerlərdə niqabın geyilməsinə qadağanı keçirməyə müvəffəq oldular. Əgər qanun layihəsi parlamentin yuxarı palatası olan Senat tərəfindən təsdiq edilərsə, ictimai yerlərdə niqabda olmaq qadağan olunacaq. Və onda bu qanunu pozan şəxslər 15-25 avro cərimələnə, hətta 7 gün müddətinə inzibati həbs cəzasına məhkum edilə bilərlər”.

DEVAMM sədri qəbul edilən qanun layihəsinin mahiyyətində ksenofobik motivlərin durduğuna diqqət çəkdi: “Əlbəttə, “ictimai təhükəsizlik” kimi bəhanələr heç bir tənqidə dözmür. Əksinə, üzünü örtüklə bağlayan insan, daha çox diqqət cəlb edir, nəinki maskirovka edə bilir. Hansısa fərd özünü tanınmaz etmək istəyirsə, parik, qrim, hətta süni sifətədək vasitələrdən yararlana bilər. Daha sifətini bağlamaq nəyinə lazım?! Şəkk-şübhə yoxdur ki, bu sağçı ünsürlərin spekulyasiyalarıdır ki, fərqli zahiriyyətə qarşı qıcığı konkret hədəflərə yönəldirlər. Təsadüfi deyil ki, “Beynəlxalq Amnistiya” kimi nüfuzlu hüquq müdafiə təşkilatları Belçika parlamentarilərinin bu qərarını pisləyiblər. Hüquq müdafiəçilərinin sözlərinə görə, bu qadağa, təhlükəli presedentlərə gətirə bilər. Təşkilat bildirib ki, belə bir qanun layihəsinin qəbul edilməsi, insan haqları üzrə beynəlxalq qanunvericilik normaları ilə ziddiyyət təşkil edir”.
Hacı İlqar İbrahimoğlu Hacı İlqar oxşar presedentin Fransada da yaşanacağını istisna etmir, amma burada gətirilən bəhanələrin daha da bayağı olmasını vurğulayır: “Fransada isə Sarkozi başda olmaqla təşəbbüskarların bəhanəsi fərqlidir. Deyirlər ki, burka ”“ insanı sifət də daxil olmaqla, tamamilə örtən geyim ”“ Fransa identikliyinə ziddir. Demək lazımdır ki, cənablar, məgər tolerantlıq elə məhz fərqli zahiriyyətə, fərqli baxışlara dözümlü yanaşmaq deyilmi?! Fransada 5 milyon müsəlman yaşayır. Bunların cəmi 200 nəfəri burka (niqablı çarşab) geyir. Necə ola bilər ki, iki yüz nəfərin geyimi 60 milyonluq ölkənin identikliyinə o qədər təhlükə kəsb etsin ki, neçə aylıq müzakirələrə və qanunvericilik səviyyəsində qadağalar tətbiq etməsinə qədər təşəbbüslərə səbəb olsun?!”.
DEVAMM sədri bu qadağaların Avropa Məhkəməsi səviyyəsində aradan qaldırılacağına əmin olduğunu bildirdi: “Əksər ekspertlər qətiyyətlə bildirirlər ki, bu kimi məsələlərin hüquqi perspektivi yoxdur. Çünki, insanın öz əqidəsinə uyğun zahiriyyətə malik olması kimi ümdə insan haqları ilə ziddiyyət təşkil edir. Sadəcə, müəyyən tendensiyaları formalaşdıran və yönəldən işlək texnologiyalar tətbiq edilir, “yad obraz”ın yaradılması və təhtəlşüura yeridilməsi kimi hədəflər güdülür. Əsas narahatçılıq da, 2050-ci il üçün Avropa əhalisinin yarısının müsəlmanlardan ibarət olacağı ilə bağlı proqnozlardan irəli gəlir”.
Hacı İlqar bu kimi tendensiyaların tez bir zamanda çözüləcəyinə, sağ meyllərin Avropa siyasi səhnəsindən gedəcəyinə əminliyini ifadə etmişdir: “Tarixdə bunun çoxlu təsdiqini görmüşük. İnsanların ksenofobik hisslərini, fərqli dünyagörüşünə qarşı qıcıqlarını qısa zaman periodunda istismar etmək olur, amma bunun ömrü uzun çəkmir. Nəticə etibarilə, sağlam zəka qalib gələcəkdir. Tarixin irəliyə hərəkətini, o cümlədən, müsəlmanların Avropaya kütləvi inteqrasiyasını əngəlləmək mümkün olmayan bir prosesdir. Bunun qarşısını almaq cəhdləri, yalnızca Avropanın yüzillər ərzində əldə etdiyi demokratik dəyərləri zəiflətməyə gətirir. Və bunun fərqində olan aydınların səsi getdikcə daha ucadan səslənir”.