ÖVLADLARI HƏLAK OLAN BAŞ REDAKTORUN QAYINANASININ EVİ DAĞIDILIB

	23 may 2012


Onlayn ictimai-siyasi qəzet

Media

ÖVLADLARI HƏLAK OLAN BAŞ REDAKTORUN QAYINANASININ EVİ DAĞIDILIB

2012-02-22

Vasif Turan: “Evimi yandıranlar bu yolla təzyiqlərini davam etdirirlər ki, bu işin arxasınca getməyim”

Ötən ilin oktyabrın 7-də Qobu qəsəbəsində yerləşən evinin yanması nəticəsində iki övladını itirmiş bolgexeber.com saytının rəhbəri Vasif Turanın qaynanası Gülxanım Umudovanın evi dağıdılıb. Bu barədə tia.az-a açıqlama verən Vasif Turan bildirib ki, qayınanasının evi də Qobu qəsəbəsində, onun yanmış evinin yaxınlığında yerləşir. O deyib ki, yanğın hadisəsindən sonra qaynanası onlarla birlikdə Bakıda qohumlarının birinin evində qalırmış: “Hadisədən sonra bizə dəstək olmaq üçün birlikdə qalırdıq. Üç gün bundan əvvəl isə xəbər gəldi ki, Qobudakı evini dağıdıblar. Əvvəlcə evə gələn elektrik xəttini kəsiblər. Daha sonra isə evdəki əşyaları aparıblar. Qapı, pəncərə isə sındırılıb”.

V.Turan həmçinin qeyd edib ki, onun evi yandırılmamışdan əvvəl qayınanasının evinə gələn şəxslər oradan çıxmağını tələb ediblər. Bu proses yanğın hadisəsindən sonra da davam edib. Lakin dəfələrlə belə halların baş verməsinə rəğmən, qaynanası evini tərk etməyib və Qobudan çıxmaq fikrində olmayıb: “Hələ evim yanmamışdan əvvəl Qobu qəsəbəsində yerləşən Kərpic Zavodunun direktoru Rəsulun adamları dəfələrlə qayınanamdan evindən çıxmasını tələb etmişdilər. Son dövrlərə qədər də bu proses davam edirdi. Hər dəfə bu təkid və təzyiqlərə baxmayaraq, qaynanam evini tərk etmirdi. Bakıda bizimlə birlikdə qalmasından sui-istifadə edənlər evi yağmalayıblar”.
Hadisə ilə bağlı Abşeron Polis Şöbəsinə və 102 saylı xidmətə məlumat verdiyini deyən sayt rəhbəri artıq qayınanasının müstəntiq tərəfindən çağırıldığını da vurğulayıb. O bildirib ki, Abşeron polisində qayınanasından hadisə ilə bağlı izahat alınıb: “Abşeron polisində qayınanamdan izahat alınıb və deyilib ki, hadisəni törədənləri tapacaqlar”.
Baş redaktor bildirir ki, istintaqın gedişatı zamanı belə bir hadisənin baş verməsi ona qarşı təzyiqin tərkib hissəsidir: “Bu mənə edilən təzyiqdir. Evimi yandıranlar bu yolla təzyiqlərini davam etdirirlər ki, bu işin arxasınca getməyim. Lakin bütün hallarda mən övladlarımın qatillərini tapmaq üçün bütün vasitələrə baş vuracağam. Bu cür təzyiqlərlə geri çəkiləcəyimi düşünənlər yanılırlar”.
V.Turan istintaqın gedişindən də razı qalmadığını da deyib. Bildirib ki, ekspertiza kimlərinsə təsiri ilə həqiqəti gizlədir: “Ədliyyə Nazirliyinin Ekspertiza İdarəsi rəy verib ki, guya evdəki elektrik xətlərində qısaqapanma baş verib. Evin və övladlarımın yanması da bununla bağlıdır. Mən bunu qəbul etmirəm. Bütün bunlar cəfəngiyyatdır”. Vasif Turanın dediyinə görə, onun hüquqlarını vəkil Rasim Əlizadə müdafiə edəcək. Jurnalistin sözlərinə görə, bundan sonrakı mərhələdə bir sıra addımlar atmağı düşünürlər və yaxın günlərdə keçirəcəkləri mətbuat konfransında bu barədə geniş məlumat verəcəklər.

ELŞAD

660 dəfə baxılıb