QƏDİR RÜSTƏMOVLA YAŞAR NURİNİN SƏHHƏTİNDƏ İRƏLİLƏYİŞ YOXDUR

	22 may 2012


Onlayn ictimai-siyasi qəzet

Mədəniyyət

QƏDİR RÜSTƏMOVLA YAŞAR NURİNİN SƏHHƏTİNDƏ İRƏLİLƏYİŞ YOXDUR

2011-12-06

İlhamə Quliyevanın da səhhətində problem yaranıb

Xalq artistləri, sevilən sənətçilər, aktyor Yaşar Nuri və xanəndə Qədir Rüstəmovun səhhətində irəliləyiş yoxdur. Hazırda Mərkəzi Gömrük Hospitalında reanimasiya şəraitində olan Y.Nurinin həyat yoldaşı Rəhimə Nuriyevanın APA-ya bildirdiyinə görə, həkimlərin cidd-cəhdlərinə baxmayaraq, Y.Nurinin səhhətində yaxşılaşma hiss edilmir.

“Hətta Türkiyədən çağırılmış həkim də bildirdi ki, bu vəziyyətdə onu təyyarəyə mindirib, İstanbula aparmaq olmaz. Həkimlər reanimasiyaya daxil olmağıma icazə vermirlər, ona görə özüm də narahatam” deyən R.Nuriyeva aktyorun pərəstişkarlarından ona dua etməyi xahiş edib: “Ailə üzvləri olaraq ancaq Allahın mərhəmətinə sığınmışıq. Onu sevən hər kəsdən dua etməyi rica edirəm. Allah möcüzə göstərsin və Yaşar yenidən tam sağlamlığına qovuşsun”.
Xatırladaq ki, aktyorun səhhəti ötən ilin sentyabrından qəflətən pisləşib və o vaxtdan Y.Nuri Bakıda və Türkiyədə uzun müddət müalicə edilib.
Q.Rüstəmovun həyat yoldaşı Fatma Rüstəmovanın isə bildirdiyinə görə, xanəndənin səhhətində cüzi dəyişikliklər var. Belə ki, Q.Rüstəmovun orqanlarının, qan dövranının fəaliyyətdə olması onlara ümid verir: “Oğlum Rüstəmlə Qədirin yanına gedib onunla danışırıq. Əlindən tutub, ona sağalacağını deyəndə reaksiya verir. Daxili orqanları da, beyni də işləyir və bu bizə ümid verir. Həkimi deyir ki, problem yalnız Qədirin şüurunun ayılmamasındadır”.
Qeyd edək ki, Q.Rüstəmovun huşsuz vəziyyətdə olmasına aldığı radioaktiv müalicələrin səbəb olduğu bildirilirdi. Lakin F.Rüstəmova milli.az-a bildirib ki, həkimlər səbəbi xəstədə herpers virusunun aşkarlanmasında görürlər: “İndi bu problemin nə zaman həllini tapacağını bilmirik. Amma qərar vermək olduqca çətindir və biz ən ağır günlərdə belə ümidimizi üzmürük. Həkim də bildirir ki, Qədir yaşamaq istəyir və bunun üçün bütün orqanizmi mübarizə aparır. Qədir ölmək istəmir, o sağalacaq”.
Xalq artisti İlhamə Quliyevanın səhhətində də problem yaranıb. Lent.az-ın məlumatına görə, xalq artisti hazırda Moskvadakı xəstəxanaların birində müalicə olunur. Hətta Moskvada yaşayan və fəaliyyət göstərən azərbaycanlı müğənnilərdən bir çoxu İlhamə Quliyevanı xəstəxanada ziyarət edib. Müğənninin mətbuat katibi Faiq Ələkbərli xəbər portalına açıqlamasında İ.Quliyevanın hazırda Moskvada olduğunu təsdiqləyib, lakin əlavə edib ki, xalq artisti Rusiya paytaxtına səhhəti ilə bağlı getməyib: “İlhamə xanım Moskvadadır. Hər il olduğu kimi, bu il də o, sanatoriyalardan birində dincəlməyə gedib. Bir həftədən sonra Bakıya qayıdacağı gözlənilir”.

NƏRGİZ

1757 dəfə baxılıb