DÖVLƏT NEFT ŞİRKƏTİNDƏ STUL QOYMAĞA YER YOX İMİŞ

	13 fevral 2012


Onlayn ictimai-siyasi qəzet

Media

DÖVLƏT NEFT ŞİRKƏTİNDƏ STUL QOYMAĞA YER YOX İMİŞ

2010-03-12

Qəzetlər qurumun tədbirlərinə bu səbəbdən dəvət edilmir

Azərbaycan Respublikası Dövlət Neft Şirkəti (ARDNŞ) keçirdiyi tədbirlərə “Yeni Müsavat” qəzetini bir qayda olaraq dəvət etmir. Qurumdan bununla bağlı məlumat almaq istədikdə isə ümumiyyətlə ölkədəki qəzetlərin bu şirkətin tədbirlərinə dəvət edilmədiyi bildirildi.

ARDNŞ-nin mətbuat xidmətinin rəhbəri Nizaməddin Quliyevin verdiyi məlumata görə, şirkətin tədbirlərinə yalnız telekanallar və agentliklər dəvət edilir: “Çünki kütləvi informasiya vasitələri çoxdur, yerimizsə azdır. Tədbir keçirmək üçün yerimiz darısqaldır. Belə düşünürük ki, televiziya və agentliklər tədbirləri daha operativ işıqlandıra bilirlər. Hər bir qəzet də gündəlik iki-üç agentliyin məlumatını alır”.
N.Quliyevin sözlərinə görə, şirkətin mətbuat konfransı keçirmək üçün nəzərdə tutduğu məkan genişləndirilərsə, qəzetlərin tədbirə dəvət edilməsi müzakirə edilə bilər: “Yerimiz genişlənəndə bunu nəzərə alacağıq. Ancaq bilmirdim ki, mətbuatın bizim keçirdiyimiz tədbirlərə marağı var”.
Qeyd edək ki, ölkədəki telekanalların hamısı, agentliklərin də əksəriyyəti hakimiyyətin nəzarətindədir. Bu səbəbdən onların ARDNŞ-nin fəaliyyətindəki nöqsan və çatışmazlıqlarla bağlı hər hansı xəbəri ictimaiyyətə çatdıracağı inandırıcı deyil. Müxalifət yönlü mətbuat orqanlarının qurumun tədbirlərinə dəvət edilməməsi isə onların məlumat əldə etmək azadlığını pozur.
Təkcə Dövlət Neft Şirkəti deyil, bir çox rəsmi qurumlar da müxalifət mətbuatını öz tədbirlərinə bir qayda olaraq dəvət etmir. Media Hüquqları İnstitutunun rəhbəri Rəşid Hacılının sözlərinə görə, ARDNŞ-nin və digər rəsmi qurumların öz tədbirlərinə, mətbuat konfranslarına istədikləri mətbuat orqanını dəvət etməsi onların fəaliyyəti barədə şübhələr yaradır: “Bu, onu göstərir ki, Dövlət Neft Şirkəti hansısa mətbuatın onun barəsində yazmasını istəmir, hansısa tənqidlərdən, veriləcək əlavə suallardan qorxur. Bu, onlara hörmət gətirmir və qurumun fəaliyyətinə etibar yaratmır”.
R.Hacılı qeyd edib ki, hər bir media qurumunun, jurnalistin informasiya almaq hüququ var. Buna görə ARDNŞ normal akkreditasiya qaydaları müəyyənləşdirməli və bütün mətbuatın iştirakına imkan yaratmalıdır: “Bu baxımdan jurnalistlərin bir hissəsini tədbirlərinə dəvət etməyən qurumlar bununla cəmiyyətin informasiya almaq hüququna da zərbə vurmuş olur”.

R.RƏFİYEVA

863 dəfə baxılıb