ERMƏNİ ORDUSUNDA İŞGƏNCƏLƏR DAVAM EDİR | KİVDF_layihələri

	22 may 2012


Onlayn ictimai-siyasi qəzet

KİVDF layihələri

ERMƏNİ ORDUSUNDA İŞGƏNCƏLƏR DAVAM EDİR

2012-02-17

Döyülməkdən dəli olan əsgərin atası işin araşdırılmadığını deyir, daha bir əsgər isə Xankəndindən atasına zəng edərək ona dəhşətli işgəncələr verildiyini bildirib

Ermənistan ordusunda, xüsusən Azərbaycanın işğal altındakı ərazilərində yerləşdirilmiş erməni hərbi birləşmələrində işgəncələrə dair yeni məlumatlar var. Epress.am. erməni saytı xəbər verir ki, ötən il Dağlıq Qarabağdakı hərbi hissələrdən birində xidmət edərkən qəddar işgəncələrə məruz qalan, döyülməkdən ağlını itirən əsgər Ovanes Vardanyanın atası işin araşdırılmadığını deyir. Əsgər hazırda İrəvanda psixiatrik xəstəxanada müalicə alır. Onun atası deyir ki, iki gün əvvəl Qarabağdan gələn müstəntiqlər oğlu ilə xəstəxanada görüşüb. “Məni otaqdan çıxarıb oğlumu dindirdilər, sonra həkimlər gəlib baxdı.

Ertəsi gün mən Qarabağa zəng elədim və müstəntiqlərdən günahkarların nə zaman tapılacağını soruşdum. Onlar cavab verdilər ki, guya işi araşdırırlar. Mən sual etdim ki, necə ola bilər bu müddət ərzində günahkarlar tapılmır? Onlar dedilər ki, narahat olma, bizdə 2500 əsgər var, növbə ilə hamını dindirirlər. Mənim gəldiyim qənaət budur ki, günahkarları tapan olmayacaq” deyə, əsgərin atası Vardan Vardanyan bildirib. Onun dediyinə görə, oğlunu meşəyə aparıb o qədər döyüblər ki, qorxusundan başına gələnlər haqda danışmır: “Yalnız hansısa UAZ-a mindirildiyini xatırladığını deyir. Bildirir ki, zabitlər onu öldürmək, zorlamaq istəyirdilər. Kürəyində dərin çapıq yeri var. Helsinki Vətəndaş Assambleyasının Vanadzor ofisinin təmsilçiləri də onun bədənindəki işgəncə izlərini qeydə alıblar”.
Digər məlumata görə, Qarabağdakı erməni hərbi hissələrindən birinin Kirakosyan familiyalı 20 yaşlı əsgəri İrəvanda həbsxanada olan atası ilə telefonda danışarkən ona zabitlərin amansız işgəncələr verdiyini deyib. Bu barədə Ermənistanda ombudsmanın ofisi məlumatlandırılıb. Ofisdən məsələ ilə bağlı araşdırmaya başladıqlarını deyiblər. Xatırladaq ki, bugünlərdə “Oxford Analitica” Mərkəzi Ermənistan ordusundakı dözülməz rəftar və əsgər ölümlərinin ordunun döyüş qabiliyyətini zəiflətdiyi, Müdafiə Nazirliyinin rəhbərliyində orduda islahatlara dair ziddiyyətlər hökm sürdüyü haqda hesabat yaymışdı.

F.MƏMMƏDOV

3047 dəfə baxılıb