URMİYA VƏ TƏBRİZDƏ TUTHATUT | Güney_hadisələri

	22 may 2012


Onlayn ictimai-siyasi qəzet

Güney hadisələri

URMİYA VƏ TƏBRİZDƏ TUTHATUT

2011-09-07

İran rejimi Cənubi Azərbaycanı informasiya blokadasına almağa çalışır

Təbrizdə və Urmiyada Urmu gölünün qurudulmasına etirazlar davam edir. Güneydən gələn məlumatlara görə, həbs olunanların da sayı günbəgün artır. Urmiyadan gələn xəbərlərə görə, Ankara Universitetinin öyrəncisi Məcid Cavadi qardaşı Tohid Cavadi ilə birlikdə tutuqlanıb. Tutuqlanan qardaşlar naməlum istiqamətə aparılıblar. Deyilənlərə görə, onların həbsi Urmiya gölü ilə bağlı gündəmdə olan kütləvi yürüşlərlə bağlıdır. Marağada da 6 nəfər azərbaycanlı fəal tutulub. Onlar həyata keçiriləcək kütləvi etirazla bağlı çağırış yayarkən yaxalanıblar.

İrandakı Azərbaycanlı Siyasi Məhbusları Müdafiə Assosiasiyasının (ADAPP) sözçüsü Vahid Qarabağlı isə deyib ki, son 3-4 gün ərzində həbslərin dəqiq sayı bilinmir: “Çünki insanlar küçələrdə və evlərdə kütləvi şəkildə həbs olunur. Ancaq bizim təxminimizə görə, həm Təbriz, həm də Urmiya etirazlarında həbs olunanların sayı yüzlərlədir”.
V.Qarabağlı həbs olunanlar arasında milli fəalların olduğunu da deyib. Onun sözlərinə görə, sentyabrın 3-də Urmiyada keçirilən küçə yürüşləri həm sayca, həm də aktivlik baxımından ən yaddaqalanı olub. O deyib ki, davam edən küçə yürüşlərində hər gün orta hesabla 20-30 min insan iştirak edir. “Azadlıq” radiosu həbs olunanlardan bəzilərinin ailələri ilə əlaqə saxlamağa cəhd etsə də, baş tutmayıb. V.Qarabağlı deyir ki, tutulanların mənzillərindəki telefon xətləri ya kəsilir, ya da İran Kəşfiyyat Nazirliyi (ETTELAAT) tərəfindən nəzarətə götürülür: “İran hökuməti məlumatların kənara çıxmasını istəmir. Buna görə də İranda ailələr təhdid edilirlər, həbs olunanların ailə üzvlərinin xarici medialara və xaricdəki insan haqları təşkilatlarına məlumat vermələrinin qarşısını alırlar. Həmin ailələr qorxu altındadır”. ADAPP sözçüsü deyib ki, İran hökuməti Urmu gölünün qurudulmasına əncam çəkməyənə qədər azərbaycanlılar etirazlarını, küçə yürüşlərini davam etdirmək niyyətindədirlər: “Ehtimal var ki, üzümüzə gələn günlərdə bir daha aksiyalara çağırışlar olsun, küçə etirazları davam etsin”.
GAMOH da son 2-3 gün ərzində Təbrizdə və Urmiyədə kütləvi yürüşlərdə yüzlərlə insanın həbs olunduğunu, onların böyük hissəsinin harada saxlanmaları barədə məlumat verilmədiyini bildirir.
Bu arada İranda prezident Mahmud Əhmədinejadın karikaturasını yayan iki nəşrin fəaliyyəti dayandırılıb. Həftəlik “Shahrvand-e Emrouz” jurnalı media qanununu pozduğu üçün bağlanıb. Gündəlik “Rouzegar”ın isə təbliğatla məşğul olduğu üçün müvəqqəti bağlandığı bildirilir. Hər iki nəşrin fəaliyyəti əvvəl də dayandırılmışdı. Bu nəşrlər islahatları dəstəkləyir.

Cavid TURAN

1341 dəfə baxılıb