QARABAĞDAKI SEPARATÇI REJİMİN RƏHBƏRİNİ TOPA TUTURLAR

	22 may 2012


Onlayn ictimai-siyasi qəzet

KİVDF layihələri

QARABAĞDAKI SEPARATÇI REJİMİN RƏHBƏRİNİ TOPA TUTURLAR

2012-02-22

Bako Saakyanın qarşılıqlı güzəştlərin mümkünlüyü barədə danışması erməni mediasında və siyasi çevrələrində kəskin qarşılanıb

Özünü Dağlıq Qarabağdakı oyuncaq erməni “dövlətinin” başçısı adlandıran Bako Saakyan erməni mediasının və ekspertlərinin tənqid hədəfindədir. Buna səbəb B.Saakyanın “Armeniya” qəzetinə verdiyi müsahibə olub. Həmin müsahibədə separatçı erməni rejiminin rəhbəri deyib ki, Qarabağ münaqişəsinin nizamlanmasında Azərbaycanla “qarşılıqlı güzəştlər” mümkündür.

O, hansı mümkün güzəştlərdən söhbət getdiyini dəqiqləşdirməsə də deyib ki, Dağlıq Qarabağ “hakimiyyəti” heç vaxt kompromisləri inkar etməyib. Lakin birtərəfli güzəştləri qeyri-mümkün hesab edir. Saakyanın qondarma “Dağlıq Qarabağ Respublikası” nın yaranmasının 20 illiyində işlətdiyi bu fikirlər sosial şəbəkələrdə və mediada ona ünvanlanan sərt tənqidlərə səbəb olub.
“Lragir.am. saytı yazır ki, bundan əvvəl Saakyan Azərbaycan və erməni tərəflərinin kompromis anlayışlarının fərqli olduğunu demişdi. Belə ki, Azərbaycan Dağlıq Qarabağın öz müqəddəratını təyin etməsi hüququ əvəzində ərazilərin qaytarılmasını nəzərdə tutur. Bəs Ermənistanda və Qarabağda güzəştlər deyəndə nəyi nəzərdə tuturlar? Saakyan bu barədə heç nə demir. Maraqlıdır ki, şəxsi söhbətlərdə Saakyan və digər Qarabağ siyasətçiləri deyirlər ki, heç bir güzəştdən söhbət gedə bilməz, bu barədə deyilənlər ancaq diplomatiya xatirinədir və Ermənistan rəhbərliyinin xahişi ilə edilir. Məqsəd danışıqlar prosesini korlamamaqdır. Üstəlik Qarabağın və Ermənistanın rəhbərliyi hər dəfə güzəştlər barədə bəyanatlardan sonra belə deyir. Deməyə məcburdur, çünki Qarabağ cəmiyyəti, xüsusən orta zabit heyəti, keçmiş ”kombatlar", hətta Saakyana yaxın adamlar onlardan güzəştlərin olmayacağına dair vəd almağa çalışırlar" deyə, sayt yazır. Müəllif qeyd edir ki, əgər belə vədlər olmasa çoxdan Saakyanı devirərdilər. Çünki Qarabağ cəmiyyəti hər hansı ərazi güzəştinə qarşıdır. Məqalədə deyilir ki, danışıqlarda iştirak etmədiyi halda Saakyanın güzəştlər haqda danışması Ermənistanın mövqelərini zəiflədir. Sayt yazır ki, üzdə güzəştlər haqda danışıb arxada “bir qarış da torpaq qaytarmaq olmaz” demək diplomatiya deyil. “Armenia today” saytı da Saakyanın kompromislər barədə sözlərini tənqid edərək Qarabağ rəhbərliyini “təslimçi mövqe” tutmaqda günahlandırıb. Qeyd edək ki, Ermənistan prezidenti Serj Sərkisyan da vaxtilə müsahibələrindən birində Dağlıq Qarabağ ətrafındakı rayonlarda məskunlaşmanın aparılmadığını, çünki bu ərazilərin nə vaxtsa qaytarılacağını demişdi. Sərkisyanın həmin sözləri onu dərhal kəskin tənqid hədəfinə çıxardı. Azərbaycan ərazilərinin işğalından hərislənən erməni cəmiyyətində ərazilərin qaytarılmasına dair istənilən bəyanat aqressiv qarşılanır. Beynəlxalq ekspertlər də bunu münaqişənin həllinə mane olan əsas amillərdən biri kimi qeyd edirlər.

F.MƏMMƏDOV

2915 dəfə baxılıb