İKİ UŞAĞI YANAN JURNALİST EKSPERTİZA İDARƏSİNİ MƏHKƏMƏYƏ VERƏCƏK

	23 may 2012


Onlayn ictimai-siyasi qəzet

Media

İKİ UŞAĞI YANAN JURNALİST EKSPERTİZA İDARƏSİNİ MƏHKƏMƏYƏ VERƏCƏK

2012-02-10

Vasif Turan: “Bizim həyatımızı açıq şəkildə qumara qoyublar?”

Ötən il oktyabrın 7-də bolgexeber.com saytının baş redaktoru Vasif Turanın Qobu qəsəbəsindəki evinin yanması və iki azyaşlı uşağının yanıb tələf olması ilə bağlı yekun ekspertiza rəyi təqdim olunub. Bu hadisə ilə bağlı FHN-in İstintaq İdarəsində qaldırılan və baş müstəntiq Qəhrəman Məmmədovun icraatında olan cinayət işi üzrə istintaq yekunlaşıb.

V.Turanın sözlərinə görə, Ədliyyə Nazirliyi Ekspertiza İdarəsinin verdiyi rəyə əsasən törədilmiş hadisə cinayət kimi təqdim olunmayıb. İki gün öncə baş redaktoru FHN-in İstintaq İdarəsinə çağıraraq ekspertizanın nəticəsi ilə tanış ediblər. V.Turan deyib ki, 4 aydan sonra Ekspertiza İdarəsi hadisənin qəsdən törədilmədiyi barədə rəy verib: “Rəydə göstərilir ki, yanğın guya qısaqapanma nəticəsində baş verib. Aydın görünür ki, bu rəy saxtadır və başdansovdu hazırlanıb. Çünki qısaqapanmanı təyin etmək üçün 4 aya ehtiyac yox idi. Əgər həqiqətən yanğın qısaqapanmadan baş vermişdisə, o zaman bunun üçün 4 ay gözləməyə nə lüzum vardı? Müstəntiq Qəhrəman Məmmədovla bu məsələ ilə xeyli söhbətim olub. Ona hörmətim var. Əlindən gələni etməyə çalışdı. Amma onun aparacağı istintaq işi Ekspertiza İdarəsinin rəyindən daha çox asılı idi. Bu rəydən sonra hüquqi prosedur işin bağlanmasını tələb edirdi ki, bunu da müstəntiq həyata keçirmək məcburiyyətindədir. Bu rəyi verənlər elə cinayətə əl atıb ki, onun izahı yoxdur. İki uşağımın qanını batırır, bir ailənin müqəddəratı ilə oynayırlar. Bizim həyatımızı ucuz bir əşya kimi satışa çıxararaq cinayətkarların əlinə oynamaq o deməkdir ki, bu insanların nə vicdanı, nə əqidəsi, nə də şərəfi var. Bu adamlar anlamır ki, bu gün tapmadıqları və ya tapmaq istəmədikləri cinayətkarlar sabah mənə və həyat yoldaşıma da qəsd edə bilər. Yəni həyatımızı açıq şəkildə qumara qoyublar”.
Baş redaktor vurğulayıb ki, bundan sonra faciənin əsas günahkarlarını tapmaq üçün bütün addımları atacaq: “Məqsəd uşaqlarımın qatilini tapmaqdır. İlkin mərhələdə məhkəməyə müraciət etmək və verilmiş rəyin saxta olduğunu alternativ ekspertizanın təyin edilməsi ilə isbatlamaqdır. Atacağım addımları vəkilimlə müəyyənləşdirirəm. Baş Prokurorluğa müraciət etmək niyyətimiz var. Ardınca Ekspertiza İdarəsini məhkəməyə verəcəyəm. Alternativ ekspertiza təyin etmək üçün fəaliyyətə başlamışıq. Beynəlxalq təşkilatlara müraciət edərək onlardan bu işə obyektiv baxılması üçün yardım istəyəcəyik. Əlimizdən nə gəlirsə, onu edəcəyik ki, bu cinayətin üstü açılsın”.
Sayt rəhbəri “Yeni Müsavat”a onu da bildirib ki, məsələ ilə bağlı media mənsublarından ibarət müstəqil araşdırma qrupunun üzvləri ilə danışıb. Onlar sonrakı hüquqi addımların atılmasında və həqiqətin üzə çıxarılmasında baş redaktora dəstək verəcəklərini bildiriblər.

E.PAŞASOY

525 dəfə baxılıb