AZƏR AYXANIN MÜDAFİƏÇİSİ MƏHKƏMƏYƏ ETİRAZ ETDİ

	30 iyul 2010


Onlayn ictimai-siyasi qəzet

Media

AZƏR AYXANIN MÜDAFİƏÇİSİ MƏHKƏMƏYƏ ETİRAZ ETDİ

Vəkil Elçin Sadıqov Cəlal Əliyevin iddiasının icraata götürülməməsi ilə bağlı vəsatət qaldırdı

Dünən Bakının Nizami Rayon Məhkəməsində akademik Cəlal Əliyevin “Yeni Müsavat” qəzetinin baş redaktorunun birinci müavini Azər Ayxana qarşı xüsusi ittiham qaydasında iddiası üzrə məhkəmənin hazırlıq iclası keçirilib. Hakim Ziya Əliyevin sədrliyi ilə keçirilən prosesdə A.Ayxanın vəkili Elçin Sadıqov vəsatət qaldıraraq, hakimdən C.Əliyevin şikayətinin öz icraatına qəbul edilməsindən imtina olunması barədə qərar qəbul etməsini xahiş edib. E.Sadıqov vəsatətində bildirib ki, C.Əliyev əsassız olaraq Cinayət Məcəlləsinin 147.1, 147.2 və 148-ci maddələri ilə xüsusi ittiham qaydasında şikayət verib. “Cəlal Əliyev məqalədə hansı ifadələrin böhtan, hansının təhqir olmasını əsaslandırmayıb. Onun mübahisə etdiyi ifadələr böhtan və təhqir hesab edilə bilməz. Həmçinin məhkəmə ölkədəki informasiya durumuna da diqqət yetirməlidir. Rəsmi hesabatlara görə, dövlət orqanları ”İnformasiya əldə etmək haqqında" Qanuna əməl etmirlər və onlara ünvanlanmış sorğuları qanunla müəyyən edilmiş müddətdə və qaydada cavablandırmırlar. Belə hallarda jurnalistin aldığı məlumatın düzgünlüyünü yoxlamaq imkanı da olmur. Məhkəmə eyni zamanda Cəlal Əliyevin deputat olmaqla onun ictimai-siyasi fiqur olduğunu nəzərə almalıdır. Eyni zamanda məhkəmə nəzərə almalıdır ki, yayılmış məlumat ictimai maraqlı məlumat olub". Vəkil E.Sadıqov həm də qeyd edib ki, şikayət vermiş şəxs məhkəmənin hazırlıq iclasına üzürlü səbəb olmadan iki dəfə gəlmədikdə xüsusi ittiham qaydasında şikayət üzrə məhkəmə baxışının keçirilməsindən imtina olunmalıdır: “Bu, CPM-in 302-ci maddəsində göstərilir.

Konstitusiyanın 7, 12, 47, 50, 151-ci maddələrinə, Azərbaycan Respublikasında insan hüquq və azadlıqlarının həyata keçirilməsinin tənzimlənməsi haqqında Azərbaycan Respublikasının Konstitusiya Qanununa, İnsan hüquqlarının və əsas azadlıqlarının müdafiəsi haqqında Konvensiyanın (Avropa Konvensiyası) 10-cu maddəsi və bu maddənin tətbiqi ilə bağlı Avropa Məhkəməsinin presedent hüququna, CM-in 1.2-ci, 3-cü, 25.2-ci maddələrinə, CPM-in 10, 12, 39, 302.1.2. maddələrinə əsasən xahiş edirəm ki, Cəlal Əliyevin Azər Abbasova (Ayxan) qarşı xüsusi ittiham qaydasında şikayətinin öz icraatına qəbul edilməsindən imtina olunması barədə qərar qəbul edəsiniz”.

Qarşı tərəfin nümayəndəsi Məzahir Sadıqov isə bildirib ki, məhkəmədə iddiaçının özü yox, nümayəndəsi də iştirak edə bilər: “Həmçinin məqalədəki hansı ifadələrin təhqir, hansıların böhtan olduğu dəqiqliklə göstərilib”.
Məhkəmə prosesi fevralın 10-da saat 15.00-da davam etdiriləcək. Hakim həmin prosesdə C.Əliyevin iddiasını icraata götürüb-götürməmək barədə qərar verəcək.
Xatırladaq ki, Cəlal Əliyev Azər Ayxanı “Yeni Müsavat” qəzetinin 05 yanvar 2010-cu il tarixli sayında onun barəsində dərc olunmuş “Prezidentin narazı qaldığı obyektin sahibi tapıldı; ”Bakı" mehmanxanası Cəlal Əliyevin imiş" başlıqlı məqaləyə görə məhkəməyə verib.

R.QURBANLI

1178 dəfə baxılıb

[29.07.2010] - AĞ EVİN ŞƏKLİNİ ÇƏKƏNLƏRİ DÖYMÜRLƏR...

[29.07.2010] - ƏFLATUN AMAŞOV ZAKİR QARALOVLA GÖRÜŞÜB

[28.07.2010] - “YENİ AZƏRBAYCAN” HAKİMİYYƏTİN MEDİA İLƏ BAĞLI DÜNYAYA YENİ MODEL TƏKLİF ETDİYİNİ YAZIB

[28.07.2010] - QƏZETLƏR 20 MİN MANATI NECƏ XƏRCLƏYƏCƏK?

[28.07.2010] - EYNULLA FƏTULLAYEV MƏHKƏMƏ QƏRARINI GÖZLƏYİR

[28.07.2010] - AVROPA KOMİSSİYASI JURNALİSTLƏR ÜÇÜN MÜSABİQƏ ELAN EDİB

[28.07.2010] - “EV ÜÇÜN YER AXTARIRIQ”

[27.07.2010] - İLHAM ƏLİYEV ÇAP MEDİASININ REKLAM PROBLEMİNİ HƏLL EDƏCƏKMİ?

[27.07.2010] - ƏMƏKDAR JURNALİSTLƏR PUL DA ALACAQ

[27.07.2010] - EYNULLA FƏTULLAYEVİN İŞİ İLƏ BAĞLI APELYASİYA ŞİKAYƏTİ VERİLDİ