“EUROVİSİON 2012" MÜSABİQƏSİNİN ARENASININ DAMI HAZIRDI

	22 may 2012


Onlayn ictimai-siyasi qəzet

Mədəniyyət

“EUROVİSİON 2012" MÜSABİQƏSİNİN ARENASININ DAMI HAZIRDI

2012-01-11

Arenanın damının quraşdırılmasına 2400 ton metal sərf olunub

Bakıda “Eurovision 2012" müsabiqəsinin keçirilməsi ilə bağlı tikinti işləri bir qədər də sürətləndirilib. Artıq Bayıl yamacında əlavə bərkitmə işlərinə başlanılıb və hazırda ərazidə park salınır. Eyni zamanda mahnı müsabiqəsinin keçiriləcəyi məkana gedən yolun ətrafında yenidənqurma işlərinə start verilib. Bayıl yamacında uzun illərdən bəri fəaliyyət göstərən ”40 pilləkən" də yenidən qurulur. “Eurovision 2012" mahnı müsabiqəsinin keçiriləcəyi arenanın tikintisində çalışan mühəndisin deməsinə görə, artıq ”Baku Crystal Hall" çoxfunksiyalı arenanın damının quraşdırılması başa çatıb.

Məlumata görə, Dövlət Bayraq Meydanının yaxınlığında tikilən arenanın damının sağ tərəfi ötən ilin sonlarında, sol tərəfi isə bazar ertəsi quraşdırılıb. Damın hər bir yarısı təxminən 1200 tondur. Kompleksin tikinti prosesində iştirak edənlərin sayı 500 nəfərə yaxındır.
Ümumilikdə “Baku Crystal Hall”un tikintisi üzrə bütün işlər qrafikə uyğun aparılır.
Xatırladaq ki, Azərbaycanın Əmlak Məsələləri Dövlət Komitəsinin Bakıda Dövlət Bayrağı Meydanında yeni idman-konsert kompleksinin tikintisi üzrə elan etdiyi tenderin qalibi Almaniyanın məşhur “ALPİNE Bau Deutchland AG” şirkəti olub.
“ALPINE Bau Deutschland AG” şirkəti 100 faizli “ALPINE Bau Group” şirkətinin törəməsidir.
“ALPINE Bau Deutschland AG” şirkətinin layihə üzrə tərəfdaşı “gmp International GmbH”, İsveçrənin “Nüssli AG” və “Basler & Hofmann AG”, eləcə də Avstriyanın “GmbH & Co. KG” və “SSF Ingenieure AG” şirkətləridir.
Azərbaycan təmsilçiləri Eldar Qasımov və Nigar Camal (Ell/Nikki) “Eurovision 2011" mahnı müsabiqəsinin qalibi olublar.

SEYMUR

8115 dəfə baxılıb