YENİ KÖŞKLƏRDƏ QƏZET SATIŞINA MANEƏLƏR DAVAM EDİR

	23 may 2012


Onlayn ictimai-siyasi qəzet

Media

YENİ KÖŞKLƏRDƏ QƏZET SATIŞINA MANEƏLƏR DAVAM EDİR

2012-01-28

Mətbuat yayımı firmaları həyəcan təbili çalır, BŞİH-in sözçüsü isə cavab verməkdə çətinlik çəkir

Bakıda və regionlarda yeni köşklərinin quraşdırılması qəzet yayımının azalması və bu sahədə ciddi problemlərin yaranması ilə müşayiət olunur. Belə ki, bu köşklərdə qəzet tapmaq elə də asan deyil. Əslində qəzetdən başqa hər şey tapmaq mümkündür desək, daha doğru olar. Belə ki, burada istənilən şirniyyat məmulatları, müxtəlif növ siqaretlər, uşaq oyuncaqları, meyvə şirələri, hətta bəzilərində bujiteriya malları da tapmaq olar. Bu hal isə köşkü daha çox ərzaq malları mağazasına bənzədir.

“Yeni Müsavat” qəzetinə müraciət edən oxucular bildirir ki, sözügedən köşklərdə hansısa gündəlik, yaxud təzə qəzet tapmaq müşkülə çevrilib: “Ya vaxtı keçmiş, ya da informasiya xarakterli olmayan krossvord, əyləncə xarakterli qəzetlərə rast gəlinir. Müxalifət qəzetləri isə ümumiyyətlə, satılmır”. Digər tərəfdən, paytaxtda yeni köşklər qurulmaqla yanaşı, əvvəldən fəaliyyət göstərən köşklər götürülür. Burada əsas zərər qəzetlər və redaksiyaların üzərinə düşür. Hazırda “Qasid”, “Qaya” və “Azərmətbuatyayımı”nın köhnə köşklərini götürürlər.
Yeni köşklərin kimə məxsusluğuna gəlincə, yayılan məlumatlarda Bakı Şəhər İcra Hakimiyyəti göstərilir. Amma qurum bu köşkləri sahibkarlara icarəyə verir. Belə ki, “28 May” metrosu yaxınlığındakı köşklərin birinin satıcısı bizimlə söhbətdə köşkü icarə ilə işlətdiklərini dedi. Onun sözlərinə görə, onlar qəzetdən çox gündəlik tələbat olan mallara üstünlük verir.
“Qasid” mətbuat yayımının direktor müavini Ağaəli İsmayılov “Yeni Müsavat”a açıqlamasında bildirdi ki, yeni köşklərin çoxuna qəzet verilir: “Bizim bu köşklərə tabeçiliyimiz yoxdur. Bizim yayım firmasında qeydiyyatdan keçən köşklər hər gün bizdən qəzet götürür. Amma qeydiyyatdan keçməyən köşklər də var. Onlar qəzet aparmırlar. Yeni köşklərdə qəzet satışına əngəllə bağlı məsələni biz də araşdırırıq”. “Qaya” mətbuat yayımı firmasının rəhbəri Xanhüseyn Əliyev də yeni köşklərə qəzet verdiklərini bildirdi. Onun sözlərinə görə, yeni köşklərin 6-sına gündəlik qəzetlər verilir. Yeni köşklərdə qəzet satışının azlığına gəlincə, X.Əliyev dedi ki, bu köşklərdə qəzet satışına üstünlük verilməməsi, qəzetdən gələn gəlirlərin satıcılara cəmi 5 faiz verilməsi ilə bağlıdır: “Buna görə də, onlar qəzet satışında maraqlı deyillər. Amma biz əsas üstünlüyü qəzet satışına veririk və ondan gələn gəlirlərin yüksək faizi öz satıcılarımıza çatır”.
“Azərmətbuatyayımı” ASC-nin sədri Süleyman Salmanov isə yeni köşklərə qəzet vermədiklərini dedi. Onun sözlərinə görə, həmin köşklərə qəzet verilməsi ilə bağlı heç bir təklif almayıblar: “Bizim yeni köşklərlə heç bir əlaqəmiz yoxdur. Həmin köşklərdə qəzet satışına əngəl yaradılması barədə eşitmişəm. Ancaq bizim bu köşklərlə iş birliyimiz olmadığı üçün bir söz deyə bilmərəm”. S.Salmanov qeyd etdi ki, “Azərmətbuatyayımı” ASC-nin paytaxtda beş köşkü var. Onların da bəzisi artıq götürülüb.
Bakı Şəhər Ticarət və Xidmət Departamentinin mətbuat xidmətinin rəhbəri Əlabbas Bağırov isə deyir ki, bu şikayətlər ona da tanışdır. Amma o, həmin köşklərdə müxalifət qəzetlərinin satılmasının şahid olub.
Qeyd edək ki, qəzetlərin yayımı əvəzinə ticarətlə məşğul olan yeni köşklərin fəaliyyəti KİV məhsullarının yayımına maneə törətdiyi üçün qanuna da ziddir. Belə ki, “KİV haqqında” Qanunun 26-cı maddəsinə görə, məhkəmənin qərarı yoxdursa, kütləvi informasiya vasitəsi məhsulunun yayılmasına mane olmağa, o cümlədən onun tirajının, yaxud tirajının bir hissəsinin müsadirə edilməsinə yol verilmir.

Günay MUSAYEVA

506 dəfə baxılıb