CƏNUBİ AZƏRBAYCANDA “QƏZƏB GÜNÜ” ELAN OLUNDU | Güney_hadisələri

	22 may 2012


Onlayn ictimai-siyasi qəzet

Güney hadisələri

CƏNUBİ AZƏRBAYCANDA “QƏZƏB GÜNÜ” ELAN OLUNDU

2011-09-01

Bakıda Təbriz və Urmiyəyə dəstək aksiyası keçirildi

Tehranda Azərbaycan türklərinin böyük etiraz aksiyası keçiriləcək. 24saat.az-ın məlumatına görə, bu barədə Cənubi Azərbaycan Televizyasının (GÜNAztv) canlı efirinə zəng edən soydaşlarımız bildiriblər. Onlar qeyd ediblər ki, azərbaycanlıların mitinqi bu gün Bakı vaxtı ilə saat 18:30-da başlayacaq. Etiraz aksiyası Urmiyə gölünün qurudulmasına mane olmaq və avqustun 29-da Urmiyə və Təbriz şəhərlərindəki nümayişlər zamanı həbs olunanların azad edilməsi tələbi ilə keçiriləcək. Aksiyaya 10 minlərlə insanın qatılacağı ehtimal olunur.

Qeyd edək ki, bir neçə il bundan öncə YUNESKO beynəlxalq əhəmiyyətini nəzərə alaraq Urmiyə gölünü dünyanın təbii sərvəti kimi qeydiyyatdan keçirib. İran çərçivəsində də Urmiya gölü milli və təbii sərvət sayılır. Mütəxəssislərin nəzərinə görə, Urmiyə gölü, xüsusən Güney Azərbaycanın ekoloji sistemində mərkəzi rol oynayır. Ekspert Babək Azəri Azadtribun saytına deyib ki, bu göl 10 milyard ton duzun ətraf mühitə səpilməsinin qarşısını alır: “Təqribən 10 milyard ton duzun Güney Azərbaycan ərazisinə səpələnməsi nəticəsində böyük ərazi şoranlığa çevriləcək, əkinçilik aradan gedəcək və onun nəticəsində mal-heyvan da saxlamaq mümkün olmayacaq. Urmiyə gölündə olan duz xalis deyil, tərkibində bəzi kimyəvi maddələr var. Bu kimyəvi maddələrin tədricən Güney Azərbaycan ərazisinə dağılması insanların sağlamlığına, eyni zamanda yeni doğulacaq uşaqlarda bəzi şikəstlik hallarına gətirib çıxarar”. Verilən məlumata görə, Urmiyə gölünün 40%-dan artığı quruyub və ehtimal edilir ki, əgər Urmiyə gölünün ilə bağlı konkret çıxış yolu tapılmasa, bu göl 3 il ərzində tam quruyacaq. Ekspertlərə görə, Zab çayından Urmiyə gölünə bir qol ayrılsa, bu problem həll olar.
Qeyd edək ki, avqustun 27-də Urmiyədə və Təbrizdə Urmiyə gölü ilə bağlı etiraz aksiyaları keçirilib, onlarla yurddaşımız yaralanıb. Hətta belə xəbər verilir ki, Urmiyə şəhərində bir nəfər şəhid olub.
Başqa bir xəbərə görə, sentyabrın 3-də Cənubi Azərbaycan şəhərlərində növbəti etiraz aksiyası keçiriləcək. Təşkilatçılar bütün şəhərlərdə mitinqlərin eyni vaxtda (Bakı vaxtı ilə saat 18:30-da) başlayacağını bildiriblər. Onların sözlərinə görə, şənbə günü azərbaycanlılar tərəfindən “qəzəb günü” elan edilib.
Dünən isə bir qrup gənc İranın Bakıdakı səfirliyinin qarşısında aksiya keçirib. “Anspress”in məlumatına görə, aksiya iştirakçıları metronun “İçərişəhər” stansiyasının qarşısından İranın Bakıdakı səfirliyinin binasına doğru yürüş ediblər. Gənclər aksiyanın qətnaməsini oxuyaraq, onun surətini səfirliyə təqdim etmək istəyiblər. Lakin səfirlikdən qətnaməni qəbul edən olmayıb və qətnamə səfirliyin poçt qutusuna atılıb. Polis aksiyanın qarşısını alıb.
Gənclərin nümayəndəsi Asim Kazımlı “anspress”ə bildirib ki, aksiyanın keçirilməsində məqsəd Cənubi Azərbaycanda Urmiyə gölünün qurudulmasına etiraz etmək və cənubi azərbaycanlılara dəstək vermək olub.

Cavid TURAN

759 dəfə baxılıb