RÖYA “AZERCELL”i PROKURORLUĞA VERDİ | Mədəniyyət

	22 may 2012


Onlayn ictimai-siyasi qəzet

Mədəniyyət

RÖYA “AZERCELL”i PROKURORLUĞA VERDİ

2011-12-21

Şirkətdən isə müğənninin ittihamlarının əsassız olduğu bildirilir

Müğənni Röya Ayxanın mətbuat katibi və hüquqi işlərdə səlahiyyətli nümayəndəsi Ülviyyə Alovlunun qəzetimizə bildirdiyinə görə, müğənni baş prokurorluğa şikayət edib. Müğənni mahnılarından və adından icazəsiz istifadəyə görə “Azercell” şirkətindən baş prokuror Zakir Qaralova şikayət ərizəsi ünvanlayıb. Ü.Alovlunun bildirdiyinə görə, bu qanun pozuntusu artıq 10 ildir ki davam edir: “Röyaya vurulan ziyan ödənilməyincə, biz hüquqlarımızın bərpasını tələb edəcəyik”.

Qeyd edək ki, Z.Qaralova müraciətdə bildirilir ki, müğənninin ifa etdiyi mahnılar “Zəngimcell” xidmətlərində onun razılığı olmadan istifadə edilir və “Müəlliflik hüququ və əlaqəli hüquqlar haqqında qanunun 15-ci (Əmlak (iqtisadi) hüquqları) maddəsinin 3-cü bəndinə əsasən onun müəllif hüququ pozulub və ona külli miqdarda maddi və mənəvi zərər vurulur. Buna görə də müğənni baş verən qanun pozuntularının aradan qaldırılmasını və aidiyyəti qurumların məsuliyyətə cəlb olunmasını xahiş edib.
“Azercell Telekom” MMC-nin Korporativ Ünsiyyət bölümünün rəhbəri Ülviyyə Həsənzadə isə bildirib ki, müğənninin şirkətdən narazılıq etməsinin heç bir əsası yoxdur: ““Azercell”in “Zəngimcell” xidmətini göstərməsi üçün lisenziyası yoxdur və bu işləri başqa şirkət həyata keçirir. Röya xanım da həmin şirkətə müraciət etməlidir. Müğənninin komandası ilə də bu haqda danışıb, onları başa salmışıq. Bir daha deyirəm, bu məsələdə Röya xanımın “Azercell”i məhkəməyə verməyə heç bir əsası yoxdur".
2003-cü ildən mobil rabitə bazarında “Zəngimcell”də, istifadə olunmasını təşkil edən “Unimark” şirkətdən bildirildi ki, onlar artıq xeyli vaxtdır ki, bu xidmət istiqamətində provayder fəaliyyətini dayandırıblar. Müəllif Hüquqları Agentliyinin şöbə müdiri Xudayat Həsənli isə bildirdi ki, təşkilat olaraq onlar bu problemin araşdırılması üçün dəfələrlə aidiyyəti qurumlara müraciət ediblər, lakin problemin həlli çözülməmiş qalıb: “Tək Röya deyil, onlarla sənət adamının bu istiqamətdə hüquqları pozulur. Mən mətbuat vasitəsilə bir daha bəyan edirəm, bu xidmətdən gələn gəlir konkret olaraq hər müəllifin öz hesabına ödənməlidir, agentlik pul yığımı ilə məşğul deyil. İzi itirmək üçün bizim agentliyin hesabına nəinki manatla, qəpiklə müəyyən vəsait köçürülüb, lakin qəbul etməmişik. Bu məbləğ öz hesablarına qaytarılıb” . X.Həsənli bildirdi ki, konkret olaraq “Unimark”ın iddiası ilə bağlı problem araşdırılıb, tutarlı faktlarla mətbuata təqdim ediləcək.

SEVİL

3672 dəfə baxılıb