“GÜNƏBAXAN”ın YARADICISI VERİLİŞİ TƏNQİD ETDİ

	23 may 2012


Onlayn ictimai-siyasi qəzet

Media

“GÜNƏBAXAN”ın YARADICISI VERİLİŞİ TƏNQİD ETDİ

2012-01-26

Turan İbrahimov: “Xalqı efirdən qovmağa heç kimin ixtiyarı yoxdur”

ANS telekanalının keçmiş teleaparıcısı Turan İbrahimov yenidən ekranlara qayıdacaq. Bu barədə bizə açıqlamasında T.İbrahimov dedi. Onun sözlərinə görə, ANS-dən gedəndən sonra ona bəzi telekanallardan maraqlı layihə təklifləri gəlib. Bu təklifləri dəyərləndirən İbrahimov diqqətini iki layihəyə cəmləşdirib: “İndi telemövsümün ortasıdır. Bir az seçim qarşısında qalmışam. Hazırda verilişin formatı barədə dəqiqləşmə gedir. Bu mərhələ bitəndən sonra konkret qərar veriləcək. O zaman da açıqlama verə bilərəm”.

T.İbrahimovdan vaxtilə yaradıcısı və aparıcısı olduğu verilişlə - “Günəbaxan”la bağlı düşüncələrini də soruşduq. O dedi ki, verilişlə bağlı yaşananları mətbuat vasitəsilə izləyir. T.İbrahimov verilişi açan və onu reytinqə çatdıran biri kimi dedi ki, onun əvvəlki və indiki imici arasında yerlə göy qədər fərq var: “Tamaşaçı və aparıcı kimi bunu aydın görürəm. Aparıcı olduğum vaxt veriliş daha çox sosial yönümlü idi. Ancaq həftənin cümə günü əyləncə xarakterli olurdu. Qalan 4 gündə sosial mövzuları müzakirəyə çıxarır, dövlətçilik həddini qoruyaraq heç kimin heç yerdə danışa bilmədiyini danışırdıq. Bu, həm də mənin rolum idi. Mənə buna görə zənglər, təzyiqlər gəlirdi, bəzən rəhbərlik hansısa mövzuya icazə vermirdi. Məhkəmələrlə, vergi sistemi ilə bağlı müzakirələr olurdu. Həm xalqın xeyrinə olurdu, həm də dövlət xəttinə uyğun idi. ”Günəbaxan"ın əsası qoyulanda şou xarakterli veriliş idi. Mən onu sosial yönümlü verilişə çevirdim. Bu gün insanların etirazı da sırf indiki verilişin mənim vaxtımdakına uyğun gəlməməsi ilə bağlıdır".
T.İbrahimov dedi ki, bu gün küçədə gedərkən tamaşaçılar da ona yaxınlaşıb verilişin indiki formatı ilə bağlı öz fikir və etirazlarını bildirir. O, ötən həftə aparıcı İlqar Mikayıloğlunun studiyadan taksi sürücülərini qovmasına da münasibət bildirdi. Dedi ki, bu, televiziyanın qızıl qanunudur: “Studiyadan qonağı qovmaq təcrübəsi televiziya tarixində olub. Amma bir şərtlə ki, xalqı ordan qovmaq olmaz. Bir-iki dəfə mənim təcrübəmdə də olub. Məsələn, ilk dəfə müğənni Xuraman Şuşalını verilişdən qovmuşam. Çünki o verilişdə bir nəfər öz taleyindən danışırdı. Xuraman isə o insan danışanda onun həyatına, problemləri barədə dediklərinə gülməyə başladı. Bir neçə dəfə xəbərdarlıq etsəm də bundan nəticə çıxarmadı və gülməyə davam elədi. Bu zaman tamaşaçılara hörmət əlaməti olaraq o müğənnini studiyadan qovmağa məcbur oldum. Çünki o, başqasının heysiyyəti ilə oynayırdı. Bir dəfə də başqa bir xanım studiyaya gəlmişdi, öz səhvi barədə qürurla danışırdı. Bu da tamaşaçılar tərəfindən ikrahla qarşılanırdı. Onu da studiyadan çıxarmağa məcbur oldum. Amma taksi sürücüləri ilə bağlı məsələdə mənzərə fərqlidir. Sən xalqı öz problemlərindən danışmağa çağırırsansa, o, ağzını açıb danışanda sözünü kəsib studiyadan qova bilməzsən”.
T.İbrahimov xatırlatdı ki, Türkiyə kanallarında bu cür yanlış davranışa görə bir neçə aparıcı işdən qovulub. Onun sözlərinə görə, efirdən hətta dövlət rəsmisini də qovmaq olar, əgər o, tamaşaçının, insanların hüquqlarını pozan, onları aşağılayan fikir səsləndirirsə: “Xalqın, ictimaiyyətin əleyhinə danışanları qovmaq olar. Əgər mən də taksi sürücülərini qovsaydım, bu, yanlış olardı. Kür daşqınları mövzusu gündəmdə olanda zərərçəkənləri studiyaya çağırmışdıq. Əsəblər gərgin idi, vətəndaşların içindən yersiz danışanlar da vardı. Amma nəbadə kimisə ordan qovasan. Bir aparıcı kimi o emosiyaları sakitləşdirmək də mənim vəzifəm idi, efiri idarə etmək də. Biz xalq üçün çalışırıqsa, onu efirdən qovmağa heç bir haqqımız yoxdur”.

Sevinc TELMANQIZI

2758 dəfə baxılıb