YAŞAR NURİ VƏ QƏDİR RÜSTƏMOVUN HƏYATINA TƏHLÜKƏ QALIR

	22 may 2012


Onlayn ictimai-siyasi qəzet

Mədəniyyət

YAŞAR NURİ VƏ QƏDİR RÜSTƏMOVUN HƏYATINA TƏHLÜKƏ QALIR

2011-11-16

Xalq artistlərinin səhhətində irəliləyiş yoxdur

Mərkəzi Gömrük Hospitalının reanimasiya şöbəsində həkim nəzarətində olan xalq artisti Yaşar Nuri ağciyər çatışmazlığı diaqnozu ilə müalicə olunur. İstanbulun «Acıbadəm» xəstəxanasının reanimasiya şöbəsində saxlanılan Q.Rüstəmov isə hələ də komadadır.

Azərbaycanın xalq artisti, görkəmli aktyor Yaşar Nuri 1951-ci ildə Bakıda aktyor Məmmədsadıq Nuriyevin ailəsində doğulub. 10 yaşından Azərbaycan televiziyasında uşaq verilişlərində çəkilib və teatr səhnələrində uşaq rollarını ifa edib. İncəsənət İnstitutunun dram və kino aktyorluğu fakültəsini bitirib. Akademik Milli Dram Teatrında 1974-cü ildə işlədiyi vaxtdan indiyədək ən müxtəlif obrazlar yaradıb. “Hacı Qara”, “Dəli Yığıncağı”, “Ölülər”, “Müsyö Jordan və Dərviş Məstəli Şah”, “Lənkəran xanının vəziri”, “Od gəlini”, “Sevil”, “Mirzə Şəfi Vazeh”, “Arşın mal alan” kimi klassik tamaşalarda rol alıb. 60-dan çox bədii, 25 qısametrajlı, 3 çoxseriyalı filmlərdə xarakterik rollar ifa edib. “Bəyin oğurlanması”, “Yol əhvalatı” filmlərindəki obrazları, “Kökdən düşmüş pianino”, “Yaşıl eynəkli adam”, “Səni axtarıram”-"Səndən xəbərsiz" televiziya tamaşalarında oynadığı baş rollarla seyrçilərinin daha çox sevimlisinə çevrilib. Mütəxəssislərin fikrincə, istər teatrda, istərsə də kino və telekrandakı Y.Nurinin yaratdığı rollar həcmindən asılı olmayaraq tamaşanın “ağırlıq nöqtəsi”nə dönür. Elə buna görə də ötən il İstanbul Memorial Xəstəxanasında ağır əməliyyat keçməsinə baxmayaraq, Bakıya qayıtdıqdan sonra aktyor məhsuldar işlədi, bir çox yaddaqalan obrazlar yaratdı. Hətta “Bacanaqlar” teleserialında rolunu davam etdirdi, “Kukla” teatrında Soltan bəy obrazını yeni üslubda təqdim etdi. Görünür, bu məhsuldarlığa da aktyorun səhhəti dözmədi.
Qədir Rüstəmov isə 1935-ci ildə Ağdam rayonunda doğulub və muğam musiqisinin mərkəzi sayılan rayonda xanəndə kimi yetişib. Azərbaycan Dövlət Musiqi Məktəbində ustad-xanəndə Hacıbaba Hüseynovdan muğam dərsləri alıb, sonradan Ağdamda təhsilini davam etdirib. Fərqli, özünəməxsus, məlahətli ifa tərzi onu məşhurlaşdırıb. İfasında bir sıra muğam dəstgahları - “Rast”, “Çahargah” lentə alınaraq radionun fondunda saxlanılır. “Sona bülbüllər” mahnısı isə onun ifasında xüsusilə sevilir. Lakin “Neyçün gəlməz” və “Dilə bəndəm” mahnılarını da məhz Q.Rüstəmovun ifasında sevə-sevə dinləyənlər az deyil. Ustad muğam ifaçılarının bildirdiyinə görə, Q.Rüstəmov bütün registrlərdə səs keyfiyyətini nümayiş etdirməyi bacarır.
Q.Rüstəmovun hələ yeniyetmə yaşlarında müəyyən səbəblərə görə bir böyrəyi əməliyyat edilərək götürülüb. Bir aya yaxındır ki, beyin şişindən Türkiyədə əməliyyat olunub, hələ də koma vəziyyətindədir.
Ölümlə mübarizədə olan hər iki sənətkarın səhhətlərində hələ ki, müsbət dəyişiklik nəzərə çarpmır. Amma həm yaxınları, həm də pərəstişkarları xalq artistlərinin sağalacaqlarını böyük ümidlə gözləyirlər. Biz də hər iki sənətkara Allahdan şəfa diləyirik!

S.ÜNAL

686 dəfə baxılıb