QƏZETLƏR QƏRARSIZDIR... | Media

	05 fevral 2012


Onlayn ictimai-siyasi qəzet

Media

QƏZETLƏR QƏRARSIZDIR...

2009-11-24

Qurban bayramında neçə gün istirahət edəcəyimiz hələ dəqiqləşməyib

Qurban bayramı ilə bağlı qəzetlərin neçə gün istirahət edəcəyi ənənəvi olaraq müzakirə mövzusuna çevrilib. Oxucular öz sevimli qəzetlərini hər gün oxumaq istəsələr də, yayım, çap sahəsində yaranmış problemlər bu istəyin reallaşmasına bir qədər mane olur. Son günlər media cameyəsində müzakirə olunan mövzulardan biri də məhz budur: Qurban bayramı münasibətilə elan edilən rəsmi tətil günlərində neçə gün nəşr olunacağıq?

“Yeni Müsavat” qəzetinin baş direktoru Ələsgər Süleymanov bildirdi ki, bu məsələ həmişəki kimi, problem olaraq qalır. Onun sözlərinə görə, qəzetlər “yayım firmaları işləsə, biz də nəşr olunacağıq”, yayım firmaları isə “qəzetlər nəşr olunsa, biz də çalışacağıq” deyir. Müsahibimiz hər iki tərəfin bir-birindən yekun qərar gözlədiyi üçün konkret nəticəyə gəlməyin də çətin olduğunu vurğuladı: “Hər halda, bizim istəyimiz odur ki, ayın 27-28-də istirahət edək. Ayın 29-da isə işləyək və oxucu ayın 30-da ”Yeni Müsavat"ı oxuya bilsin. Amma yayım firmaları deyir ki, bizim işləməyimiz üçün bir neçə qəzetin də sizin bu qərarınızı dəstəkləməsi lazımdır".
Müsahibimiz bu səbəbdən yekun qərarlarını verə bilmədiklərini, amma yaxın bir-iki gündə ümumi məsləhətləşmələrdən sonra son sözlərini deyəcəklərini bildirdi.
“Bakı-Xəbər” qəzetinin baş redaktoru Aydın Quliyev isə artıq son qərarlarını verdiklərini dedi. Müsahibimiz noyabrın 27-dən 30-na qədər istirahət edəcəklərini, ayın 30-da isə işə çıxacaqlarını bildirdi: “Təbii ki, bu qərarı verəndə həm oxucu auditoriyasının arzu-imkanlarını, həm də yayım firmalarının mövqeyini nəzərə aldıq”.
“Azadlıq” qəzetinin baş direktoru Azər Əhmədov da bayram günlərinin qəzetin maddi durumuna mənfi təsir etdiyini söylədi. Onun sözlərinə görə, satışdan dolanan nəşrlər üçün bayram günləri faciəyə bərabərdir: “Arzumuz budur ki, redaksiyanın 50 faizinin mömin olduğunu nəzərə alıb, noyabrın 27-də istirahət edək, 28 və 30-da isə işləyək. Noyabrın 29-u bazar gününə təsadüf edir, biz onsuz da bazar günləri işləmirik”.
Müsahibimiz son qərarın nəşriyyat və yayım firmalarından asılı olduğunu dedi. Baş direktor ayın 25-26-da bayram qrafiklərini müəyyənləşdirəcəklərini dedi.

Sevinc TELMANQIZI

466 dəfə baxılıb