“SƏYYAR SATIŞI GÖZƏLLİK BƏHANƏSİ İLƏ ƏNGƏLLƏYİRLƏR”

	23 may 2012


Onlayn ictimai-siyasi qəzet

Media

“SƏYYAR SATIŞI GÖZƏLLİK BƏHANƏSİ İLƏ ƏNGƏLLƏYİRLƏR”

2012-02-01

“Bəs köşklərin yığışdırılması, yeni köşklərdə qəzet satılmaması?”

“Qəzet satışına əngəllər qalır”. Fevralın 1-də “Media forum” saytına danışan “Yeni Müsavat” qəzetinin baş redaktorunun birinci müavini Azər Ayxan belə deyib. Yanvarın 18-də Mətbuat Şurasında kütləvi informasiya vasitələrinin təmsilçiləri və yayım firmalarının nümayəndələri ilə görüşdə mətbu nəşr satışı sahəsindəki problemlər müzakirə olunub. Toplantıda KİV və mətbuat yayımı firmaları rəhbərlərinin dövlət qurumlarının təmsilçiləri ilə görüşünün təşkil olunması qərara alınıb.

“Media forum”a açıqlamasında Azər Ayxan qeyd edib ki, Bakı Şəhər İcra Hakimiyyətinin başçısı Hacıbala Abutalıbovun göstərişi ilə qəzet satışına tətbiq olunan qadağa qüvvəsində qalır: “Bundan ən çox zərər çəkən müstəqil qəzetlər, o cümlədən “Yeni Müsavat” qəzetidir. Mətbuat Şurasında keçirilən görüşdə biz öz təkliflərimizi bildirdik. Əsas məsələlərdən biri də o idi ki, Hacıbala Abutalıbovla redaktorların görüşü olsun və bizə əsaslandırılmış şəkildə izah edilsin ki, səyyar satışa və köşklərin bərpasına nə üçün imkan verilmir. Əgər satış problemləri hansısa bir qanunsuzluqla izah edilərsə, biz bunu çevik bir şəkildə həll etməyə hazırıq. Səyyar satışın şəhərin estetik gözəlliyinə ziyan vurduğu deyilərsə, biz bunun yanlış fikir olduğunu isbat etməyə hazırıq. Şəhərin gözəlliyini pozan daha ciddi məsələlər var. Qəzet satışı həm də bir iş yeridir, minlərlə insan bu işlə dolanır. Ən əsası isə odur ki, səyyar satışın məhdudlaşdırılması söz azadlığının məhdudlaşdırılmasıdır. Səyyar satışı gözəllik bəhanəsi ilə əngəlləyirlər. Bəs köşklərin yığışdırılması, yeni köşklərdə qəzet satılmaması – bunu nə ilə əsaslandırırlar?”
Azər Ayxan vurğulayıb ki, qadağaların əsas məqsədi müstəqil mətbuatın fəaliyyətinə, inkişafına mane olmaqdır: “Jurnalistləri tuturlar, döyürlər, bu azmış kimi çap etdiyimiz qəzetlərin satışını da inzibati yollarla əngəlləyirlər. 2003-cü ildən müstəqil qəzetlərin redaksiyalarını şəhərin mərkəzindən çıxardılar, indi də qəzet satışını mərkəzdən tamamilə uzaqlaşdırırlar. Dövlətin nəzarətində olan “Qasid” firmasının köşklərinin də yığışdırılması o deməkdir ki, hökumətin müstəqil mətbuata, azad düşüncəyə, alternativ fikrə qarşı müharibəsi bitməyib, əksinə, daha qorxulu mərhələyə qədəm qoyub”.
Azər Ayxan iki həftə ötməsinə baxmayaraq Hacıbala Abutalıbovla redaktorların görüşünün olub-olmayacağı ilə bağlı Mətbuat Şurasından hələ bir cavab ala bilmədiklərini söyləyib. Bununla belə “Yeni Müsavat”ın baş redaktorunun birinci müavini arzuladıqları görüşlərin reallaşacağına ümidi itirmədiklərini vurğulayıb.

mediaforum.az

751 dəfə baxılıb