DAHA BİR VƏZİFƏLİ ŞƏXS RÜŞVƏT ALANDA TUTULDU

	22 may 2012


Onlayn ictimai-siyasi qəzet

Kriminal

DAHA BİR VƏZİFƏLİ ŞƏXS RÜŞVƏT ALANDA TUTULDU

2012-02-21

Veteranlar Birliyinin sədri də eyni əmələ görə həbs edildi

Baş Prokurorluq korrupsiya və rüşvətxorluğa qarşı mübarizə çərçivəsində həyata keçirilən növbəti həbslər barədə məlumat yayıb. Məlumata görə, vətəndaş Ağayev Əlifağa Dədəkişi oğlu Baş Prokuror yanında Korrupsiyaya Qarşı Mübarizə İdarəsinin (KQMİ) “161 - qaynar xətt” əlaqə mərkəzinə müraciət edərək Xəzər rayonunda fəaliyyət göstərən, özünəməxsus “Halal ərzaq” mağazasında Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi (DƏM) xidmətinin 1 saylı region üzrə DƏM-in vəzifəli şəxsləri tərəfindən aparılmış yoxlama zamanı əməyin mühafizəsi üzrə müəyyən edilmiş pozuntularla bağlı tərtib olunan protokola uyğun inzibati xəta ilə əlaqədar cərimənin tətbiq olunmaması üçün həmin müfəttişliyin rəis müavini Dəmirov Teyyub Umud oğlunun ondan 1500 manat rüşvət tələb etdiyini bildirib.

Həyata keçirilmiş əməliyyat tədbirləri nəticəsində T.Dəmirov fevralın 18-də xidməti otağında Ə.Ağayevdən 1500 manatı rüşvət kimi alarkən KQMİ əməkdaşları tərəfindən cinayət başında tutulub. T.Dəmirov pulu prokurorluq əməkdaşlarına təqdim edib və hal şahidlərinin iştirakı ilə götürülərək rəsmiləşdirilib. T.Dəmirov CM-in 311.1-ci (rüşvət alma) maddəsi ilə məsuliyyətə cəlb edilib və barəsində məhkəmə qərarı ilə həbs tədbiri seçilib.
“Mübariz” Müharibə Veteranlar Birliyinin sədri Seymur Şirinov da eyni əmələ görə həbs edilib. Baş Prokurorluqdan APA-ya bildirilib ki, Bakı sakini KQMİ-yə müraciət edərək iş stajının hesablanması və əlillik dərəcəsinin təyin olunmasını vəd edən S.Şirinovun ondan 2000 manat rüşvət tələb etdiyini bildirib. S.Şirinov fevralın 17-də birliyin Bakıdakı inzibati binasında xidməti otağında vətəndaşdan 2000 manatı rüşvət kimi alarkən KQMİ əməkdaşları tərəfindən cinayət başında saxlanılıb. S.Şirinov həmin pulları prokurorluq əməkdaşlarına təqdim edib və hal şahidlərinin iştirakı ilə rəsmiləşdirilib.
S.Şirinovun yaşadığı mənzilə baxış keçirilərkən oradan ayrı-ayrı şəxslərə məxsus 5 ədəd əmək kitabçası, şəxsiyyət vəsiqələrinin surətləri, 6 ədəd “Müharibə veteranı”, 2 ədəd “Mübariz” Müharibə Veteranlar Birliyinin üzvlük vəsiqələri, fiziki şəxs kimi özünün adına olan möhür və iş üçün əhəmiyyət kəsb edən sair sənəd və əşyalar götürülüb. S.Şirinov CM-in 311.1-ci (rüşvət alma) maddəsi ilə məsuliyyətə cəlb edilib və barəsində məhkəmə qərarı ilə həbs tədbiri seçilib.

Xəbər xidməti

3738 dəfə baxılıb