ERMƏNİLƏR BAKI-TİFLİS-QARS LAYİHƏSİNİN REALLAŞMASINDAN QORXUYA DÜŞÜB

	22 may 2012


Onlayn ictimai-siyasi qəzet

KİVDF layihələri

ERMƏNİLƏR BAKI-TİFLİS-QARS LAYİHƏSİNİN REALLAŞMASINDAN QORXUYA DÜŞÜB

2012-02-20

“armenpress.am” agentliyi: “Bu layihə Ermənistanın milli təhlükəsizliyini təhdid edir...”

Azərbaycan, Gürcüstan və Türkiyəni dəmir yolları ilə birləşdirən Bakı-Tiflis-Qars layihəsinin tezliklə reallaşacağı Ermənistanda qorxu ilə izlənilir. “armenpress.am” agentliyinin bu barədə məqaləsində deyilir ki, layihə Ermənistanın milli təhlükəsizliyi üçün təhdiddir. Agentlik xatırladır ki, Azərbaycan bu layihənin reallaşması üçün Gürcüstana 300 milyon dollar faizsiz kredit ayırıb. Bu layihə Cənubi Qafqazı Türkiyə üzərindən Avropaya birləşdirəcək, daha geniş mənada Asiyadan yüklərin dəmir yoluyla Azərbaycan və Gürcüstandan keçməklə Avropaya daşınmasına imkan yaradacaq. “Bakı-Tiflis-Ceyhan kimi bu layihə də daha çox siyasidir. Əsas məqsəd odur ki, Ermənistan bölgədən və bütün dünyadan tam təcrid olunsun.

Qeyd etmək lazımdır ki, Ermənistanla Türkiyə, eləcə də Gürcüstanla Ermənistan arasında dəmir yollarını bərpa etmək bu layihədən qat-qat ucuz başa gələrdi. Hazırda bağlı olan Qars-Gümrü dəmir yolu Tiflis-Qars yolundan qat-qat qısadır. Lakin bu üstünlük ikinci plana keçir. İndiki halda Azərbaycanın mövqeyi dominantdır, hansı ki, Türkiyə və təəssüf ki, Gürcüstan da onunla razıdır”, - deyə agentlik qeyd edir.
Məqalədə bildirilir ki, bu günlərdə Tiflisdə Türkiyə, Azərbaycan və Gürcüstan hökumət nümayəndələrinin danışıqlarında elan edilib ki, Bakı-Tiflis-Qars dəmir yolu 2014-cü ildə işə düşəcək. “Ermənistanın ətrafında nəqliyyat həlqəsi qapanır, bizi ancaq İranla quru yolu bağlayır. Türkiyə və Azərbaycan Gürcüstanı öz tərəflərinə çəkə biliblər. Gürcüstan Ermənistanın təcrid olunmasında iştirak etməklə Rusiyadan qisas alır. Doğrudur, Gürcüstanın da Ermənistanla sərhədlərini bağlaması təhlükəsi zəifdir, lakin nəzərə almaq lazımdır ki, dəmir yolları təkcə yükləri yox, hərbi texnikanı da daşımaq üçündür”, - deyə agentlik yazır.
Xatırladaq ki, vaxtilə erməni lobbisi Bakı-Tiflis-Qars layihəsini əngəlləmək üçün bütün bacardığını etməyə çalışdı. ABŞ Konqresi erməni lobbisinin təsiri altında Amerika Exİm bankının bu layihəni maliyyələşdirməsini qadağan etdi. Lakin Azərbaycan yolun çəkilməsi üçün Gürcüstana lazım olan vəsaiti ayırdı və beləliklə də Ermənistanı bölgədə daha da təcrid olunmuş duruma salacaq mühüm strateji layihə reallaşmaq üzrədir.

F.MƏMMƏDOV

2808 dəfə baxılıb