PİŞİK GÜNEL, ARAZ ƏLİZADƏ VƏ ANS-in OBYEKTİV QƏRƏZİ...

	23 may 2012


Onlayn ictimai-siyasi qəzet

Media

PİŞİK GÜNEL, ARAZ ƏLİZADƏ VƏ ANS-in OBYEKTİV QƏRƏZİ...

2012-01-31

Telekanal yazılı mətbuata qarşı gözdənsalma kampaniyası başladıb; əsas hədəf “Yeni Müsavat”dır

Son zamanlar ANS telekanalında “Yeni Müsavat”a və digər çap KİV-lərinə qarşı qərəzli kampaniya aparılması müşahidə edilir. Belə ki, bir neçə gün öncə ANS-in efirində yayımlanan “Günəbaxan” verilişində taksi sürücülərinin studiyadan qovulmasından sonra həmin qalmaqal barədə məlumat verən KİV-lərə qarşı televiziyanın aşağılayıcı və qərəzli kampaniya başlayıb.

Günel Ələkbərova Hər halda, artıq bizdə belə bir təəssürat yaranıb ki, ANS-dəki hörmətli həmkarlarımız istənilən fürsət və məqamda bizi ictimai rəydə “vurmağa” amadə dayanıblar.
Yanvarın 29-da ANS-də canlı yayımlanan “Bazar səhəri Rövşanə ilə” verilişində də “Yeni Müsavat”a qarşı açıq-aşkar böhtan xarakterli iddialar səsləndirilib. Həmin verilişdə “Yeni Müsavat”ın əməkdaşı Samir Kazımlının ötən ilin oktyabr ayının 3-də Şamaxı sakini Təhminə Nuhovanın şikayəti əsasında hazırladığı “ANS-in ”Hökm" verilişinin hakimi dələduzluqda suçlanır", başlığı ilə çap olunan yazı müzakirəyə çıxarılıb və canlı yayımda “Yeni Müsavat”ın ünvanına şər-böhtan atılaraq, qəzeti gözdən salmaq cəhdləri edilib.
Məlumat üçün bildirək ki, adıçəkilən yazıda ittiham olunan Zülfiyyə Babayevanın da mövqeyi öyrənilərək, “”Hökm" verilişinin hakimi ittihamlara cavab verdi", başlığı ilə qarşı tərəfinin mövqeyi kimi “Yeni Müsavat”da çap edilib.
Verilişin aparıcısı Rövşanə Bektaşi çalışırdı ki, verilişə qonaq kimi dəvət edilən ASDP-nin həmsədri Araz Əlizadənin, “pişik” ləqəbli müğənni Günel Ələkbərovanın və digər qonaqların da “dəstəyini” alaraq, “Yeni Müsavat”ı efirdən qeyri-peşəkar qəzet kimi təqdim etsin. Müxbirimiz S.Kazımlını da telefonla ANS-in canlı yayımına qoşsalar da, ona suallara cavab verməsi, mövqe bildirməsi üçün tam şərait yaradılmayıb və məhz həmin məqamda verilişə reklam salınıb. Reklamdan sonra isə əməkdaşımızı telefon xəttindən ayırıblar. Onun yerinə özünü Rauf kimi təqdim edən bir şəxsi canlı yayıma qoşublar və məhz onun dili ilə “Yeni Müsavat”ı və S.Kazımlını təhqir etdiriblər. Şübhələr var ki, həmin “Rauf” veriliş müəlliflərinin özlərinin adamıdır; verilişə bəlkə də studiyadan qoşulub. “Rauf” qəzetimizi və müxbirimizi söyməklə bərabər, haqlı olduğunun, qəzetimizin “daim böhtan yazmasının” sübutu kimi nazir Ziya Məmmədovun və onun oğlu Anar Məmmədovun “Yeni Müsavat”ı cərimələtməsi faktını söyləyib.
S.Kazımlı bu yazını hazırlayan müxbirimizə bildirib ki, ona verilən suallar əslində tərəfli və qərəzli idi; jurnalist tərəfsizliyini qətiyyən əks etdirmirdi: "Studiyada olan Pişik Günellə Araz Əlizadə də media “eksperti” kimi qeybət xarakterli söhbətlər edir və mənə prokuror kimi, sanki istintaq qarşısında imişəm kimi, suallar verirdilər. Rövşanə Bektaşi isə olduqca aqressiv idi; suallara cavab bildirməyimə belə imkan vermirdi. Buna görə də mən efirdə ona iradimi bildirdim və danışmağıma şərait yaratmasını tələb etdim. Sonra da araya reklam salıb, məni efirdən ayırdılar".
“Yeni Müsavat”ın baş redaktoru Rauf Arifoğlu isə müxbirimizə deyib ki, ANS-in, onun efirində gedən verilişlərin müəlliflərinin qəzetlə, onun xəbər siyasəti ilə bağlı iradları varsa, bu siyasəti müəyyən edənlərlə danışsınlar: “ANS-in rəhbərliyi, əməkdaşları tərəfindən şəxsən mənim özümün, partiya yoldaşlarımın, digər media quruluşlarına rəhbərlik edənlərin barəsində xeyli sayda verilişlər, aşağılayıcı reportajlar hazırlanıb və yayımlanıb. O zaman ”qarşı tərəf, obyektivlik meyarı" harada qalmışdı? Niyə məni, Eynullanı, İsa Qəmbəri və başqalarını üzərimizə atılan böhtanlar, cinayət iddiaları, təhqirlərlə bağlı heç danışdırmadılar, sonradan üzr də istəmədilər? İndi ayılıblar, səhv tutmağa başlayıblar? Qəzetin rəhbərliyini çağırsınlar efirə, canlı yayına; hətta ştatlı “Rauf”larını da yığsınlar studiyaya; biz onlara gözlərindəki şalbanları, tirləri göstərək..."