AZƏRBAYCANIN GÜNEYİNDƏN ACI XƏBƏRLƏR | Güney_hadisələri

	22 may 2012


Onlayn ictimai-siyasi qəzet

Güney hadisələri

AZƏRBAYCANIN GÜNEYİNDƏN ACI XƏBƏRLƏR

2011-12-19

Azərbaycanlı fəal, jurnalist Səid Mətinpur isə 2 il 5 aydır ki, Evin zindanının 350-ci bölməsində saxlanılır. Bu barədə azərbaycanlı fəalın həyat yoldaşı Ətiyə Tahiri açıqlama verib. Ona yarım ildir ailəsi ilə görüşməyə icazə vermirlər. “Səbəbini öyrənmək üçün Tehran vilayətinin prokurorluğuna bir neçə dəfə məktub yazmışam. Amma hələ də cavab almamışam.

Hər həftə onunla telefonla danışmaq üçün Zəncandan Tehrana gəlirəm, amma görə bilmədən qayıdıram”-deyə, həyat yoldaşı bildirib. Ə.Tahiri Səid Mətinpurun səhhəti ilə bağlı da məlumat verib: “Səid bəyin onurğa sümüyündə ciddi problem var, bundan əziyyət çəkir. Onu müayinə edən zindan həkimi bildirib ki, bu vəziyyətdə həbsdə qala bilməz, müalicə üçün xəstəxanaya aparılmalıdır. Məhbusları xəstəxanaya aparanda ayaqlarına qandal vururlar. Qandallanmamaq üçün Səid bəy xəstəxanaya getməkdən imtina edir”. Qeyd edək ki, Tehran Universitetində fəlsəfə ixtisası üzrə təhsil almış Səid Mətinpur 2007-ci ilin may ayında Zəncan şəhərində həbs olunub. O, 278 gün təkadamlıq kamerada saxlanıldıqdan və işgəncələrə məruz qaldıqdan sonra 5 milyard rial (500 min ABŞ dolları) girovla müvəqqəti azadlığa buraxılıb. Səid Mətinpuru Tehran İnqilab Məhkəməsinin 15-ci şöbəsi 8 il azadlıqdan məhrum edib. O, “Mərdom-e nou” və başqa yerli dərgilərdə yayımladığı məqalələrdə İran adlanan yerin yetkililərinin azərbaycanlılara qarşı yürütdükəri basqını tənqid edib. Səid Mətinpur “Yarpaq”, “Moc-e bidari” (“Oyanış dalğası”) kimi həftəlik dərgilərin redaksiya heyətlərində də çalışıb.
Bu arada İran Kəşfiyyat Nazirliyinin (ETTELAAT) Təbriz şöbəsinin əməkdaşları Məhəmməd Rzayi Təbrizi və qızı Laçını Türkiyəyə səfər edərkən tutaraq Təbriz bölməsinə aparıblar. Ata-bala döyülüb, təhqir edilib. Laçın 4 saat dindirildikdən sonra müvəqqəti azadlığa buraxılsa da, atası ETTELAAT-da saxlanıb. Hər iki fəalın pasportları, şəxsi əşyaları, eləcə də Məhəmməd Rzayi Təbrizinin Azərbaycan dilində çapa hazırladığı və özü ilə Türkiyəyə aparmaq istədiyi bir roman və bir sözlüyün (lüğət) əlyazmaları, eləcə də içində digər yazıları olan fləş-kartı götürülüb. Məhəmməd Rzayi Təbrizi 2009-cu ildə Urmiya gölünün qurumasına etiraz olaraq keçirilən aksiyaya qatıldığına görə tutulmuş, bir neçə gün ETTELAAT-ın Təbriz şöbəsinin zindanında saxlandıqdan sonra mülk girovu qarşılığında azadlığa buraxılmışdı.

Cavid TURAN

1993 dəfə baxılıb