“... AİLƏM HƏTTA CİBUTİYƏ DƏ YERLƏŞƏ BİLƏR”

	23 may 2012


Onlayn ictimai-siyasi qəzet

Media

“... AİLƏM HƏTTA CİBUTİYƏ DƏ YERLƏŞƏ BİLƏR”

2012-02-07

Qənimət Zahid: “Hər şey Azərbaycan hökumətinin Fransa Senatının qərarına münasibətindən asılıdır”

“Azadlıq” qəzetinin hazırda Parisdə olan baş redaktoru Qənimət Zahid Fransa Senatının qondarma erməni soyqırımı ilə bağlı son qərarını şərh etdi. Baş redaktor bildirdi ki, Fransada yaşayan azərbaycanlıların bu məsələyə reaksiyası Azərbaycan hökumətinin mövqeyindən asılı olacaq.

“Əgər hökumətin reaksiyası sərt olsa, o halda burada da daha cəsarətli münasibət olacaq. Ola bilər ki, buradakı hansısa təşkilatlar, dərnəklər Sarkoziyə və ya hansısa başqa dövlət məqamlarına müraciətlər ünvanlasınlar. Açığı, bu məsələlər barədə məlumatlı deyiləm. Ona görə ki, bu kampaniyanın gedişində azərbaycanlıların müstəqil fəaliyyəti olmayıb. Onlar türk təşkilatları ilə birlikdə hərəkət edirlər və mənə elə gəlir ki, bu, ən doğru yoldur”.
Müsahibimizdən həmçinin bu qərar Fransada qəbul ediləndən sonra etiraz əlaməti olaraq başqa bir ölkəyə mühacirət edib-etməyəcəklərini də soruşdum. Baş redaktor dedi ki, bu qərar Fransada heç bir ciddi müqavimət olmadan qəbul olunarsa, o zaman növbəti mərhələdə istənilən Avropa ölkəsində də qəbul edilə bilər: “Mənim ailəmin buradan köçməsi, başqa bir ölkəyə getməsi bu cür mühüm əhəmiyyətli geosiyasi problemlərə ciddi təsir göstərə bilərsə, böyük məmnuniyyətlə onları hətta Cibutiyə də yerləşdirə bilərlər”.
Q.Zahidlə söhbət zamanı Fransada daha çox ermənilərin yaşaması faktına da toxunduq. Baş redaktordan mühacir azərbaycanlı ailəsi olaraq bunun onlara hansısa problem yaradıb-yaratmaması ilə maraqlandıq. Q.Zahid təsdiqlədi ki, Fransada ermənilərin çox olduğu deyilir: “Açığı, hələ məqsədli olaraq, bir erməni görüm deyə seyrə çıxmamışam və təsadüfən rast gəldiyin adamın da hansı millətə məxsus olduğunu müəyyən etmək çətindir. Çətin olmayan ərəbləri, zənciləri müəyyənləşdirməkdir və mənə elə gəlir ki, ərəblər daha çoxdur.
İkinci yerdə türklər ola bilər. Onları da müəyyən etmək asandır. Birincisi, ona görə ki, onlar hökmən hansısa obyekti işlədirlər və bu obyektin bir türkə məxsus olduğu brendindən bəlli olur. İkincisi də, danışıqlarını eşidirsən. Güman etmirəm ki, burada ermənilərin hansısa təhlükəsi olsun. Bura Avropadır. Əgər təhlükəli erməni varsa, deməli, o, kriminal ermənidir. Bu baxımdan kriminalla bağlı ərəblərin daha çox olduğu deyilir. Hərçənd mən bu nisbətə də təbii yanaşıram: axı onlar yalnız fransızlardan azdırlar".
O ki qaldı mühacir ailəsi olaraq, Zahidlərin Parisdə yaşadığı çətinliklərə, baş redaktor bildirdi ki, bu barədə ailə üzvlərindən soruşmalıyıq: “Ona görə ki, burada onlar daimi qalırlar. Mənə də şikayətlənməyi xoşlamırlar, optimistdirlər (gülür).
Q.Zahid Bakıya nə vaxt qayıdacağı ilə bağlı suala da konkret cavab vermədi: “Bir də gördünüz ki, sabah ordayam, ya da o biri gün”.
Baş redaktor qardaşı, satirik Mirzə Sakitin oğlu ilə birgə mühacirətə getməsinə də münasibət bildirdi. Onun sözlərinə görə, Azərbaycanda təqib edilən adamlar başqa çıxış yolu tapa bilməyəndə mühacirətə gedirlər: “Bu, ölkəni tərk etməyə məcbur olan insanlar haqqında deyilə biləcək sözdür".

Sevinc TELMANQIZI

1226 dəfə baxılıb