GÜNDƏLİK QƏZETLƏR 9 GÜNLÜK FASİLƏ ETMƏK FİKRİNDƏ DEYİLLƏR

	13 fevral 2012


Onlayn ictimai-siyasi qəzet

Media

GÜNDƏLİK QƏZETLƏR 9 GÜNLÜK FASİLƏ ETMƏK FİKRİNDƏ DEYİLLƏR

2010-03-05

Aidiyyəti qurumlar isə tərəddüd içindədir

Nazirlər Kabinetinin 2009-cu ilin noyabrında qəbul etdiyi qərara əsasən martın 20, 21, 22, 23 və 24-ü Azərbaycanda Novruz bayramı hesab olunur və həmin günlər iş günü hesab edilmir. Martın 20-si və 21-i həftənin şənbə və bazar günlərinə düşdüyündən, martın 25-i və 26-sı da qeyri-iş günü hesab olunur. Təqvimə əsasən, martın 27-si şənbə, 28-i isə bazar günləridir və həmin günlər də qeyri-iş günüdür. Bununla Novruz bayramı ilə əlaqədar Azərbaycanda 9 gün qeyri-iş günü sayılır.

Maraqlıdır, bu günlər qəzetlər çap olunacaqmı?
“Azərbaycan” nəşriyyatının direktor müavini Bəsti İsmayılova “Yeni Müsavat”a açıqlamasında neçə gün istirahət edəcəkləri ilə bağlı hələlik heç bir qərar vermədiklərini bildirdi: “Bu qərar həm qəzetlərin işləməyindən, həm xüsusi sifarişdən, həm də ölkədəki vəziyyətdən asılı ola bilər. Bu səbəbdən qərarımız qətiləşməyib”.
“Qaya” mətbuat yayımı firmasının direktoru Xanhüseyn Əliyev də işlərinin qəzetlərdən asılı olduğunu bildirdi: “Rayonlardan fərqli olaraq biz Bakıda daha çox əl yayımı və abunə ilə yayılırıq. Ona görə də 4-5 qəzet çıxmalıdır ki, işçilərin maaşlarını verə bilək. Mən 9 günlük fasiləni alqışlamıram. İndidən məni dəhşət bürüyüb ki, 9 gün işləməsək, işçilərimə nəylə maaş verəcəm”.
“Bakı-xəbər” qəzetinin baş redaktoru Aydın Quliyev 9 günlük fasilənin gündəlik qəzet üçün uzun müddət olduğunu dedi: “İşləmədikcə, maddi ziyan çəkirik. Ona görə də ilkin razılaşmaya əsasən, 24-25 martdan başlayaraq işləyəcəyik. İşçilərimizə 4-5 gün istirahət verəndən sonra fəaliyyətə başlayacağıq”.
“Bizim yol” qəzetinin baş redaktor müavini Elçin Rüstəmli qəzetin hələ heç bir qərar vermədiyini açıqladı: “Gələn həftə müzakirə edəcəyik və yekun qərar verəcəyik”.
“Azadlıq” qəzetinin baş direktoru Azər Əhmədov bayram günlərində 2-3 gün istirahət etmək istədiklərini bildirdi: “Mətbuat yayımı firmalarına işləmək sərf edir. Bununla belə, biz addımlarımızı ”Yeni Müsavat" qəzeti ilə birgə koordinasiya edəcəyik. Bəri başdan heç nə deyə bilmərik".
“Yeni Müsavat” qəzetinin direktoru Ələsgər Süleymanov isə bayram günlərində istirahət etməyin ölkə mediasına böyük ziyan olduğunu bildirdi: “Ona görə də, hakimiyyət təmsilçiləri bu bayramın media üçün də bayram olmağına çalışmalıdırlar. Çünki 9 gün işləməmək gündəlik qəzetləri 10 min manatlarla ölçülən ziyana sala bilər”.
Ə.Süleymanovun sözlərinə görə, yuxarıdakı məsələlər həllini tapdığı halda digər məsələlər texniki xarakterlidir: “Yayım və çap firmalarının işləməsi bizdən asılı deyil. Bununla belə, 9 gün istirahət etmək fikrimiz yoxdur. Çalışacağıq ki, 3-4 günlük istirahətdən sonra çapa başlayaq”.

Nailə RÖVŞƏNQIZI

661 dəfə baxılıb