ERMƏNİSTAN AZƏRBAYCANLA SİLAHLANMA YARIŞINA GİRİR | KİVDF_layihələri

	22 may 2012


Onlayn ictimai-siyasi qəzet

KİVDF layihələri

ERMƏNİSTAN AZƏRBAYCANLA SİLAHLANMA YARIŞINA GİRİR

2012-01-30

Seyran Ohanyan “daha uzaq və dəqiq vuran” silahlar almaqda davam edəcəklərini deyir, lakin rusiyalı ekspertə görə, bu məsələdə İrəvan Bakı ilə ayaqlaşa bilməz

Ermənistanın müdafiə naziri Seyran Ohanyan erməni ordusunun yaranmasının 20 illiyi ilə bağlı keçirilən tədbirlərdə deyib ki, onlar “daha uzaq və dəqiq vuran” silahlar almaqda davam edəcəklər. Onun sözlərinə görə, Ermənistan ordusu yeni silahlar almaqla döyüş gücünü möhkəmləndirir. Bu məqsədlə silahlı qüvvələrin yenilənməsinin strateji planlaşdırması aparılır. Ohanyan deyib ki, planlaşdırma aparılarkən 2015-ci ilədək alınması nəzərdə tutulan yeni silah və hərbi texnikanın siyahısı tutulur. Ordu günü ilə bağlı İrəvanda prezident Serj Sərkisyan, müdafiə naziri S.Ohanyan və digərləri Qarabağ müharibəsində öldürülmüş erməni əsgərlərinin qəbirlərini ziyarət ediblər.

Ermənistan müdafiə nazirinin “daha uzaq və dəqiq vuran” silah dedikdə, çox güman ki, ötən il İrəvandakı hərbi paradda nümayiş etdirilən “Toçka-U” raket komplekslərini nəzərdə tutur. Bu silahlar Rusiyadan alınıb. “Toçka-U” raket kompleksləri, demək olar ki, erməni ordusunun paradda nümayiş etdirdiyi yeganə yeni silah növü idi. Qalan silah və texnika isə əsasən köhnəlmiş rus texnikasından ibarət olub. Hətta onların bir çoxunun nasaz vəziyyətdə parada çıxarıldığı və sadəcə maket kimi nümayiş etdirildiyi haqda xəbərlər var idi. Müqayisə üçün qeyd etmək lazımdır ki, Azərbaycan da son illər öz hərbi potensialını gücləndirərkən hədəfi uzaq məsafədən və dəqiq vuran silah sistemləri almağa üstünlük verir. Bura həm Rusiya, Ukrayna və Belarus kimi ölkələrdən əldə edilən müxtəlif silah sistemləri, reaktiv artelleriya qurğuları, S-300 raketlərinin yeni modifikasiyası, habelə raket sistemləri, həm də İsrail kimi dünyanın ən inkişaf etmiş hərbi sənayelərindən birinə malik ölkədən alınan silahlar daxildir. Hansı ki, bu silahların əsas təyinatı məhz düşmən hədəflərini uzaq məsafədən dəqiq vurmaqdan ibarətdir. Bu baxımdan Ermənistanın da belə silahlar almaq planları hazırlamaqla Azərbaycanla silahlanma yarışına girdiyi aydındır.
Lakin Ermənistanın news.am saytına açıqlama verən rusiyalı ekspert, Rusiya Elmlər Akademiyasının Orta Asiya və Qafqaz İnstitutunun əməkdaşı Aleksandr Skakova görə, ermənilərin Azərbaycanla bu məsələdə ayaqlaşması çətin olacaq. Onun fikrincə, hazırda regionda Azərbaycanla Ermənistan arasında müəyyən hərbi paritet mövcuddur. Lakin vəziyyət durmadan dəyişir: “Məlumdur ki, Ermənistanın hərbi büdcəsi Azərbaycanın hərbi büdcəsindən dəfələrlə azdır. Xüsusən də Azərbaycan hazırda fəal şəkildə öz hərbi sənaye kompleksini inkişaf etdirir. Başa düşmək lazımdır ki, indi 90-cı illərdən fərqli situasiya yaranıb. Erməni tərəfi keçmişin təcrübəsinə arxayın olmasa yaxşıdır, balans dəyişib”. Skakovun fikrincə, hazırda Bakıda başa düşürlər ki, mövcud qüvvələr nisbətində Qarabağda blitskriq mümkün deyil. Lakin bir neçə il sonra vəziyyət indikindən fərqli ola bilər: “Elə məqam yarana bilər ki, Bakıda Qarabağı 2 həftəyə geri qaytarmaq gücündə olduqlarına əmin olarlar. Bu variant tamamilə realdır. Hazırda Azərbaycanın Qarabağı qısa müddətə geri alması real görünməsə də, kim deyə bilər ki, 5 il, 10 il sonra hansı vəziyyət olacaq”, deyə rusiyalı ekspert bildirib.

F.MƏMMƏDOV

3066 dəfə baxılıb