ARAZ AĞALAROVUN GÜMBƏZLİ GÖYDƏLƏNLƏRİ XARİCİ ŞİRKƏTƏ SATILA BİLƏR

	13 fevral 2012


Onlayn ictimai-siyasi qəzet

Gündəm

ARAZ AĞALAROVUN GÜMBƏZLİ GÖYDƏLƏNLƏRİ XARİCİ ŞİRKƏTƏ SATILA BİLƏR

2010-09-06

“Məşədi Əzizbəyov” metrostansiyası ətrafında ucaldılan binaların tikintisi yaxın vaxtlarda başa çatacaq

Artıq iki ilə yaxındır ki, “Məşədi Əzizbəyov” metrostansiyası ətrafında söküntü-tikinti işləri davam etdirilir. Stansiyanın sağ tərəfi boyunca tikilən 30-dan çox gümbəzli göydələn diqqəti cəlb edir. İnşası başa çatmaqda olan bu kompleksin ölkə prezidentinin qudası, Rusiyada yaşayan iş adamı Araz Ağalarova məxsus olduğu deyilir. Bu nəhəng proyektlə tanış olmaq üçün həmin əraziyə yollandıq.

Hər biri 12 mərtəbədən yüksək olan bu binalar avtomobil yolunun yaxınlığında tikilib. Tikintinin getdiyi ərazi hasara alınıb. Biz orada olarkən həyətində fəhlələr gərgin işləyirdi. Mühafizəçidən mənzillərin satışını soruşduq. O, ərazidəki binaların satılmadığını dedi: “Yaxşı olar ki, bizim ”28 may" metrostansiyasında yerləşən baş ofisimizə müraciət edəsiniz. Burada tikilən binalar prezidentin qudası Araz Ağalarova məxsusdur. Hələ bilinmir satılacaq, ya yox". Mühafizəçi onu da əlavə etdi ki, tikintini “Azinko” və “Faktor” şirkətləri həyata keçirir.
Binada işləyən fəhlələrlə söhbət zamanı öyrəndik ki, “Azinko” şirkəti indiyədək 28 bina inşa edib: “Əksər binalar 12, bir neçəsi isə 14, 16, 18 mərtəbəli binalardır. Kompleksdə həmçinin məktəb binası da tikilib. Bağça və idman kompleksinin inşası da nəzərdə tutulur. Hazırda gərgin iş rejimində çalışırıq. Yaxın vaxtlarda binalar hazır olacaq”.
Samir adlı fəhlənin sözlərinə görə isə, binalar bütünlüklə xarici şirkətə verilə bilər: “Hələ ki, tikililər satışa çıxarılmayıb. Söz-söhbət gəzir ki, neft şirkətinə satılacaq. Ya da hansısa xarici şirkətin ofis yeri olacaq. Amma dəqiq məlumat yoxdur. Hazırda intensiv iş gedir. 3-4 aya bəlkə də bütün işlər yekunlaşacaq”.
Burada dəhlə işləyən Məhəmməd də binaların şəhər sakinlərinə satılmayacağını deyir: “Deyilənə görə, binalar xarici şirkətlərə satılacaq. Ərazidə ”Faktor" şirkəti tərəfindən 6 bina tikilib. 24 binanın, park və məktəbin tikilməsi də nəzərdə tutulub. Bütün binaların başında gümbəz ucaldılır".
Qeyd edək ki, göydələnlərin yerində vaxtilə fəaliyyətini dayandırmış zavod var idi. Məlumat üçün onu da bildirək ki, biznesmen Araz Ağalarov Bakıda əvvəllər məşhur “delfin-binalar” tikdirib.

Günay MUSAYEVA

5021 dəfə baxılıb