MÜXALİFƏT “FREEDOM HOUSE”un TƏNQİDLƏRİNİ HAQLI HESAB EDİR

	13 fevral 2012


Onlayn ictimai-siyasi qəzet

Gündəm

MÜXALİFƏT “FREEDOM HOUSE”un TƏNQİDLƏRİNİ HAQLI HESAB EDİR

2010-09-03

Tofiq Yaqublu: “Azərbaycan hakimiyyəti səhvini düzəltmək əvəzinə, ittihamlara keçir”

Azərbaycanın adı yenə də “Freedom House”un hazırladığı qara siyahıya düşüb. Hesabatda reytinq cədvəlinin hamısında Azərbaycanın adı geriləmələrdə çəkilir. “2010-cu ildə keçid dövründə olan dövlətlər” göstərilir ki, Baltik respublikalarını çıxandan sonra 12 keçmiş sovet respublikalarından 8-də mərkəzləşmiş avtoritar rejim hökm sürür.

2009-cu ildə Azərbaycanda insan hüquqları və demokratiya sahəsində vəziyyətin pisləşməsi davam edib. QHT-lərə Dövlət Dəstəyi Şurası mülki vətəndaş cəmiyyəti qruplarına maliyyələşməni artırıb. Bu yolla da onların dövlətdən asılılığını artırıb. Məhkəmə sistemi yeni icra strukturlarına xidmət edir. Hökuməti tənqid edən “Gündəlik Azərbaycan” və “Realnıy Azerbaydjan” qəzetlərinin redaktoru Eynulla Fətullayev terrorçuluq, milli ədavəti qızışdırma, vergidən yayınmaqda gənc blogger - Emin Milli və Adnan Hacızadə uzunqulağın mətbuat konfransı ilə bağlı satirik videogörüntüsünü hazırlayandan sonra xuliqanlıqda ittiham olunaraq həbs ediliblər. “Monitor” jurnalının baş redaktoru Elmar Hüseynovun qətlinin üstü açılmayıb.
Hesabatda yerli səviyyədə demokratik idarəçilik sahəsində yalnız Azərbaycanda geriləmə olduğu qeyd edilir.
Hakimiyyət rəsmiləri isə hesabatla razılaşmırlar. Onlar hesabatın qərəzli hazırlandığı qənaətindədirlər. Müxalifət isə fərqli düşünür.
Müsavat başqanının müavini Tofiq Yaqublu deyir ki, təşkilatın hesabatı obyektivdir: “Azərbaycanda demokratiya səhəsində geriləmələrin olduğu faktdır. Avropa İnsan Haqları Məhkəməsi Eynulla Fətullayevin azadlığa buraxılmasına dair qərar verib. Azərbaycan hakimiyyəti səhvini düzəltmək əvəzinə, ittihamlara keçir”.
T.Yaqublu qeyd etdi ki, Azərbaycanda demokratiya sahəsindəki problemlər həllini tapmayınca, Qarabağ məsələsi çözülməyəcək: “Azərbaycanın adı bütün beynəlxalq təşkilatların hesabatında qara siyahılya salınır. Azərbaycan hakimiyyəti avtoritar, rüşvətxor, korrupsiyaçı adlandırılır. Əgər Qarabağ münaqişəsində tərəf Azərbaycan yox, Norveç olsaydı məsələ çoxdan həllini tapmışdı. Norveç mədəni demokratik ölkə imici qazanıb. Beynəlxaq təşkilatları necə inadıra bilərlər ki, biz ölkəmizin vətəndaşlarının hüquqlarını tanımırıq, ancaq bizə güllə atan ermənilərə haqq taniyacağıq? Təşkilatın Azərbaycan hakimiyyəti barədə qeydlərini təqdir edirəm. İqtidar demokratik islahatlara başlamalıdır. Azərbaycan parlament seçkiləri ərəfəsindədir. Hakimiyyət bu seçkiləri də saxtalaşdıracaq. Nə komissiyaların tərkibi dəyişdirilir, nə də sərbəst toplaşmaq azadlığına imkan yaradılır”.
AXCP sədrinin müavini Fuad Qəhrəmanlı qeyd etdi ki, Azərbaycanın adının beynəlxalq təşkilatın qara sıyahısında çəkilməsi ilk dəfə deyil: “Bir çox beynəlxalq təşkilatlar ölkəmizdə demokratiyanın durumuna görə narahatlıqlarını ifadə edirlər. Jurnalistlərin, bloggerlərin həbsi, demokratiya sahəsində geriləmələr təkrar-problemlərdir. Bu cür hesabatlar yerli hakimiyyətlərin beynəlxalq tənqiddən nəticə çıxarmalarına hesablanıb. Ənənəvi olaraq Azərbaycan hakimiyyətinin tənqidlərə mövqeyi eyni olur. Qeyri-hökumət təşkilatları və müxalifət qaldırılan problemlərin həqiqətən də mövcud olduğunu qeyd edir, onların həll olunmamasının Azərbaycanın beynəlxalq imicinə ciddi zərbə vurduğunu qeyd edirlər. Qarabağ kimi vacib məsələnin həllində ölkənin imicinə mənfi təsir göstərdiyini dilə gətirirlər. Hakimiyyət ənənəvi olaraq o hesabatların qərəzli olduğunu deyir. Problemin həllinə təşəbbüs göstərmirlər ki, növbəti hesabatlarda Azərbaycan adı çəkilməsin. Parlament seçkiləri ərəfəsində yayımlanan bu hesabata Azərbaycanın hakimiyyəti həssas yanaşmalıdır. Azərbaycanın problemləri müxalifətin və qeyri-hökumət təşkilatlarının olmamalıdır”.
F.Qəhrəmanli qeyd etdi ki, Azərbaycan hakimiyyəti sadalanan problemlərin həlli istiqamətində addımlar atmalıdır.

Leyla İLQAR

633 dəfə baxılıb