“RATİ-ni BAĞLAMAQ İSTƏYİRLƏR”

	23 may 2012


Onlayn ictimai-siyasi qəzet

Media

“RATİ-ni BAĞLAMAQ İSTƏYİRLƏR”

2012-02-08

Emin Hüseynov Ədliyyə Nazirliyi ilə problemlərdən danışdı

Ədliyyə Nazirliyi heç bir əsaslı səbəb olmadan Reportyorların Azadlığı və Təhlükəsizliyi İnstitutuna (RATİ) xəbərdarlıq edib. Dünən RATİ sədri Emin Hüseynov keçirdiyi mətbuat konfransında bu barədə məlumat verib və bildirib ki, bu xəbərdarlıq əsassızdır.

“Bu, RATİ-yə edilən əsassız təzyiqdir. Xəbərdarlıq verilməsinə əsas kimi göstərilib ki, 2006-cı ildən bəri təşkilatın sədrinin seçilməsi barədə məlumat nazirliyə göndərilməyib və bu, ”Hüquqi şəxslərin dövlət qeydiyyatı və dövlət reyestri haqqında" Qanunun 9-cu maddəsinə ziddir. Ancaq qanunun 9.1-ci maddəsində deyilir ki, təsis sənədlərinə edilən dəyişiklik, eləcə də qeydə alınmış faktların sonrakı dəyişikliyi qeydiyyata alınmalıdır. Məsələ Ədliyyə Nazirliyinin iddia etdiyi kimi deyil. Belə ki, 2006-cı ildən bəri dəfələrlə mənim sədr olmağım barədə sənəd nazirliyə təqdim edilib. Hətta 2010-cu ildə Dövlət Reyestrindən çıxarışda və birliyin nizamnaməsinə edilən dəyişiklikdə də mən sədr kimi qeyd edilmişəm. Biz ilk sədr dəyişikliyi zamanı nazirliyə məlumat vermişik. Qurum qeydiyyata alınarkən birliyin sədri Sarvan Rizvanov olub. Qurum 2006-cı ildə qeydiyyata alınandan bir qədər sonra ona qarşı edilən təzyiqlərin çox olması səbəbindən Sarvan Rizvanov birliyin sədrliyindən istefa verdi və sonradan xaricə mühacirət etdi. Bundan sonra mən sədr seçildim və bu barədə nazirliyə məlumat göndərmişik. Bundan sonra 2010-cu ildə təkrar sədr seçildiyimdə nazirliyə müraciət etmədik, buna ehtiyac yox idi. Ancaq indi nazirlik bir neçə il gözləyəndən sonra məlum olub ki, sənədləri təqdim etməmişik və bizə xəbərdarlıq göndərib".
E.Hüseynovun sözlərinə görə, nazirliyin göndərdiyi məktubda həmçinin qeyd edilib ki, RATİ nakhchivan.org saytından Naxçıvanla bağlı qərəzli, həqiqətə uyğun olmayan məlumatların yerləşdirilməsi ilə əlaqədar muxtar respublikadan nazirliyə müraciət daxil olub: “Naxçıvanda baş verən qanunsuzluqlar barədə bütün ölkənin və hətta beynəlxalq qurumların da xəbəri var. Əgər bu məlumatlar böhtan idisə, bu zaman niyə həmin şəxslər, yaxud qurumlar məhkəməyə müraciət edə bilərdilər. Lakin yazdıqlarımızın doğru olduğunu bildikləri üçün məhkəməyə müraciət etməkdən çəkiniblər”.
RATİ sədri baş verənlərin quruma edilən çoxsaylı təzyiqlərin davamı olduğunu bildirib və qeyd edib ki, Ədliyyə Nazirliyinin iki xəbərdarlıqdan sonra təşkilatın bağlanması üçün məhkəməyə müraciət etmək hüququ var: “Baş verənlər RATİ-nin qapadılmasına yönəlib. Hökumətin özünü bu cür aparması heç bir məntiqə sığmır”.

R.RƏFİYEVA

1321 dəfə baxılıb