“AZƏRBAYCAN” NƏŞRİYYATI KÖÇMÜR, UÇUR...

	23 may 2012


Onlayn ictimai-siyasi qəzet

Media

“AZƏRBAYCAN” NƏŞRİYYATI KÖÇMÜR, UÇUR...

2012-01-25

Direktor müavini Səbuhi Quliyev: “Bu binanın ciddi təmirə ehtiyacının olduğu göz önündədir”

İrili-xırdalı yüzlərlə qəzetin toplaşdığı “Azərbaycan” nəşriyyatının boşaldıldığı barədə məlumatlar ciddi rezonans doğurub. Məlumata görə, artıq rəsmi qəzetlər nəşriyyatı tərk edir, digər qəzetlər də köçməyə hazırlaşır. Səbəb nəşriyyatın binasının əsaslı təmirə bağlanmasıdır.

Xəbərlərə görə, “Bakraboçiy” qəzeti “Xalq qəzeti”nin redaksiyasına köçür. “Azərbaycan” qəzetinin baş redaktoru Bəxtiyar Sadıqov isə bildirib ki, onlara harada yerləşəcəkləri barədə hələlik heç nə deyilməyib: “Gerçək odur ki, bu nəşriyyat dağılıb. Üfunət iyi verir. Ona görə də buranın əsaslı təmirə ciddi ehtiyac var. Harada yerləşəcəyimiz barədə hələlik bir şey deyilməyib. Amma onu deyim ki, belə bir köç gözümüzə durub. Böyük problem olacaq”.

“Hələ gündəlikdə köçürülmə, yaxud təmirlə bağlı planlar yoxdur”

Dünən nəşriyyata baş çəkib qəzetlərin köç əhval-ruhiyyəsi ilə maraqlandıq. Məlum oldu ki, köçürülmə xəbəri qəzetləri o qədər də narahat etmir. Orada olarkən nəşriyyat rəsmilərinin təmirlə bağlı bir-birini təkzib edən fikirləri ilə qarşılaşdıq. Nəşriyyatın ümumi məsələlər üzrə direktor müavini Səbuhi Quliyev köçürülmə ilə bağlı sualımıza sualla cavab verdi: “Bu barədə sizə kim məlumat verib?”
S.Quliyevin sözlərinə görə, köçürülmə, yaxud qəzetlərin nəşriyyatdan çıxarılması barədə yazılanlar düz deyil: “Gündəlikdə hələ belə planlar yoxdur. Düzdür, nəşriyyatın əsaslı təmiri üçün ötən il müraciət edilib. Bununla bağlı layihənin smeta dəyəri də hesablanıb. Ancaq bizə təmirlə bağlı hələ bir söz deyilməyib. Mən mətbuatda bununla bağlı baş redaktor Bəxtiyar Sadıqovun fikirlərinə rast gəlmişəm. Ona zəng etdim, dedi ki, fikirləri yanlış anlaşılıb”.

S.Quliyev dedi ki, təmir olsa, bu, qəzetlər nəşriyyatdan çıxarılmadan ediləcək: “Təmir olsa, bu qədər qəzeti çölə tökməyəcəyik ki. Yəqin bir çıxış yolu tapılacaq. Nəşriyyatın ciddi təmirə ehtiyacının olduğu isə göz önündədir”.
4-cü mərtəbənin yarısını tutan “Azərbaycan” qəzetindən isə köçlə bağlı sualları cavablandırmaq istəmədilər. Qəzetin əməkdaşları baş redaktorun təklifini çatdırdı: “Nəşriyyatdan soruşsanız, yaxşı olar”.
“Bakı xəbər” qəzetinin əməkdaşları isə deyir ki, nəşriyyatda təmir gözlənilir: “Bunu nəşriyyatın direktor müavini Bəsti İsmayılova da təsdiqləyib. O deyib ki, təmir işləri hissə-hissə aparılacaq, təmir bütün nəşriyyatın işini dayandırmayacaq. Bu səbəbdən biz köçməyə hazırlaşmırıq”.
Qəzetin baş redaktoru Aydın Quliyev də ona nəşriyyat rəhbərliyi tərəfindən köçürülmə ilə bağlı heç nə deyilmədiyini söylədi.
Qəzet təmsilçiləri deyir ki, onlar 2012-ci il üçün icarə müqaviləsi də bağlayıblar: “Köçürülmə olacaqdısa, niyə bir illik müqavilə bağlanırdı?”

Akif Aşırlı: “Şəraitimiz həddindən artıq pisdir”

“Şərq” qəzetinin baş redaktoru Akif Aşırlı da köçürülmə xəbərini mətbuatdan oxuyub. O, təmiri vacib hesab edir: “Nəşriyyat bərbad gündədir. Şəraitimiz həddən artıq pisdir. Lift işləmir, koridorlar üfunət qoxuyur, otaqlar soyuqdur, əməkdaşlar soyuq otaqlarda tez-tez xəstələnir. Burada işləmək, qəzet çap etmək qəhrəmanlıqdır. Sağlamlığımızın hesabına qəzet çıxarırıq. İşıq zəifdir, o səbəbdən printer normal işləyə bilmir. Stablizator almaq fikrindəyik ki, problemi qismən həll edək. Vəziyyət çox ağırdır. İl yarım əvvəl nəşriyyatın təmiri barədə söhbət yayılsa da nəticə olmadı. O vaxt bunun üçün dövlət tərəfindən vəsait ayrılacağı deyilirdi. Bir müddət keçdi, gəlib otaqları ölçdülər, çertyojunu çəkib getdilər. Onların gedişindən 6 ay keçib. Biz bu il üçün müqavilə bağlamışıq. Kirayə götürdüyümüz otaqlara görə ayda ödədiyimiz konkret məbləğ də var - 650 manat”.

“Bakı xəbər”in əməkdaşları da köçməyə hazırlaşmır

Nəşriyyatın 9-cu mərtəbəsində təmirsiz otaqlarda qərarlaşan “Azadlıq” qəzetinin əməkdaşları da köçmək barədə düşünmür. Qəzetin redaktorları Sücəddin Şərifov və Alı Rza redaksiya rəhbərliyinə nəşriyyat tərəfindən köçürülmə ilə bağlı hər hansı xəbərdarlığın edilmədiyini bildirdi. Qəzetin əməkdaşları isə deyir ki, onlar köç əhval-ruhiyyəsində deyillər, həmişəki kimi işləyirlər. Həmkarlarımız onu da dedilər ki, binada təmir olmadan da buradan məmnuniyyətlə çıxarlar, ancaq qəzetin başqa yerdə ofis tutmağa maddi imkanı yoxdur.
“Ədalət” qəzetinin baş redaktoru İradə Tuncay da deyir ki, nəşriyyatın təmiri barədə rəsmi məlumat almayıblar. Bu səbəbdən də köçməyə hazırlaşmırlar. İ.Tuncayın fikrincə, “Azərbaycan” Nəşriyyatı başdan-ayağa əsaslı təmir olunmalıdır: “Təmir edilməsi çox yaxşı olardı. Təkcə divarların təmir olunmağının tərəfdarı deyiləm. Mən nəşriyyata məbəd kimi baxıram. Çünki çox gənc vaxtlarımdan burada olmuşam, binanın tikilməyi gözümün qabağında olub. Atam Məmməd Araz burada, ikinci mərtəbədə işləyib. Mənə o vaxt elə gəlirdi ki, bu bina məbəddir, burada işləyənlər də hamısı kahindir. Hər halda, içindən xəbərim olmasa da üstü-başı təmiz, səliqəli insanlar idi, ziyalı insanlar idi. İndiki pis durum o zaman yox idi. İndi nəşriyyatın adı pis çıxıb. Ona görə məncə, mənəvi mühiti təmizləmək lazımdır. Özüm neçə illər bununla mübarizə apardım. Ayıbdır, Azərbaycana yaraşmayan şeylər baş verir burada”.
Qeyd edək ki, “Azərbaycan” Nəşriyyatı 1974-cü ildən fəaliyyət göstərir. Ölkədəki ən böyük mətbəə-nəşriyyat komplekslərindən biri olan bu nəşriyyat uzun illər istismarda olsa da onun binası indiyədək əsaslı təmir olunmayıb. Bir neçə il öncə nəşriyyatda çoxrəngli qəzet çapı sexi fəaliyyətə başlasa da, onun binasının xarici görkəmi təzələnib təmir olunsa da daxili infrastruktur şəbəkəsi müasir tələblərə cavab vermir. Xüsusən də dəhlizlərin, redaksiya otaqlarının vəziyyəti, sanitar qovşağın bərbad durumu, liftlərin tez-tez xarab olması buranın əsaslı təmirini zəruri edib.

R.RƏFİYEVA

450 dəfə baxılıb