PREZİDENTİ NARAHAT EDƏN İNFORMASİYA TƏHLÜKƏSİZLİYİ MƏSƏLƏSİ

	13 fevral 2012


Onlayn ictimai-siyasi qəzet

Gündəm

PREZİDENTİ NARAHAT EDƏN İNFORMASİYA TƏHLÜKƏSİZLİYİ MƏSƏLƏSİ

2010-07-27

İlham Əliyev xarici dairələrin sifarişi ilə Azərbaycanda hansısa mövzu ətrafında rəy yaratmaq cəhdlərinin olduğunu deyir

Milli Mətbuat Günündə prezident İlham Əliyevin media ilə bağlı söylədiyi geniş nitqdə bir məqam diqqəti xüsusi cəlb edir. Çünki ölkə başçısı bu məsələ ilə bağlı xüsusi narahatlıq ifadə edib.

Dövlət başçısı bəzi hallarda xarici dairələrin təsiri altında çıxan mətbuat orqanlarının fəaliyyət göstərdiyini də deyib: “Onların sifarişi ilə yazılan məqalələr də dərc olunur. Bu məsələ ilə də bağlı məndə kifayət qədər məlumatlar var. Mən indi ad çəkmək istəmirəm, amma sadəcə olaraq fikrimi bildirmək istəyirəm ki, bu, ümumiyyətlə yolverilməzdir. İndi hansısa daxildən gələn siyasi sifariş əsasında yazılan məqalə, yaxud da ki, hansısa başqa reportaj qəbulolunmaz olsa da, bu, bizə o qədər də böyük problem yaratmaz. Ancaq xarici dairələrin sifarişi ilə, göstərişi ilə və onların planları əsasında Azərbaycanda hansısa mövzu ətrafında rəy yaratmaq cəhdlərinə, ümumiyyətlə, son qoyulmalıdır. Burada mən sadəcə olaraq jurnalistləri vətənpərvərliyə çağırıram. Biz imkan verməməliyik ki, Azərbaycan hansısa qüvvələrin, xarici dairələrin qarşıdurma arenasına çevrilsin. Mən bunu bir neçə dəfə bildirmişəm. Prezident vəzifəsinə gələndən dərhal sonra bildirmişəm, bu gün də demək istəyirəm ki, Azərbaycan başqa ölkələrin maraqlarının toqquşması yeri olmayacaq. Biz buna nail ola bilmişik, baxmayaraq ki, belə cəhdlər var və istisna olunmur ki, gələcəkdə də olacaq. Çünki bizim geosiyasi vəziyyətimiz, bizim apardığımız siyasət və ümumiyyətlə bölgədəki mövqelərimiz, əlbəttə ki, Azərbaycana diqqəti və marağı cəlb edir. Biz elə etməliyik ki, Azərbaycan bundan sonra da onilliklər ərzində xalqın iradəsi ilə idarə olunsun. Biz Azərbaycan xalqının iradəsi ilə dövlətçiliyimizin qurulmasına bundan sonra da öz səylərimizi qoyaq.
Ona görə mən yenə də deyirəm ki, belə hallar var. Mən istərdim ki, belə hallar olmasın. Xarici dairələrin kifayət qədər media resursları var ki, onların vasitəsilə istədiklərini bildirsinlər, xüsusilə yenə də deyirəm, internet dövründə bunu etmək o qədər də çətin deyil".
Maraqlıdır, Azərbaycan mediasında sifarişli məqalələr dərc etmək daha çox hansı dövlətin marağında ola bilər: İranın, Rusiyanın, yoxsa Qərb ölkələrinin?
Mövzu ilə bağlı danışdığımız Müsavat Partiyasının başqanı, politoloq Qabil Hüseynli bildirdi ki, bu, daha çox yaxın qonşu ölkələrə aiddir: “Bunu elektron KİV-də daha aydın görmək mümkündür. Bir sıra qonşu dövlətlər ölkəmizin televiziya məkanına, özü də Azərbaycan dilində müdaxilə etməyə və burada ictimai fikrə müdaxilə etməyə, zərərli meylləri yeritməyə çalışırlarsa, bunları qəzetlərdə də asanlıqla edə bilərlər. Bu sahədə Rusiyanın təsiri yetərincədir. Qonşu İrandan da bu cür təsirlərin olduğu gözlə görünəndir. Hətta PKK-nın ideyalarını təbliğ edən qəzetlərə və yazılara da rast gəlmək mümkündür. Qərb ölkələrindən də müəyyən niyyətlər güdən, xüsusilə geopolitik savaşda öz xeyrini təmin etməyə çalışan sifarişlərin olması mümkündür. Bir də ki, KİV elə bir məkandır ki, buraya müdaxilə etmək, yaxud hər hansı bir sifarişli yazını, fikri təlqin etmək o qədər çətin deyil. Xüsusilə internet resursları indi ciddi bir poliqona çevrilib. Hər bir ölkə bütün sahələrdə olduğu kimi, informasiya sahəsində də öz təhlükəsizliyini qorumağı və təmin etməyi bacarmalıdır”.

Elşad MƏMMƏDLİ

3362 dəfə baxılıb