AYGÜN KAZIMOVANIN QARDAŞI HƏBS OLUNUB | Mədəniyyət

	22 may 2012


Onlayn ictimai-siyasi qəzet

Mədəniyyət

AYGÜN KAZIMOVANIN QARDAŞI HƏBS OLUNUB

2012-01-14

Kazım Kazımzadə dələduzluqda günahlandırılır; xalq artisti “mənim hansısa işim olanda, məgər, buna qardaşım qarışır?” deyir

Xətai Rayon Polis İdarəsi cinayət-axtarış şöbəsinin əməkdaşları vətəndaşların etibarından sui-istifadə edən Kazımzadə Kazım Ələsgər oğlunu saxlayıb. Paytaxtın bir neçə rayonunda bina tikintisi ilə məşğul olan Kazım Kazımzadə bir mənzili bir neçə nəfərə sataraq vətəndaşların pulunu mənimsədiyi üçün məsuliyyətə cəlb edilib. Xətai RPİ-nin baş əməliyyat müvəkkili Anar Süleymanov K.Kazımzadənin Hövsan qəsəbəsində də həyət evləri tikmək adı ilə vətəndaşların pulunu aldığını deyib.

Qeyd edək ki, aldadılan mənzil sahibləri tərəfindən idarəyə daxil olan çoxsaylı şikayət ərizələri əsasında Kazım Kazımzadə barəsində hələ 2011-ci ildə cinayət məcəlləsinin dələduzluq maddəsi ilə cinayət işi başlanılıb. Amma həmin vaxt şübhəli şəxsi istintaqa cəlb etmək mümkün olmadığından onun barəsində axtarış elan edilib. Kazım Kazımzadənin dələduzluq yolu ilə aldatdığı insanların sayının artacağı da istisna edilmir.
Anar Süleymanov Kazımzadənin əməllərindən zərər çəkən şəxsləri bu barədə Xətai Rayon Polis İdarəsinə müraciət etməyi məsləhət bilib.
Faktla bağlı Xətai Rayon Polis İdarəsinin cinayət-axtarış şöbəsində toplanan materiallar artıq istintaqa təqdim edilib. Kazım Kazımzadənin dələduzluq yolu ilə nə qədər vətəndaşı aldatdığı və dəyən ziyanın ümumi miqdarı aparılan araşdırmalardan sonra bəlli olacaq.
Bir maraqlı məqamı da qeyd edək ki, cinayət məcəlləsinin dələduzluq maddəsinin bir neçə bəndi ilə ittiham olunan Kazımzadə Kazım Ələsgər oğlu respublikanın xalq artisti Aygun Kazımovanını qardaşıdır.
Aygün Kazımova milli.az-a eksklüziv açıqlamasında bunları deyib: “Xəbəri mən də saytlardan oxudum. Və az əvvəl yuxudan oyandığım üçün baş verən hadisənin təfərrüatları barəsində məlumatsızam. Açıqlamaya gəldikdə isə bir şey demək istəyirəm: mənim hansısa işim olanda, məgər, buna qardaşım qarışır? Biznesmen adamdır və başına iş gəlib. Əlbəttə ki, gün ərzində məsələ ilə maraqlanacağam. Yazılan xəbərlər də ki, sensasiyalı başlıqla dərc olunur: "Aygün Kazımovanın qardaşı həbs olundu". İndi o, mənim qardaşım olmasaydı, bu söhbət bu dərəcədə şişməyəcəkdi axı. Bir daha bəyan edirəm ki, biz bir-birimizin işinə qarışmırıq. Əgər uşaq olsaydı, başqa məsələ. Qardaşım yetkin insandır, onun ailəsi, öz işi, mənim həyatım ayrı. Heç vaxt bir-birimizə hesabat vermirik. Amma dediyim kimi, maraqlanacağam. Və yəqin ki, açıqlamam olacaq. Bəzi jurnalistlərdən bir təvəqqem var ki, reytinq naminə özlərindən “araşdırma” uydurmasınlar".

NƏRGİZ

11865 dəfə baxılıb