“XURAL” QƏZETİ İLƏ BAĞLI MÜBHƏM FAKT MƏLUM OLDU

	23 may 2012


Onlayn ictimai-siyasi qəzet

Media

“XURAL” QƏZETİ İLƏ BAĞLI MÜBHƏM FAKT MƏLUM OLDU

2012-02-05

Anar Mahmudoğlu təhdidçi kimi iş yoldaşından şübhələnir
Nurəddin Xoca: “Anar Mahmudoğlu kimdir ki, kimsə də onu təhdid etsin?”

“Xural” qəzetinin baş redaktoru Əvəz Zeynallının həbsindən sonra qəzetin çapına da qadağa qoyuldu. Bundan sonra qəzet kollektivi “Asi” adlı yeni qəzet çıxarmağa təşəbbüs göstərdilər. Amma cəmi 1 nömrənin dərcindən sonra bu qəzetin də çapına imkan verilmədi. Üstəlik, xəbər yayıldı ki, qəzetin baş redaktoru Anar Mahmudoğlu, onun ailəsi və redaktoru Nurəddin Xoca naməlum şəxslər tərəfindən telefon vasitəsi ilə ölümlə təhdid edilirlər.

Redaksiya kollektivi bu təhdidlərlə bağlı mətbuata geniş açıqlama verdilər; eyni zamanda DİN və başqa quruluşlara şikayət yolladılar. Nəhayət, belə məlumat yayıldı ki, kollektiv özəl araşdırmalar nəticəsində bu işi çözüb. Və qəribə də budur ki, məsələni açdıqlarını desələr də, ifşa olunanın kimliyini net olaraq söyləmədilər. Sadəcə, bir sıra köşə yazılarında və kiçik açıqlamalarda bildirildi ki, telefonla Anar Mahmudoğlunun ailə üzvlərini təhdid edən kimdirsə, tanınan jurnalistlərdən biridir. Üstəlik, iddia olundu ki, həmin jurnalist telefonla təhdid zəngi edərkən müşahidə kameralarına düşüb; DİN-in yardımı ilə həmin görüntüləri “Xural”çılar da izləyə biliblər. Daha sonra o da iddia edildi ki, həmin jurnalisti güc nazirliklərindən biri himayə edir; bu səbəbdən də DİN onun ifşasını axıra çatdırmaqdan çəkinir.
Lakin kollektiv özü də bu jurnalistin kimliyini açıqlamaqdan çəkinir. Sadəcə, media cameəsinə məlumat ötürülüb ki, Anar Mahmudoğlunun ailə üzvlərini hədələyən və bunu güc nazirliklərindən birinin tapşırığı olaraq icra edən elə “Xural” qəzetinin əməkdaşlarından biri olub.
Bu söz-söhbətlərə və iddialara aydınlıq gətirmək məqsədi ilə A.Mahmudoğlunu danışdırdıq. O, müxbirimizə bunları dedi:
- Biz evimə zəng olunmuş taksafonun yaxınlığındakı nəzarət-müşahidə kameralarının yaddaşlarına baxmaq üçün daxili işlər naziri Ramil Usubova müraciət etmişdik. Cənab nazirin göstərişi ilə Nərimanov polisi, mən də daxil olmaqla, Jurnalist Təhqiqat Qrupunun üzvlərinə həmin müşahidə kamerasının yaddaşına baxmağa akt əsasında şərait yaratdılar. Biz də həmin video-görüntülərə baxıb tanıdığımız şəxs barədə akta qeydlərimizi yazdıq. Jurnalist təhqiqat qrupunun hesabatında da bu barədə qeydlər var. Buna kimi (video görüntülərə baxana qədər-E.M) bizdə zəng edənin kimliyi ilə bağlı müəyyən şübhələr vardı. Bu barədə təhqiqata məlumat vermişdik. Təhqiqatda həmin şəxsdən də ifadə də alıb. Amma bu məsələni ictimaiyyətdən gizlətdilər. Qeyri-rəsmi söhbətlərimizdən isə bəlli oldu ki, təhdid zəngini edən şəxs digər dövlət qurumuna bağlı şəxsdir. Buna görə də Daxili İşlər Nazirliyi həmin şəxslərin faş olunmasında o qədər də maraqlı deyil. Amma cinayətkarların kimliklərini müəyyənləşdirməyi bacardılar. Hazırda Nərimanov polisinin bu təhqiqat işi ilə bağlı qərarını gözləyirəm. Yanvarın 6-da bizə deyiblər ki, 5 günə qərarı bizə verəcəklər. Amma bu günə kimi verməyiblər. Biz hazırda Daxili İşlər Nazirliyinin bu məsələ ilə bağlı rəsmi açıqlamasını gözləyirik. Bu açıqlamadan sonra mətbuata məsələ ilə bağlı geniş açıqlama verəcəyik".
A.Mahmudoğlu onun ailə üzvlərini təhdid edən şəxsin “Xural”ın əməkdaşı olması barədə iddialara belə cavab verdi: “Bu suala nə hə, nə də yox cavabı verirəm”.
Təhdidlərdə adı çəkilən digər “Xural”çını - Nurəddin Hocanı da danışdırdıq. N.Hoca Anar Mahmudoğlunun və onun ailə üzvlərinin təhdid olunması iddiası barədə bunları dedi: “Bu, sadəcə diqqəti Əvəz Zeynallıdan yayındırmaq üçündür. Və kimlərsə də, özlərini reklam etmək istəyirlər. Anar Mahmudoğlu kimdir ki, kimsə də onu təhdid etsin? Niyə indiyə qədər onu təhdid emirdilər? "Azadlıq" qəzetində 50 min dəfə yazı yazıb. Kimdi axı o? Qənimət Zahidi, Rauf Arifoğlunu təhdid edə bilərlər. Axı Anar Mahmudoğlu hansı fiqurdur? Bu hansı məntiqə sığır?"
Bundan sonra aramızda belə bir dialoq oldu:

Müxbir:
- Axı onun təhdid olunması faktdır və bu, rəsmi təhqiqatla da təsdiqlənib.

N.Hoca:
- Mənə də zəng edən olub. Nə olsun? Anar Mahmudoğlunun mənimlə prinsipi çoxdan var idi.

- Hansı prinsipdən söhbət gedir?

- Siz “Asi” qəzetinə baxın, mən həmişə Əvəz Zeynalının tutulma məsələsində demişəm ki, biz kimlərinsə yanında olmamalıyıq. Hamı bizim yanımızda olmalıdır. Siz “Asi” qəzetinə baxsaz, görərsiz ki, bu, birbaşa “Azadlıq” qəzetidir. Buna görə onunla mübahisələrim olub. Mən yenə də deyirəm, “Xural” qəzetinə mən gələndən həmişə demişəm ki, biz heç kimin yanında olmayaq, hamı bizim yanımızda olsun. “Asi”ni mən buraxdım, amma bir də gördüm “Asi” “Azadlıq” qəzetidir.

- Mahmudoğlunun təhdid olunduğu taksafonun yaxınlığındakı videomüşahidə kameralarının yaddaşında sizin həmin taksofondan zəng etdiyinizin görünməsi barədə iddialar var...

- Mən də həmin videolara baxmışam. Mənim maşınım var orda. “Nərimanov”dur ora. Məgər siz orada olmursuz?

- Yox, olmuram. Niyə axı məhz sizin adınız hallanır?

- Anar Mahmudoğlunun mənimlə... nə bilim... Onun özündən soruşun.

- Aranızda bir pul söhbəti filan olmayıb ki?

- Nə pul? Pul söhbəti yoxdur. Mübahisələrimiz “Xural”ın, “Asi”nin xətti ilə bağlı olub. Əvəz Zeynallını həmişə müdafiə etmişəm. Bir də “Xural”da kollektiv olmayıb. Biz orda sadəcə dayanmışıq. Mən “Xural”ın hansısa siyasi “krılo”ya söykənməyinin tərəfdarı olmamışam. Qurtardı getdi. Anar Xalq Cəbhəsini ora soxurdu. Mən ona nəsə etmək istəsəydim, edərdim. Mən bozqurdam, hamı məni tanıyır. Mən ona zəng etməzdim. İkincisi də eləmişəmsə də, Anar mənim səsimi tanımır?

- Axı onun ailəsini təhdid ediblər.

- Yox onun özünü təhdid ediblər.

- Videogörüntülərdə olmağınızı təsdiq edirsiz?

- Yox, videoda mən olmamışam. Hansı videoda? Video-çəkiliş, telefon çəkilişi, elə bir şey yoxdur.

- Müşahidə kameralarının fiksə etdiyi videogörüntülərdə olduğunuzu deyirlər...

- “Qai”nin monitorunda sadəcə saat 12-də oradan mənim maşınımın keçdiyi var. Biz orada çayçıda oluruq çox vaxt. Bunu da hamı bilir.
Beləliklə, bu yazının sonunda aydın olur ki, haqqında söhbət gedən jurnalist “Xural”ın əməkdaşı N.Hocadır. Bunu A.Mahmudoğlu konkret söyləməsə də, Nurəddin Hoca özü açıqladı ki, iddialarda təhdidçi olaraq ondan şübhələnirlər; lakin bu, o deyil. Gerçəkdən də olduqca ilginc, heyrətamiz məqamdır. Həm də gerçəkliyə qovuşdurulmasına çox böyük ehtiyacı olan müəmmadır...

E.MƏMMƏDƏLİYEV

852 dəfə baxılıb