AZƏRBAYCAN DAHA BİR AZADLIQ SİYAHISINDA GERİLƏDİ

	23 may 2012


Onlayn ictimai-siyasi qəzet

Media

AZƏRBAYCAN DAHA BİR AZADLIQ SİYAHISINDA GERİLƏDİ

2012-01-26

“Sərhədsiz reportyorlar” ölkəmizin 179 ölkə arasında 162-ci yerdə olduğunu bəyan etdi

“Sərhədsiz reportyorlar” yanvarın 25-də illik “Mətbuat azadlığı indeksi”ni açıqlayıb. Azərbaycan bu cədvəldə 179 ölkə arasında 162-ci yerdə qərar tutub və ötən illə müqayisədə 10 pillə aşağı düşüb. Qurum bəyan edib ki, 2011-ci ildə dünyada mətbuat azadlığı ilə bağlı bəzi dəyişikliklər olub. Təşkilat bu sırada “ərəb baharı”nın rolunu xatırladır: “Ərəb ölkələrindəki proseslər avtoritar ölkələrin mətbuatla davranışına təsir edib” (“Azadlıq” radiosu).

“Sərhədsiz reportyorlar”ın 10-cu hesabatında deyilir ki, hələ də hökumətlər mətbuat və informasiya üzərində nəzarətə davam edirlər. Ayrı-ayrı ölkələrdə medianın durumunu təhlil edən təşkilat Azərbaycanla bağlı yazır: “İlham Əliyevin despotik rejiminin tərəddüd etmədən vətəndaşları həbsə atdığı bir ölkədə həbs olunanların sayında dramatik artım var. Bu ölkədə müxalifyönlü jurnalistləri oğurlayırlar. Demokratiya tələbi ilə keçirilən etirazların qarşısı zorakılıqla alınandan sonra Azərbaycan ”Mətbuat azadlığı indeksi"ndə geriləyib. Belarus və Azərbaycan prezidentləri Aleksandr Lukaşenko və İlham Əliyev hər ikisi mətbuat azadlığının qənimidir. Belarusda 100-dən çox jurnalist və bloqçu tutulub. Azərbaycan da eyni üsuldan istifadə edib və sosial şəbəkələrdə söz və ifadə azadlığından istifadə edən bloqçuları həbsxanaya atıb".
Cədvəldə Azərbaycanın qonşuları İran istisna olmaqla digərləri ondan yuxarı pillədə qərar tutub: Rusiya 142, Ermənistan 77, Gürcüstan 105, Türkiyə 148-ci yerdədir. Ötən ildə Qırğızıstanda mətbuat azadlığında vəziyyət yaxşılaşdığından ölkə 10 pillə yuxarı qalxıb və 109-cu yerdə qərarlaşıb. Siyahıya Finlandiya rəhbərlik edir, ən sonuncu pilləni isə Eritreya tutur. Keçmiş SSRİ respublikası olan Estoniya isə 3-cü yerdədir.

Sevinc TELMANQIZI

334 dəfə baxılıb