AZƏRBAYCANIN GÜNEYİ 27 OKTYABRA HAZIRLAŞIR | Güney_hadisələri

	22 may 2012


Onlayn ictimai-siyasi qəzet

Güney hadisələri

AZƏRBAYCANIN GÜNEYİ 27 OKTYABRA HAZIRLAŞIR

2011-10-25

Cənubi Azərbaycandakı repressiyalar xalq qəzəbinin qarşısını ala bilmir

Oktyabrın 23-də Türkiyənin Van şəhərində baş vermiş güclü zəlzələ Qərbi Azərbaycan əyalətində də dağıntılara səbəb olub. İranın parlamentinin Xoy və Çaldıran şəhərlərindən seçilmiş deputatı Müvəyyid Hüseyni jurnalistlərə açıqlamasında əyalətin Türkiyə sərhədinə yaxın bölgələrində qeydə alınmış 6,5 bal gücündə zəlzələ haqda belə deyib: “100-ə yaxın kənd ciddi ziyan görüb. Ancaq ölənlərin və yaralıların sayı o qədər də çox deyil”.

Bu ərəfədə azərbaycanlı fəallara qarşı repressiyalar davam edir. Nasir Derzaşəmşir (Aydın Muğanlı) bir neçə aydır Təbriz ETTELAATının (İran Kəşfiyyat Nazirliyi) bir nəfərlik kamerasında saxlanılır. Cənab Derazşəmşir 2011-ci il avqust ayının 6-ı (mordad ayının 15-i) Muğanın Cəfərabad qəsəbəsində saxlanılaraq Təbrizin ETTELAAT şöbəsinə aparılıb. Tutulduğu gündən bəri bir nəfərlik kamerada saxlanılan Derazşəmşirlə, bir neçə dəqiqəlik anası ilə görüşdən başqa heç bir təmasa icazə verilmir. Onun yaxalanmasının səbəbi ilə bağlı ailəsinə heç bir məlumat verilmir. Hərəkatçı bu müddətdə vəkil tutmaq hüququndan da məhrum olub. Təbrizin ETTELAAT idarəsindən onun ailəsinə bildirilib ki, müəyyən səbəblərə görə Derazşəmşirin ETTELAATın bir nəfərlik kamerasında saxlanılma müddəti uzadılıb.
Qeyd edək ki, Adını çəkdiyimiz azərbaycanlı fəalın tutulduğu müddətdə bundan başqa heç bir bilgi əldə edilməyib. Xatırladaq ki, Bakı Dövlət Universitetinin məzunu, magistr dərəcəsinə yiyələnmiş Güney Azərbaycanlı Nasir Derazşəmşir öz dostları arasında milli-mədəni fəaliyyətlərlə məşğul olub və bundan başqa heç bir suç işləməyib.
Azərbaycanlı milli-mədəni fəal Abdullah Səduqi oktyabrın 24-də (abanın 2-də) Təbrizin ETTELAAT idarəsinə göndərilib.
Cənab Səduqi avqustun 24-ü (şəhrivərin 2-i) Təbrizin Qumtəpə məhəlləsində iftar mərasimi zamanı tutulan təxminən 30 nəfərdən biridir. O, 20 gün ETTELAT təcridxanasında saxlanıldıqdan sonra Təbrizin mərkəzi zindanına köçürülmüşdür. Həmçinin cənab Səduqi ETTELAAT təcridxanasında saxlanılan zaman qanunsuz saxlanıldığına görə, aclıq aksiyası (etisab-i ğəza) etmiş və səhhəti pisləşmişdir.
Qeyd edək ki, Beynəlxalq Əfv Təşkilatı iftar mərasimi zamanı tutulan azərbaycanlı fəalların dərhal azad edilməsini tələb edibdir.
Tanınmış azərbaycanlı fəal Abbas Lisani barədə nigaranlıqlara isə son qoyulmur. Məlumata görə, onun harada saxlanıldığı bəlli deyil. Bu barədə Vəkil Nağı Mahmudi, “Radi Zəmanə”-yə məlumat verib. O, cənab Lisaninin son vəziyyəti barədə belə deyib: “Abbas bəy Lisaninin harda saxlanıldığı barədə heç bir məlumat yoxdur. Lisani aclıq aksiyasını dayandırdıqdan sonra öz ailəsi ilə 5 dəqiqəlik telefon əlaqəsi saxlayıb və bildirib ki, əgər başıma bir bəla gəlirsə bilin ki, aclıq aksiyasından deyil. Bu isə, işgəncələrin və münasibətlərin şiddətindən xəbər verir. O demək istəyib ki, vəziyyəti ağırdır və cismi-ruhi işgəncələr altında saxlanılır”.
Təbrizin “Səhənd” stadionunda “Traxtu”la “Saypa” futbol komandaları arasında keçirilən oyunda bir neçə nəfər həbs olunub.
Oktyabrın 21-də (mehrin 29-da) keçirilən müsabiqə zamanı tutulanların əksəriyyətinin yaşı 15-dən aşağıdır.
Məlumata görə, tutulanlar keçən 6-cı gün (şənbə günü) nəzərdə tutulan etiraz yürüşü ilə bağlı bildiriş yayıb və özləri ilə daşıdıqlarına görə tutulublar. Tutulanların bəzisi yaxalanarkən təhlükəsizlik qüvvələri tərəfindən döyülüb.
Tutulanların bir neçəsinin kimliyi bəllidir. Onlar aşağıdakılardır: Fərzad Kazimi İsfəncani, Behnam Sasani İsfəncani, Qurban, Seyid Rəzəvi, Vəhid Xeyri.
Sabah isə Təbriz başda olmaqla Güney Azərbaycanın bir çox şəhərlərində, o cümlədən Tehranda Urmu gölünü xilas məqsədilə izdihamlı yürüş-mitinqlərə başlanılacağı gözlənilir. Güney boyu yayılan bildirişlərdə xalq meydana dəvət olunur. Artıq İran ordusunda xidmət edən azərbaycanlı zabit və əsgərlərə də etirazçılara əl qaldırmamaq xahişi ilə müraciət edilib.

Cavid TURAN

739 dəfə baxılıb