AzTV-dəki BİABIRÇILIQLA BAĞLI QALMAQAL BÖYÜYÜR

	12 fevral 2012


Onlayn ictimai-siyasi qəzet

Media

AzTV-dəki BİABIRÇILIQLA BAĞLI QALMAQAL BÖYÜYÜR

2010-03-07

Telekanal mətbuatda yazılanlara münasibət bildirmək istəmir

“Yeni Müsavat” qəzetinin dünənki sayında dərc edilən “Təzadlar” qəzeti ilə AzTV arasında qalmaqal" başlıqlı xəbərdə AzTV-nin sədri Arif Alışanovun “Təzadlar” qəzetinin baş redaktoru Asif Mərzilinin telekanalda çalışan iki qohumunu işdən çıxardığı bildirilir. Səbəb qəzetin “Olaylar” informasiya agentliyinə istinadən “AzTV-də qadınlar cinsi istismara məruz qoyulur? Qadın Krizis Mərkəzinin rəhbəri Mətanət Əzizova sensasion məlumat yaydı” başlıqlı yazını dərc etməsidir. Həmin yazı dərc olunandan sonra Arif Alışanov məqalənin İTV rəhbəri İsmayıl Ömərovun sifarişçi ilə yazıldığı qənaətinə gəlib və A.Mərzilinin iki qohumunu işdən qovmaq barədə göstəriş verib.

Qadın Krizis Mərkəzinin rəhbəri Mətanət Əzizova məsələ ilə bağlı “Yeni Müsavat”a bildirib ki, son iki ildə AzTV-də işləyən çox sayda qadın işlədikləri yerdə cinsi istismara təhrik edilmələrindən Krizis Mərkəzinə şikayət ediblər: “2008-2009-cu illərdə bununla bağlı müraciət edən qadınların sayı çox olub. Bu, əsasən müəssisədə struktur dəyişiklikləri olan zaman baş vermişdi. Bu ilin yanvar ayında isə üç qadın bizə müraciət edərək işlədikləri yerdə cinsi istismara təhrik edildiklərini bildirib. Bununla bağlı məlumat mətbuatda gedəndən sonra isə bir neçə gün əvvəl telekanalda bir neçə qadını işdən qovublar, bəzilərinə də qovulacağı ilə bağlı xəbərdarlıq ediblər. Həmin qadınların mətbuata məlumat ötürməsindən şübhələnirlər”.
M.Əzizovanın sözlərinə görə, mərkəzə müraciət edən qadınlara məsələnin hüquqi tərəfi başa salınır, həmçinin onlara psixoloji yardım edilir: “Qadınlara təklif edirik ki, məhkəməyə müraciət etsinlər. Amma onlar razılaşmırlar. Çünki nəticədə qadın həm biabır olacaq, həm də işini itirəcək. İşdə cinsi əlaqəyə təhrik edilənlər şikayət edəcəkləri halda cəmiyyət tərəfindən birmənalı qarşılanmayacağı, ailələrində problemlər olacağından da narahatlıqlarını bildirirlər”.
M.Əzizova deyib ki, qadınlarla əxlaqsız təklif rəhbərlik, şöbə müdirləri tərəfindən edilib.
“Təzadlar” qəzetinin baş redaktoru Asif Mərzili isə “Yeni Müsavat”a bildirib ki, AzTV-də işdən qovulan qohumlarından birinin yerinə işçi də götürülüb: “Televiziyanın binasında elan hissəsində onun işdən qovulduğu yazılıb. Hələ əmrin surəti, əmək kitabçası onlara verilməyib”.
A.Mərzilinin sözlərinə görə, işdən qovulan telekanal əməkdaşları hüquqlarının qorumaq üçün müəyyən addımlar atacaq: “Onların ombudsmana müraciət etmək fikirləri var. Bundan sonra məhkəməyə də müraciət etməyi düşünürlər. Düşünürəm ki, məsələ beynəlxalq qalmaqala da gətirib çıxara bilər. Azərbaycanın Avropa İnsan Haqları Konvensiyasına qoşulduğu bir vaxtda insan haqları bu şəkildə pozulur”.
Məsələ ilə bağlı AzTV rəhbərliyinin də fikrini öyrənmək istədik. Özünü Arif Alışanovun köməkçisi kimi təqdim edən şəxs sualımızı eşitdikdən sonra cavab verməkdən imtina etdi. Telekanalda mətbuata cavab verəcək şəxsin isə üç gün sonra işdə olacağı bildirildi.
M.Əzizova isə deyir ki, qadınların iş yerlərində cinsi əlaqəyə təhrik edilməsi ölkə üçün ciddi problemdir: “Həm də problem təkcə AzTV-yə aid deyil, bir çox televiziyalarda bu problem var. AzTV-də problem daha ciddidir. Bununla bağlı qanunvericilik bazası da çox aşağı səviyyədədir. Faktla bağlı Cinayət Məcəlləsinin 151-ci maddəsi ilə iş açmaq olar. Onda da faktı sübut etmək qadın üçün çox çətin olur. Əgər bütün sübutlar qadının əlində varsa, məhkəmə bütün o sübutları məhkəməyə təqdim etsə də cinayətkar ancaq cərimə ödəyəcək”.

R.QURBANLI

1779 dəfə baxılıb