ELMAR VƏLİYEVİN OTELİNDƏ MƏŞUM FACİƏ

	13 fevral 2012


Onlayn ictimai-siyasi qəzet

Gündəm

ELMAR VƏLİYEVİN OTELİNDƏ MƏŞUM FACİƏ

2010-09-07

Başçı bir nəfərin ölümünə, üç nəfərin yaralanmasına səbəb oldu
Yevlax rəhbərinin qeyri-peşəkar tələbi işçilərə baha başa gəldi; çökən betonun altında qalan dörd nəfərdən birinin həyatını xilas etmək mümkün olmayıb

Yevlax Rayon İcra Hakimiyyətinin başçısı Elmar Vəliyevin yanlış davranışı bir nəfərin ölümünə, üç nəfərin isə ağır yaralanmasına səbəb olub. Bu barədə “Yeni Müsavat”a Yevlaxdakı etibarlı mənbədən məlumat daxil olub. Mənbənin bildirdiyinə görə, hadisə icra başçısının inşa etdirdiyi və artıq tamamlama işləri başa çatmaq üzrə olan hoteldə baş verib.

E.Vəliyev Yevlaxda Kür qırağında böyük bir hotel tikdirir və vaxtaşırı həmin əraziyə gedərək tikinti işlərinə baş çəkir. Mənbənin dediyinə görə, E.Vəliyev bilib ki, bu günlərdə prezident İlham Əliyevin Qərb bölgəsinə səfəri nəzərdə tutulur və dövlət başçısı bu səfər çərçivəsində yolüstü Yevlağa da baş çəkəcək. İcra başçısı istəyib ki, həmin vaxtadək bütün tamamlama işləri başa batsın və hotelin açılış mərasimi prezidentin Yevlağa səfəri zamanı baş tutsun ki, İ.Əliyev də bu tədbirə qatılsın.
Buna görə də sentyabrın 4-də hotel tikilən əraziyə gedən icra başçısı işlə tanış olandan sonra iş icrasına betonun tökülməsi forması ilə bağlı irad tutub. Beton hotelin həyətində bir neçə metr hündürlüyü olan yardımçı tikilinin üstünə tökülürmüş. İcra başçısı beton tökmə işinin sürətləndirilməsini istəyib. İcra başçısı isə deyib ki, beton E.Vəliyevin dediyi formada tökülsə, tavan çökər. İcra başçısı isə israrla betonun onun istədiyi formada tökülməsini tələb edib. Bundan sonra onun tələbi yerinə yetirilib. Amma cəmi bir neçə saat sonra iş getdiyi vaxtda beton çöküb və 4 nəfər fəhlə onun altında qalıb. Mənbənin dediyinə görə, fəhlələrdən biri hadisə yerindəcə keçinib. Digər 3 nəfər isə ağır xəsarət alıb. Yaralıların vəziyyətinin ağır olduğu və onların gizli şəraitdə müalicə edildikləri bildirilir. Aldığımız məlumatda o da deyilir ki, icra başçısı bu hadisənin rəsmləşdirilməsinə imkan verməyib. Ölən və yaralanan fəhlələrin yaxınlarını isə susdurmağa çalışırlar.
Bu məlumatla bağlı E.Vəliyev və onun yaxın ətrafının mövqeyini öyrənməyə çalışsaq da, qarşı tərəfə çıxış imkanımız olmadığından bu cəhdimiz alınmadı. Bununla belə, növbəti saylarımızda qarşı tərəfin mövqeyini dərc etməyə hazırıq.
Onu da qeyd edək ki, bu, E.Vəliyevin adının ölüm işində hallanması ilə bağlı ilk fakt deyil. Bir müddət öncə E.Vəliyev tərəfindən iclasda təhqir olunan Yevlax şəhər 7 saylı məktəbin direktorunun iclasdan sonra ürəktutmasından vəfat etməsi xəbəri yayılmışdı.