QƏZETLƏR QAR VƏ MER FƏLAKƏTİNİN ZİYANINI HESABLADI

	23 may 2012


Onlayn ictimai-siyasi qəzet

Media

QƏZETLƏR QAR VƏ MER FƏLAKƏTİNİN ZİYANINI HESABLADI

2012-02-11

Ələsgər Süleymanov: “Son 40 gündə “Yeni Müsavat”a 14 min manat zərər dəyib”
Rahim Hacıbəyli: “Bilmirik bu vəziyyətdən necə çıxaq”

Müstəqil qəzetlər son bir ayda ağır günlər yaşayır. Bakı meriyasının yaratdığı əldə yayım problemləri, yeni köşklərdə müstəqil qəzetlərin satışına qoyulan qadağa onların maddi durumuna ciddi zərbə vurub. Bütün bunlarla yanaşı, son 15 gündə hava şəraitinin kəskin pisləşməsi, şaxtalı qar da satışa öz mənfi təsirini göstərib. Yanvarın əvvəlindəki bayram günləri, ardınca 20 Yanvarla bağlı matəm günü satışı rəsmən iflic edib.

Maddi vəziyyətini satışla düzəldən qəzetlər üçün bu əngəllərin nə demək olduğunu anlamaq çətin deyil. Biz də qəzet təmsilçiləri ilə çap mediası üçün son 40 günlük fəlakəti müzakirə etdik.
“Yeni Müsavat” qəzetinin baş direktoru Ələsgər Süleymanov bildirdi ki, 2012-ci ilin əvvəlindən etibarən qəzetlər üçün problemlər gündən-günə artır. O dedi ki, öncə qəzet köşklərinin yığışdırılması ilə başlayan təzyiq daha sonra əldə yayıma yaradılan maneələrlə davam etdi. Hava şəraitinin kəskin pisləşməsindən sonra redaksiyada işıqların tez-tez keçdiyini vurğulayan baş direktorun sözlərinə görə, bu da işə ciddi maneə törədib: “Ümumilikdə bütün problemlər satışımıza zərbə vurub və öncəki aylarla müqayisədə ortada ciddi fərq var. İlkin hesablamalarla son ay yarım ərzində qəzetimizə 14 min manat civarında ziyan dəyib. Qəzet olaraq satışdan başqa gəlirimiz yoxdur. Sadəcə, gümanımız odur ki, hava şəraiti tezliklə düzəlsin. Gələcəkdə də tirajın artırılması üçün ciddi iş aparacağıq”.
Ə.Süleymanov dedi ki, əldə yayımla, qəzet köşklərində satışla bağlı problemlərin həlli üçün aidiyyəti orqanlarla görüşləri davam edəcək: “Çatışmazlıqdan yaranan problemləri aybaay ötürərək həll etməyə çalışacağıq”.
“Azadlıq” qəzetinin redaktoru Rahim Hacıbəyli dedi ki, son 40 gündə yaranan vəziyyət qəzetin satışına ciddi ziyan vurub. Onun sözlərinə görə, qəzet yayımı ilə məşğul olan insanların işə çıxmasında problemlər yaranıb: “Hava şəraiti ilə bağlı alıcıların da sayı az olub. Konkret rəqəm vermək çətindir. Əlbəttə, maddi vəziyyətimiz yaxşı olmadığı üçün ciddi ziyan almışıq. Bu da müəyyən mənada təbiidir. Azad mətbuata dəhşətli hücumlar var, ciddi problemlər yaranıb. Əhalinin çox toplaşdığı yerlərdə qəzet satmağa imkan vermirlər. Son günlərdəki mürəkkəb vəziyyət daha da pisləşib. Bu da hakimiyyətin xeyrinədir. Çünki azad mətbuatı hansı yolla olursa-olsun susdurmaq istəyirlər. Bizimsə vəziyyətdən çıxmaqla bağlı konkret planlarımız yoxdur. Bilmirik nə edək”.

Sevinc TELMANQIZI

486 dəfə baxılıb