YALNIZ ORUC TUTMAQ DA SAVABDIR | Mənəviyyat

	22 may 2012


Onlayn ictimai-siyasi qəzet

Mənəviyyat

YALNIZ ORUC TUTMAQ DA SAVABDIR

2009-08-22

Kənan Rövşənoğlu: “Biri təkcə oruc tutursa onu alqışlamaq lazımdır, o da özünü hazır bildiyi işi yerinə yetirir”

İslamın insan üçün buyurduğu ən gözəl ibadətlərdən biri olan orucla bağlı müxtəlif yanaşmalar var. Məsələn, elə adam var ki, oruc tutur və bununla da özünü bütün günahlardan qurtulmuş hesab edir. Maraqlıdır, yalnız oruc tutmaq kifayətdirmi? Insanlar nə etməlidir ki, çəkdikləri əziyyət prosedur kimi yox, ibadət kimi qəbul olunsun? Ümumiyyətlə, oruc tutan şəxs daha hansı ayinləri icra etməlidir?

İlahiyyatçı Kənan Rövşənoğlunun sözlərinə görə, oruc tutan şəxs mütləq 9 ayini icra etməlidir. O ki qaldı “yalnız oruc tutmaq qəbul olunurmu” sualına, həmsöhbətimiz bildirdi ki, Allah-Təala tərəfindən müsəlmanlara buyurulan 10 ibadətin biri Ramazan ayında oruc tutmaqdır: “İlin digər vaxtlarında da oruc tutmaq olar. Nəzir orucu, savab orucu, həmçinin mübarək günlər var ki, həmin günlərdə oruc tutmaq olar. Amma Ramazan ayında heç bir xüsusi niyyət olmadan, yalnız Allahın buyruğunu yerinə yetirmək üçün oruc tutulmalıdır. Təbii ki, istisnalar var, səhhəti imkan verməyənlərə, süd verən analara müəyyən güzəştlər var. Bəzən deyirlər ki, filankəs namaz qılır, oruc tutur dindardır. Dindarlığın göstəricisi təkcə namaz, oruc deyil, daha 8 əməl var ki, müsəlman ona əməl etməlidir. Onların içində Həcc ziyarəti, insanın nəfslə mübarizəsi, pislikdən çəkindirib yaxşılığa dəvət etmək və s. var. Oruc tutub amma namaz qılmayan, Həccə getməyən adamlara demək olmaz ki, sənin oruc tutmağın olmaz. Təbii ki, Allahın buyruğu hamısını yerinə yetirməkdir. Lakin biri təkcə oruc tutursa onu da alqışlamaq lazımdır, o da bacardığı, özünü hazır bildiyi işi yerinə yetirir”.
Həmsöhbətimiz bildirdi ki, oruc tutan lazım olan ayinləri - qida qəbul etməmək, cinsi əlaqədə olmamaq, istimna, qatı toz udmamaq, sübh azanına qədər vacib qüsullu qalmamaq, qəsdən qusmamaq, imalə etməmək, yalan danışmamaq - yerinə yetirsə onun orucu ibadət kimi qəbul olunur.

HƏBİBƏ

928 dəfə baxılıb