CƏLİLABADDA MƏKTƏBLİNİ ÖLÜMCÜL DÖYÜBLƏR

	13 fevral 2012


Onlayn ictimai-siyasi qəzet

Kriminal

CƏLİLABADDA MƏKTƏBLİNİ ÖLÜMCÜL DÖYÜBLƏR

2010-09-05

Cəlilabad rayonunda məktəblini ölümcül döyüblər. Adnalı kənd sakini, 15 yaşı Nuriyev Amil Qulam oğlu naməlum şəxslərin basqınına məruz qalıb. Bu barədə “Yeni Müsavat”a məktəblinin yaxınları məlumat verib.

A.Nuriyev sentyabrın 1-də saat 18:00 radələrində Bədirli kəndində yaşayan tanışlarına tərəvəz toxumu aparıb. Sonra qərara alıb ki, göyərçin satan uşaqlarla da görüşsün. Amil onlardan 8 baş göyərçini alıb və öz kəndlərinə qayıtmaq üçün yola çıxıb. Yaxınlarının dediyinə görə, Amil evə gələrkən yolda bir nəfər arxadan yaxınlaşaraq dəyənəklə onu vurub. A.Nuriyev yerə yıxılıb, zərbə ağır olduğundan ayağa dura bilməyib: “Qaranlıq olduğu üçün Amil onu vuranların kim olduğunu görə bilməyib. Amil qışqıraraq kömək istədikdə isə həmin şəxslərdən biri əli ilə onun ağzını tutub”.
Zərərçəkənin yaxınlarının sözlərinə görə, naməlum şəxslər A.Nuriyevi dəyənək və təpiklə döyüb. Yoldan keçən maşının sürücüləri onları gördüyündən naməlum şəxslər qaçıblar. A.Nuriyevin yerdə ağır vəziyyətdə olduğunu görən bir sürücü onu evlərinə aparıb. Yaxınları deyir ki, A.Nuriyev vəhşicəsinə döyüldüyü üçün hadisənin bəzi məqamlarını xatırlamır. Cəlilabad rayon xəstəxanasında ona ağır kəllə-beyin travması diaqnozu qoyulub. Döyülən yeniyetmənin yaxınları deyir ki, sentyabrın 3-də A.Nuriyevin vəziyyəti ağırlaşdığı üçün o, Bakıya gətirilərək əməliyyat olunub: “Əməliyyat 8 saat çəkdi. Həkimlər Amilin başında qan yığıntısı, kəllə qapağında geniş çat yarandığını dedi. Onun vəziyyəti hazırda ağır olaraq qalır”.
Faktla bağlı Cəlilabad Rayon Polis Şöbəsində araşdırma aparılır. Hadisə ilə bağlı saxlanılan yoxdur. A.Nuriyev döyüldüyü kənddəki orta məktəbin 7-ci sinfində oxuyur.

S.KAZIMLI

691 dəfə baxılıb