BAMF DAĞLIQ QARABAĞDAKI “SEÇKİ” İLƏ BAĞLI BEYNƏLXALQ TƏŞKİLATLARA MÜRACİƏT ETDİ

	22 may 2012


Onlayn ictimai-siyasi qəzet

Gündəm

BAMF DAĞLIQ QARABAĞDAKI “SEÇKİ” İLƏ BAĞLI BEYNƏLXALQ TƏŞKİLATLARA MÜRACİƏT ETDİ

2010-05-25

Umud Rəhimoğlu: “Dünya Ermənistana və separatçı rejimə qarşı ciddi sanksiyalar tətbiq etməlidir”

Azərbaycanın erməni işğalı altında olan Dağlıq Qarabağ bölgəsində 2010-cu il mayın 23-də separatçı rejimin “seçki” keçirməsi Beynəlxalq Avrasiya Mətbuat Fondunun (BAMF) rəhbərliyini narahat edib. Bu barədə BAMF-nin sədri Umud Rəhimoğlunun mətbuat üçün yayılan açıqlamasında deyilir: “Beynəlxalq Avrasiya Mətbuat Fondu mayın 23-də Dağlıq Qarabağda separatçı rejim tərəfindən ”seçki" keçirilməsindən narahatdır.

Belə bir həssas məqamda separatçı rejim tərəfindən “seçki” oyununun ortaya atılması bir daha onu göstərir ki, Ermənistan bu problemin dinc yolla həllində maraqlı deyil. Bu səbəbdən də ermənilər hər dəfə danışıqların real müzakirəsi ərəfəsində ortaya nə isə bir bəhanə və yaxud “seçki” oyununu atır. Dağlıq Qarabağ probleminin həlli istiqamətində aparılan danışıqların, görüşlərin intensivləşdiyi bir vaxta işğalçı rejimin belə bir addım atması dünya ictimaiyyəti tərəfindən birmənalı şəkildə pislənilməlidir".
BAMF sədri problemin bu həddə gəlib çıxmasında dünya dövlətlərini və beynəlxalq gücləri də qınayıb. O bunun səbəbini beynəlxalq güclərin hələ də Ermənistana öz yerini lazımi şəkildə göstərməməsində görür. BMT-nin 4 qətnaməsini xatırladan U.Rəhimoğlu Ermənistanın və separatçı rejimin bu qətnamələrə məhəl qoymamalarına elə bu beynəlxalq nüfuzlu qurumun və digər dünya ictimaiyyətinin biganə qalmasını işğalçı dövlətin belə hərəkət etməyə rəvac verdiyini deyib: “İstər BMT, istərsə də digər nüfuzlu beynəlxalq güclər tərəfindən hər hansı ciddi sanksiyalarla üzləşməyən Ermənistan və separatçı rejim özünü daha arxayın aparır, özünün işğalçılıq siyasətini davam etdirir. Bu da Dağlıq Qarabağ probleminin həllinə mane olan əsas faktorlardandır”.
Açıqlamada U.Rəhimoğlu dünyanın aparıcı dövlətlərini və beynəlxalq gücləri bu “seçkini” pisləməyə, Ermənistana və separatçı rejimə qarşı ciddi sanksiyalar tətbiq etməyə çağırıb: “Bildiyiniz kimi, Azərbaycan torpaqlarının işğalı nəticəsində bir milyona yaxın vətəndaşlarımız uzun illərdir ki, ağır şəkildə məcburi köçkün və qaçqın həyatı yaşamaqdadır. Dünyanın aparıcı dövlətləri, nüfuzlu beynəlxalq qurumlar, nəhayət, həqiqəti anlamalı və Cənubi Qafqazda demokratiyanın, insan haqlarının qorunmasında ən böyük maneə olan Dağlıq Qarabağ probleminin həlli üçün Ermənistana və separatçı rejimə qarşı sanksiyalar tətbiq etmək üçün konkret addımlar atmalıdır.”
U.Rəhimoğlu yalnız bu təqdirdə Ermənistanın iyrənc siyasi oyunlara son qoyacağı və Azərbaycan torpaqlarını işğaldan azad edəcəyi qənaətindədir.

Xəbər xidməti

997 dəfə baxılıb