HÜQUQ MÜDAFİƏÇİLƏRİ TAPDIQ ABBASI MÜDAFİƏ ETDİLƏR

	13 fevral 2012


Onlayn ictimai-siyasi qəzet

Gündəm

HÜQUQ MÜDAFİƏÇİLƏRİ TAPDIQ ABBASI MÜDAFİƏ ETDİLƏR

2010-07-29

Novella Cəfəroğlu: “Biz artıq bolşeviklərə dönmüşük...”

Müsavat Partiyası Məclisinin üzvü Tapdıq Abbasın Milli Mətbuat Günü mərhum dövlət başçısı Heydər Əliyevin məzarını ziyarət törəninə qatılması partiyadaşları arasında birmənalı qarşılanmayıb. Qeyd edək ki, mayın 26-da KXCP Ali Məclisinin sədri Zəlimxan Məmmədli də Tiflisdə, Heydər Əliyevin heykəli önündə əklil qoymuşdu. Həmin vaxt müxalif partiyalar, xüsusilə də Müsavat Partiyası onu kəskin tənqid etmişdi.

Müsavat rəhbərliyi buna görə KXCP sədri Mirmahmud Mirəlioğlundan izahat da tələb etmişdi. Bu tənqidlərdən sonra Zəlimxan Məmmədli partiyada tutduğu vəzifədən istefa vermişdi. İndi isə eyni vəziyyət Müsavat Partiyası daxilində yaranıb. Maraqlıdır, bu fakt insan haqlarına ziddirmi?
Məsələ ilə bağlı söhbətləşdiyimiz hüquq müdafiəçisi Novella Cəfəroğlu hadisəni tənqid atəşinə tutdu: “Birincisi, bu insan ora tək getməyib, təşkilatla birlikdə gedib. Mən deməyə söz tapmıram. Biz artıq bolşeviklərə dönmüşük. İnsanlarla belə rəftar etmək olmaz. Bu, birbaşa insan haqlarına ziddir. Partiyanın əgər ora getməməklə bağlı qərarı varsa o insanı qınaq etmək olar. Amma durub o adamı partiyadan uzaqlaşdırmaq, bu artıq dəhşətli bir şeydir”.
N. Cəfəroğlu Türkiyədə olduğu vaxt buna oxşar hadisənin başına gəldiyini də dedi: “Xaricdə olanda istəmədiyin yerlərə səni aparırlar. Biz Türkiyədə olanda ermənilərlə birlikdə görüşümüz var idi. Elə an gəlib çatdı ki, biz Heydər Əliyevin parkına gəlib çıxdıq. Biz ermənilərin yanında durub deməyəcəkdi ki, yox, biz ora girmirik. Əksinə, dedik ki, bəli, bu bizim ölkəmizin prezidentidir. Hələ Ankarada Elçibəyin də adına park salınıb. İndi durub bu səbəbdən məni Müsavat Partiyasından çıxartmalıdırlar? Bizim xoşumuza gəlsə də, gəlməsə də, bu bizim dövlətimizin prezidenti olub. Biz bu gün iqtidara irad tuturuq ki, Əbülfəz Elçibəyə eks-prezident statusu verməməklə siz nəyi qazanırsınız. Zəlimxan Məmmədli də Gürcüstanda gürcülərlə birlikdə ziyarətə gedib. O durub deməyəcəkdi ki, yox, mənim o adamdan xoşum gəlmir, mən ora getmirəm. Tapdıq Abbas da onun kimi. Ola bilər ki, mənim fikirlərim kimlərinsə xoşuna gəlməsin. Amma bir hüquq müdafiəçisi kimi deyirəm ki, bu, insan haqlarına ziddir”.
Helsinki Vətəndaş Assambleyası Azərbaycan Milli Komitəsinin sədri Arzu Abdulla da qınağın insan haqlarına zidd olduğunu dedi: “İnsan öz vicdanının səsinə qulaq asmalıdır. Necə istəsə, elə də hərəkət edə bilər. Heç kəsin ixtiyarı yoxdur ki, kiməsə təzyiq etsin. İnsan azad olmalıdır. Əgər adıçəkilən insanlar sırf bu səbəbdən partiyadan uzaqlaşdırılıbsa, bu, doğru qərar deyil”.

Zülfiyyə SAKİTQIZI

582 dəfə baxılıb