PAYTAXTDA ƏLYAYIMININ FƏALİYYƏTİ İFLİC OLUB

	23 may 2012


Onlayn ictimai-siyasi qəzet

Media

PAYTAXTDA ƏLYAYIMININ FƏALİYYƏTİ İFLİC OLUB

2012-01-28

Mətbuat Şurası isə problemin səbəblərini hələ də araşdırıb başa çatdırmayıb

Paytaxtda qəzetlərin əlyayımı ilə məşğul olan satıcıların fəaliyyəti faktiki olaraq iflic edilib. Artıq əlyayımı ilə məşğul olan ondan çox insan işə çıxmır. Əlyayımına Bakı Şəhər İcra Hakimiyyəti (BŞİH)tərəfindən qoyulan qadağaya daha çox paytaxtın mərkəzi küçələrində rast gəlinir. Yaranmış vəziyyət mətbuat vasitələrinin satışına və maddi durumuna çox ciddi və mənfi təsir edir. Mətbuat Şurasının (MŞ) qəzet satışı sahəsindəki vəziyyəti öyrənən qrupu isə hələ əlyayımı problemlərinin səbəblərini araşdırır.

Qrupun üzvü, MŞ-nın sədr müavini Umud Rəhimoğlu “Yeni Müsavat”a açıqlamasında əlyayımla bağlı yaranmış problemin həlli istiqamətində işlərin görüldüyünü bildirdi: “İşlər görülür. Vüqar Rəhimzadə ilə də məsləhətləşmişik, bu istiqamətdə müəyyən işlər görülüb. Müəyyən görüşlər, zənglər olub, danışıqlar aparmışıq. İstəmirəm bəri başdan geniş danışım. Hər halda, bütün problemləri, məlumatları bir yerə toplamağa çalışırıq. Şura sədri Əflatun Amaşov xaricdə səfərdədir, onun gəlişini gözləyirik. Gələn kimi məsələ yenidən gündəmdə olacaq”.
U.Rəhimoğlunun sözlərinə görə, əlyayımı ilə məşğul olan firmalar lisenziya almaqla problemin həllinə çalışa bilərlər: “VÖEN almaqla, işlərini qanuni çərçivəyə salmaqla yayım firmalarının problemini həll etmək olar. Mətbuat Şurası səlahiyyət sahibi deyil ki, hər hansı məsələ ilə bağlı ciddi bir qərar qəbul etsin. Bu məsələyə bir qədər geniş yanaşmaq üçün qərara alındı ki, problem hərtərəfli öyrənilsin. Şuranın rəhbərliyinin burada olması arzu olunur. Bu qrupda Vüqar Rəhimzadə ilə mənəm. Əslinə qalanda, böyük, yetərli komanda deyilik ki, problemi yetərincə araşdıraq. Bu sahə ilə məşğul olan adamlarla birlikdə məsələ araşdırılmalıdır”.
Qrupun digər üzvü “İki sahil” qəzetinin baş redaktoru Vüqar Rəhimzadə isə qeyd etdi ki, əlyayımı probleminin öyrənilməsi istiqamətində proses gedir: “Əflatun Amaşov gəldikdən sonra müzakirələrə davam edəcəyik”.
Qeyd edək ki, MŞ qəzet satışı sahəsindəki vəziyyəti öyrənmək üçün 2010-cu ildə yaratdığı qrupun fəaliyyətini bu il yanvarın 16-da bərpa edib. Qrupun iki üzvü var. Səbəb paytaxtda əlyayımına qoyulan qeyri-rəsmi qadağadır. Qrupu ilk iclası yanvarın 18-də keçirilib.

R.RƏFİYEVA

343 dəfə baxılıb