ŞEYXÜLİSLAM JURNALİSTLƏRİN HƏBSDƏN BURAXILMASINI İSTƏYİR

	13 fevral 2012


Onlayn ictimai-siyasi qəzet

Media

ŞEYXÜLİSLAM JURNALİSTLƏRİN HƏBSDƏN BURAXILMASINI İSTƏYİR

2010-03-12

Allahşükür Paşazadə: “Mən həmişə bu barədə öz sözümü demişəm”

“Əfv Komissiyasının iclaslarında qəsdən adam öldürənlər, narkotikə görə həbs edilənlər və belə ağır cinayətlər törədən şəxslərdən başqa bütün müraciət edən məhkumların azadlığa buraxılmasına müsbət baxıram”. APA-nın məlumatına görə, bu barədə Azərbaycan Prezidenti yanında Əfv Komissiyasının üzvü, Qafqaz Müsəlmanları İdarəsinin sədri Şeyxülislam Allahşükür Paşazadə deyib. A. Paşazadə həbsdəki jurnalistlərin də azadlığa buraxılmasının tərəfdarı olduğunu bildirib: “Mən həmişə öz sözümü deyirəm. Lakin kimin azadlığa buraxılıb-buraxılmaması dövlət başçısının səlahiyyətində olan məsələdir”.

Daha sonra dini məsələlər barədə də danışan A.Paşazadə bildirb ki, dünya dini liderlərinin Bakıda keçiriləcək sammitinin vaxtı dəqiqləşib. Şeyxülislam Bakıda keçiriləcək zirvə görüşünün aprelin 27-dən 29-dək keçiriləcəyini deyib.
Onun sözlərinə görə, tədbirə hazırlıq işləri yüksək səviyyədə keçirilir. A. Paşazadə belə bir tədbirin Bakıda keçirilməsinin böyük əhəmiyyəti olduğunu vurğulayıb: “Bu tədbirdə 150-dək dini lider iştirak edəcək. Onlar hərəsi bir dövlətdə milyonlarla insanı öz ətrafında birləşdirirlər. Təkcə Pravoslav Kilsəsindən 11 patriarxın tədbirdə iştirakı dəqiqləşib. Bundan başqa, dünyada mövcud olan ənənəvi dinlərin hər birinin təmsilçiləri bu zirvə görüşündə iştirak edəcək”.
A. Paşazadə sammitə bütün ermənilərin katolikosu II Qareginin də dəvət ediləcəyini istisna etməyib: “MDB Dinlərarası Şurasına bütün ölkələrin dini liderləri daxildir. Mən bu qurumun həmsədriyəm. Bildiyimə görə, yaxın vaxtlarda Moskva və bütün Rusiyanın patriarxı Kiril Ermənistana səfər edəcək. Yəqin həmin səfər zamanı Qaregini də Bakıdakı tədbirə dəvət edəcək. Mən bu dəvətdə heç bir qeyr-adilik görmürəm. Çox arzu edərdim ki, Qaregin Bakıya gəlib, Azərbaycan həqiqətlərini öz gözləri ilə görsün. Ancaq dəvət olunsa da, Qareginin Bakıdakı tədbirdə iştirak edəcəyinə inanmıram. Yəqin ki, Bakıda zirvə görüşü keçirilən zaman Ermənistanda da uydurma ”erməni soyqırımı" ilə bağlı tədbirlər olacaq".

Xəbər xidməti

555 dəfə baxılıb