67 SAYLI MƏKTƏBDƏKİ YANĞIN SÖNDÜRÜLÜB

	12 fevral 2012


Onlayn ictimai-siyasi qəzet

Kriminal

67 SAYLI MƏKTƏBDƏKİ YANĞIN SÖNDÜRÜLÜB

2010-03-10

Bakının Sabunçu rayonunda 67 saylı orta məktəbin binasında baş verən yanğın söndürülüb.

APA-nın hadisə yerində olan əməkdaşının məlumatına görə, yanğının söndürülməsində 20-yə yaxın yanğınsöndürən maşın iştirak edib.

Fövqəladə Hallar Nazirliyinin Dövlət Yanğından Mühafizə Xidmətinin qərargah rəisi Əkbər Novruzovun bildirdiyinə görə, yanğın məktəb binasının 500 kvadrat metr ərazisini əhatə edib. Əsasən binanın tavanına ciddi ziyan dəyib. Yanğın nəticəsində xəsarət alan olmayıb.

Hazırda yanğının baş vermə səbəblər araşdırılır.

Məktəbin direktoru İradə Bayramova jurnalistlərə açıqlamasında bildirib ki, 3 mərtəbəli binanın 3-cü mərtəbəsi tamamilə sıradan çıxıb. Direktor qeyd edib ki, buna baxmayaraq sabahdan dərslərin bərpa olunması, şagirdlərin təhsillərini rayonun digər orta məktəblərində davam etdirmələri qərara alınıb.

Qeyd edək ki, yanğın bu gün saat 17.50 radələrində qeydə alınıb. Bakı Şəhəri üzrə Təhsil İdarəsinin (BŞTİ) İctimaiyyətlə əlaqələr sektorunun müdiri Zəminə Əliqızının APA-ya verdiyi məlumata görə, hadisə baş verən vaxt məktəbdə 1000 məktəbli olub: “Həmin məktəb Bakının ən köhnə məktəblərindən biridir, təxminən ötən əsrin 25-30-cu illərində tikilib. İlkin məlumatlara görə, yanğın məktəbin 3-cü mərtəbəsindən başlayıb və dam örtüyünə keçib. Məktəb 3 növbəlidir. Yanğın başlayan zaman 3-cü mərtəbədə xoşbəxtlikdən şagirdlər olmayıb. Aşağı mərtəbələrdə olan 1000-ə qədər məktəbli isə dərhal evakuasiya olunub”.
Z. Əliqızı bildirib ki, məktəb son illərdə əsaslı təmir olunmayıb. Hazırda bu məktəbdə 2400 uşaq təhsil alır: “Ən son məlumata görə, məktəbin bütün binası sıradan çıxıb. Hətta məktəbin sənədləri də yanıb”.

2500 dəfə baxılıb