POLIS MANSHET | Mətbuat_bugün

	23 may 2012


Onlayn ictimai-siyasi qəzet

Mətbuat bugün

POLIS MANSHET

2011-12-15

Yasamal rayon prokuroru Həsrət Pirməmmədov APA-ya açıqlamasında bu hadisə ilə bağlı CM-in 125 (özünü öldürmə həddinə çatdırma) və 228-ci (qanunsuz olaraq odlu silah saxlama) maddələri ilə cinayət işi açıldığını və istintaqın davam etdiyini deyib. Prokuror bildirib ki, hadisənin hansı şəraitdə baş verdiyi hələ məlum deyil. Araşdırmalar zamanı N.Ələkbərovun öldürülməsi faktı təsdiqini tapsa, cinayət işi qəsdən adam öldürmə maddəsinə tövsif oluna bilər.

Olay yerinə ancaq bu ofisin qarşısından yol keçir

Bu arada mərhumun ölümü ilə bağlı yeni xəbərlər yayılıb. Hüquq-mühafizə orqanlarından APA-ya verilən məlumatda bildirilir ki, sabiq polis polkovnik-leytenantı N.Ələkbərov Bakının Nəsimi rayonunda yaşayıb. Ailə üzvlərinin istintaqa verdiyi ifadəyə görə, N.Ələkbərov dekabrın 14-ü saat 01:30-da evdə kompyuterdə işləyirmiş. Hələlik istintaqa məlum olmayan səbəbdən o, ailə üzvlərinə də heç bir söz demədən evdən çıxıb. Bunu görən mərhumun həyat yoldaşı ondan hara getdiyini soruşub. N.Ələkbərov isə narahatlığa əsas olmadığını, bir azdan qayıdacağını deyib. Həyat yoldaşı deyib ki, əri evdən çıxmazdan öncə onun mobil telefonuna zəng gəlib. Təxminən iki saat sonra - saat 03:30 radələrində N.Ələkbərovun meyiti Ə.Cəmil küçəsi, 83 saylı binanın qarşısında tapılıb. Onun başından aldığı güllə yarasından öldüyü müəyyənləşib. Mərhumun meyitinin yanında “Makarov” tipli tapança da aşkarlanıb. Hadisənin bu silahla törədildiyi bildirilir. İlkin ehtimala görə, mərhum yaşadığı evdən meyitinin tapıldığı ünvana taksi, yaxud başqa maşınla gedib.
Hüquq-mühafizə orqanlarından verilən məlumata görə, mərhumla bağlı bütün detallar araşdırılır. Araşdırmaların sonunda N.Ələkbərovun intihar etməsi, yaxud qətlə yetirilməsi müəyyən olunacaq. N.Ələkbərov Daxili İşlər Nazirliyinin 2 saylı poliklinikasının rəisi olub və bir neçə il əvvəl təqaüdə çıxıb.

Hadisə baş verən yer

Dünən əlavə məlumat toplamaq üçün olay yerinə getdik. Hadisənin baş verdiyi ərazinin yaxınlığında həyət evləri ilə yanaşı 17 mərtəbəli yeni inşa edilmiş yaşayış binası da var. Meyitin aşkar edildiyi yer bu binanın yuxarı (4-cü mərtəbədən başlayaraq-red.) mərtəbələrində yaşayanlar tərəfindən asanlıqla görünür. Bundan əlavə, olay yeri oradakı həyət evlərinin qarşısı sayılır. Bu evlərin darvazasından küçəyə çıxan şəxslər oranı yaxın məsafədən görə bilərdi. Qətl (əksər versiyalara görə, mərhumu öldürüblər-red.) avtomobil qarajının qarşısında törədilib. Ora tökülən qan ləkələri bunu deməyə əsas verir. Olay yeri isə qaranlıq olmur, qarajın qapısının üstündə lampa yanıb. Eyni zamanda həyət evlərinin darvazasındakı və binalardakı işıqlar da ora düşüb.

Şübhəli məqamlardan biri də hadisə baş verən yerdən təxminən 10-15 metr kənara da qan ləkələrinin dağılmasıdır. Qarajın qarşısına gedən yolda - hadisə yerinin 10 metrliyində də qan izləri var. Ətrafda yaşayan şəxslər hadisə haqda ətraflı məlumata malik olmadıqlarını bildirdi. Söhbət etdiyimiz sakinlər həmin gecə güllə səsi eşitmədiklərini dedilər. Onu da öyrəndik ki, bu hadisə ilə bağlı yaşayış binasının mühafizəçisi polis idarəsinə aparılıb və orada dindirilir. Mühafizəçinin oturduğu otaq sözügedən qarajın arxasında yerləşir. Yəni hadisə baş verən əraziyə getmək üçün ancaq ofisin qarşısından keçmək lazımdır. Bu ofisdən mühafizəçinin polis idarəsinə aparılmasını təsdiqlədilər. Oradan bildirdilər ki, mühafizəçi gecə saatlarında liftlərdə adamların qalıb-qalmamasını, sayğacları yoxlamaq və digər təhlükəsizlik məsələləri ilə bağlı binaya bir neçə dəfə daxil olur. Ofisdən dedilər ki, hadisə zamanı da mühafizəçi yaşayış binasının zirzəmisində olub. Bu səbəbdən də hadisənin necə baş verdiyini görməyib və güllə səsi eşitməyib. Mühafizəçinin keçmiş polis əməkdaşı olduğu deyilir.
Hadisə yerində apardığımız müşahidələr nəticəsində mərhumun intihar etməsi versiyasının zəif olduğu qənaətinə gəlmək olar. Belə ki, N.Ələkbərovun Nəsimi rayonundakı evindən çıxıb intihar etmək üçün Yasamal rayonundakı əraziyə getməsi şübhə doğurur. Onu da deyək ki, hadisə yeri gecə saatlarında adamların az hərəkət etdiyi ərazidir. Oradan ancaq ətrafda yaşayan sakinlər keçə bilər. Yaxınlıqda isə 5 həyət evi var. O evlərin görünüşündən də imkanlı şəxslərə məxsus olduğu hiss edilir. Bu baxımdan mərhumun orada intihar etməsi versiyasından daha çox qətlə yetirilməsi ehtimalı inandırıcı sayıla bilər. Bundan əlavə, N.Ələkbərovun başqa yerdə öldürülüb meyitinin ora atılması versiyası da səsləndirilir.

Bu arada qafqazinfo.az saytı qətlə yetirilən şəxslə bağlı maraqlı bir faktı təqdim edib. Məlumata görə, N.Ələkbərov 2003-cü ildə 2 saylı poliklinikanın həkim-rentgenoloqu Nigar Əhmədbəyovaya əxlaqsız təklif edərək onu ələ almaq istəyib. N.Əhmədbəyovanın həyat yoldaşı, polis mayoru Emin Əhmədbəyov məsələ ilə bağlı baş həkimlə mübahisə edib və DİN-ə müraciət edəndən sonra baş həkim yox, onun özü işdən azad edilib.
2006-cı ildə isə N.Ələkbərov vəzifə səlahiyyətlərindən sui-istifadə edərək itini N.Əhmədbəyovanın yanına apararaq heyvanı rentgendən keçirməyi tələb edib. Məsələdən xəbər tutan daxili işlər naziri Ramil Usubov N.Ələkbərovu vəzifəsindən azad edərək Emin Əhmədbəyovu yenidən polis orqanlarına bərpa edib. Amma E.Əhmədbəyov həmin vaxt 2003-2006-cı illərdəki əməkhaqqı və ona dəymiş ziyan ödənmədiyindən məhkəmələrə müraciət edib. Məhkəmə isə onun iddiasını rədd etdiyi üçün E.Əhmədbəyov Avropa İnsan Haqları Məhkəməsinə müraciət ünvanlayıb. Avropa Məhkəməsi mayorun şikayətini icraata qəbul etdikdən sonra E.Əhmədbəyov yol polisi əməkdaşı ilə mübahisə etdiyi əsas gətirilərək həbs edilib.

202 dəfə baxılıb