BMT QARABAĞ QƏTNAMƏSİNİ AYIN 7-də MÜZAKİRƏ EDƏCƏK

	13 fevral 2012


Onlayn ictimai-siyasi qəzet

Gündəm

BMT QARABAĞ QƏTNAMƏSİNİ AYIN 7-də MÜZAKİRƏ EDƏCƏK

2010-09-02

Ermənistanın bu təşkilatdakı səfiri etiraf edir ki, görülən işlərə baxmayaraq sənədin səsvermədən keçəcəyi gözlənilir

BMT Baş Assambleyasının 64-cü illik sessiyasının plenar iclaslarında Qarabağa dair qətnamənin səsverməyə çıxarılacağı gün dəqiqləşib. BMT-nin rəsmi saytında yer alan məlumata görə, “Azərbaycanın işğal olunmuş ərazilərində vəziyyət haqqında” qətnamə layihəsi sentyabrın 7-də müzakirə olunacaq. Qətnamə layihəsi sessiyanın gündəliyinin 18-ci maddəsidir.

Həmin gün assambleyanın gündəliyinin 14-cü maddəsini təşkil edən “GUAM məkanında həlli uzanan münaqişələr və onların beynəlxalq sülhə, təhlükəsizliyə və inkişafa təsirləri” məsələsi də müzakirə olunacaq. “Azərbaycanın işğal olunmuş ərazilərində vəziyyət haqqında” qətnamə layihəsində beynəlxalq humanitar hüququn bütün müvafiq normaları və insan haqları sahəsində beynəlxalq standartların Qarabağ münaqişəsi ilə bağlı yaranmış situasiyaya tətbiqi, eləcə də Dağlıq Qarabağ bölgəsi və ətraf ərazilərdən qovulmuş əhalinin, onların varislərinin öz evlərinə qayıtmaq hüququnun təmin olunması öhdəliyi təsdiqlənir.
Qeyd olunur ki, əhalinin qayıdışı insanlar arasında ünsiyyətin təşviqi və etimadın möhkəmlənməsi tədbirlərinə əlverişli şərait yaradacaq. Layihədə mədəniyyət və dini abidələrin mühafizəsinin təmin olunmasının, həmçinin itkin düşmüş şəxslərin taleyinin müəyyənləşdirilməsi yönündə təxirəsalınmaz tədbirlərin görülməsinin zəruriliyi vurğulanır.
Sənəddə BMT strukturlarına Dağlıq Qarabağ münaqişəsi zonası və ətrafında beynəlxalq humanitar hüquq normaları və insan haqlarına dair beynəlxalq standartların təmin olunması məsələsini nəzərdən keçirmələri təklif olunur. Həmçinin münaqişə zonasına müvafiq təhqiqat apararaq hesabat hazırlanması məqsədilə çoxmillətli missiya göndərilməsi təklifi əksini tapıb. Layihədə BMT baş katibindən xahiş edilir ki, 65-ci sessiyaya bu qətnamənin həyata keçirilməsi haqqında ətraflı hesabat təqdim etsin.
Xəbər verildiyi kimi, Qarabağ məsələsinin BMT-də müzakirəyə çıxarılması Ermənistanı narahat edib. Prezident Serj Sərkisyan Bakının bu addımını “kobud səhv” kimi qələmə verərək İrəvanın cavab addımları atacağını deyib. Ermənistanın BMT-dəki səfiri Karen Nazaryan isə “Jamanax” qəzetinə müsahibəsində etiraf edib ki, onların apardığı işlərə baxmayaraq, qətnamə layihəsinin səsvermədən keçmək şansı var. Nazaryan bildirib ki, Ermənistan XİN-dən verilən təlimat əsasında onlar Azərbaycanın bu addımının qarşısını almaq üçün mümkün olanı ediblər: “Biz müzakirələri, görüşləri davam etdiririk, səfirliyimiz qətnamə layihəsi ilə bağlı fəal işləyir. Hələlik səsvermənin necə nəticələnəcəyini demək çətindir. Bizim səfirliyimiz Baş Assambleyanın üzvü olan ölkələrin səfirlikləri ilə intensiv görüşlərdən sonra belə qənaətə gəlib ki, əsasən İslam Konfransı Təşkilatına üzv ölkələr Azərbaycanı dəstəkləyir. Bir çox ölkələr isə bitərəfdir. Ümid edirik ki, layihəyə səs verənlərin sayı 2008-ci ildə olduğundan çox olmayacaq”.

Siyasət şöbəsi

726 dəfə baxılıb