BAKIDA BMT NÜMAYƏNDƏSİNİN ANASI ÖLDÜRÜLDÜ

	22 may 2012


Onlayn ictimai-siyasi qəzet

Kriminal

BAKIDA BMT NÜMAYƏNDƏSİNİN ANASI ÖLDÜRÜLDÜ

2012-02-19

Qatillər 73 yaşlı qadını öldürəndən sonra evi də yandırıb

Bakıda xüsusi amansızlıqla qətl törədilib. Bu barədə APA-ya Binəqədi Rayon Polis İdarəsindən (RPİ) bildirilib. Hadisə fevralın 17-də saat 19:00 radələrində Azadlıq prospekti, 189, mənzil 28-də (9 mərtəbəli binanın 3-cü mərtəbəsi) baş verib. Bu ünvanda yaşayan 1938-ci il təvəllüdlü Elmira Səxavət qızı İsmayılova naməlum şəraitdə çoxsaylı bıçaq xəsarətləri ilə qətlə yetirilib.

Daxili İşlər Nazirliyi bu qətllə bağlı məlumat yayıb. Məlumatda deyilir ki, 73 yaşlı E.İsmayılova öz mənzilində qətlə yetiriləndən sonra naməlum şəxs və ya şəxslər izi itirmək məqsədilə evi və meyiti yandırıblar. Hadisə yerinə gedən Fövqəladə Hallar Nazirliyinin yanğınsöndürənləri yanğının qarşısını ala bilib.
Qeyd edək ki, qətlə yetirilən qadın BMT-nin Ümumdünya Ərzaq Proqramının Azərbaycandakı nümayəndəliyinin rəhbəri Fuad Hüseynovun anasıdır. F.Hüseynov ANS-ə bildirib ki, əvvəlcə hadisənin yanğın olduğu ehtimal edilib: “Hamı elə ehtimal edirdi ki, bu, yanğındır. Hər yer tüstü idi. Anam mətbəxdə keçinmişdi. Ekspertiza zamanı məlum oldu ki, 15-16 bıçaq yarası var. Cənazə yandırılıb, ev yandırılıb. Və alçaq cani evdən qaçıb”.
Mərhumun qızı Azadə İbrahimova isə bunları bildirib: “Anam saat 5-də bizdə idi. Bizdən çıxıb evə getdi. Saat 6-da evə çatdı. Zəng etdi ki, evdəyəm. 7-yə işləmiş atam zəng etdi ki, ana evdədirmi. Dedim evdədir. Dedi evimiz yanır. Onu deyəndə halım xarab oldu. Dedi ana da yoxdur, bəlkə içəridə yanıb”.
İlkin ehtimala görə, qətl qarət məqsədilə törədilib. Lakin hadisənin motivi hələlik məlum deyil. Qətlə yetirilən şəxsin qohumlarının verdiyi məlumata görə, hadisəni törədən şəxs və ya şəxslər evə qarət məqsədi ilə daxil olmayıb. Bu səbəbdən qətlin motivi hələlik məlum deyil.
“Evdən heç nə götürülməyib, qarətə məruz qalmayıb. Ən maraqlısı budur. Heç bir əşya oğurlanmayıb. Mərhum sakit adam idi. Heç kimlə münaqişəsi yox idi” - deyə oğlu F.Hüseynov bildirib.
Faktla bağlı Binəqədi RPİ və Binəqədi Rayon Prokurorluğu tərəfindən araşdırma aparılır. Ekspert kriminalistlərin iştirakı ilə mənzildən əl-barmaq izləri götürülüb. Qeyd edək ki, hadisə baş verən binanın yaxınlığında müşahidə kameraları quraşdırılıb. Hazırda polislər cinayəti törədən şəxs və ya şəxsləri yaxalayaraq məsuliyyətə cəlb etmək üçün həmin kameralardakı görüntüləri araşdırır.

Xəbər xidməti

740 dəfə baxılıb