ÖLKƏ SABAHI QƏZETSİZ QARŞILAYACAQ

	23 may 2012


Onlayn ictimai-siyasi qəzet

Media

ÖLKƏ SABAHI QƏZETSİZ QARŞILAYACAQ

2012-02-02

Bakıda fevralın 2-də müşahidə olunan qarlı-çovğunlu hava şəraiti üzündən ölkə qəzetləri nəşrlərinə fasilə verib.

Bu haqda məlumatı “Media forum” saytına “Yeni Müsavat”dan qəzetin redaktoru Nazim Sabiroğlu verib. N.Sabiroğlu qeyd edib ki, fevralın 2-də Bakıda hökm sürən hava şəraitinə görə redaksiya əməkdaşlarının bir çoxu işə gələ bilməyib: “Bir yandan da xəbər agentliklərində, informasiya portallarında məlumat qıtlığı yaranıb. Ölkənin ictimai-siyasi həyatı donmuş vəziyyətə düşüb. Bu amilləri, eləcə də hava şəraiti üzündən qəzet yayımında ciddi problemlər yarandığını nəzərə alıb işə bir günlük fasilə verəsi olduq”.
“Azadlıq” qəzeti də eyni problemə görə fevralın 2-də çalışmamağa qərar verib. Qəzetin redaktoru Rövşən Hacıbəyli “Media forum”a deyib ki, fevralın 3-də “Azadlıq” köşklərə çıxmayacaq.
“Zerkalo”nun baş redaktoru Elçin Şıxlı sayta deyib ki, belə hava şəraitində çalışmağın mənası yoxdur: “Biz qəzeti hazırlayıb çapa versək belə, zəhmətimiz əlimizdə qalacaq. Çünki bu cür hava qəzetlərin yayımına olduqca mənfi təsir edib. 3 fevral sayımız çıxmayacaq. Redaksiyası bizimlə qonşuluqda olan “Exo” qəzeti də eyni qərarı verib”.
“525-ci qəzet”in baş redaktor müavini Yusif Rzayev, “Bizim yol” qəzetinin baş redaktoru Bahəddin Həziyev də nəşrə bir günlük fasilə verildiyini təsdiqləyiblər.
“Ədalət” qəzeti də fevralın 3-də köşklərə çıxmayacaq.

mediaforum.az

1261 dəfə baxılıb