JURNALİSTLƏR ÜÇÜN MƏTBUAT ŞƏHƏRCİYİ TİKİLƏCƏK

	09 sentyabr 2010


Onlayn ictimai-siyasi qəzet

Media

JURNALİSTLƏR ÜÇÜN MƏTBUAT ŞƏHƏRCİYİ TİKİLƏCƏK

Vüqar Səfərli: “Gələn həftədən bina tikintisi üçün yer axtarmağa başlayacağıq”

İyulun 22-də prezident İlham Əliyev mətbuat işçilərinin sosial müdafiəsinin gücləndirilməsi tədbirlərini nəzərdə tutan sərəncam imzalayıb. Sərəncamla mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədilə Prezidentin Ehtiyat Fondundan KİV-in İnkişafına Dövlət Dəstəyi Fonduna 5 milyon manat ayrılıb. Binanın tikiləcəyi yer, zaman, mənzillərin kimlərə paylanacağı və s.suallar ilk gündən aktuallıq qazanıb. Bu detalları dəqiqləşdirmək üçün KİV-in İnkişafına Dövlət Dəstəyi Fondunun icraçı direktoru Vüqar Səfərli ilə danışdıq. O, öncə qərarla bağlı ilkin detallar barədə danışdı.

- Cənab prezident elə addım atdı ki, bu bayram günündə mətbuat işçilərini sevindirdi. İlin yekunları ilə bağlı prezidentə hesabat verəndə jurnalistlərin mənzil problemini qabartmışdıq. Dünən (srağagün-S.T.) Mətbuat Şurasının ofisinin açılışında isə bu məsələ yenidən qaldırıldı. Prezident bunu araşdıracağını deyərək operativ reaksiya verdi. Görüşdən sonra mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədilə Prezidentin Ehtiyat Fondundan KİV-in İnkişafına Dövlət Dəstəyi Fonduna 5 milyon manat ayırdı. Bu qərar bizim üçün də gözlənilməz oldu. Cəmi bir neçə saatda həll edildi.

- Bəs jurnalistlərin mənzillə təmin olunma mexanizmi necə olacaq? Qaydalar müəyyənləşibmi?

- İndidən deyim ki, vəsaitin bölünməsi, jurnalistlərin bu pulla özlərinə ev alması kimi hal olmayacaq. Böyük ehtimalla, daha öncə də danışdığımız kimi, mətbuat şəhərciyi qurulacaq. İlk olaraq bir-iki bina tikiləcək. Sonradan güman ki, onların sayı da artacaq. İstəyirik ki, bu binalar kompakt bir yerdə olsun. Jurnalistlərin bir yerdə yaşaması yaxşı hal ola bilər.

- Yer olaraq hara müəyyənləşib? Jurnalistlərə şəhərdən kənara şəhərcik qurulacağı barədə daha öncədən versiyalar vardı.

- Gələn həftədən etibarən yer məsələsini həll edəcəyik. Ayrılan vəsaitə uyğun olaraq neçə bina, hər binada neçə mənzil tikiləcəyi məsələsi müəyyənləşəcək. Bu, daha sonradan bütün ictimaiyyətin, mətbuatın müzakirəsinə çıxarılacaq. Yekunları da xalqa çatdıracağıq. Komissiya müəyyənləşəcək, ona əsasən də siyahılar qiymətləndiriləcək. Sizi əmin edirəm ki, bütün digər məsələlərdə olduğu kimi burada da şəffaflıq olacaq.

- Siyahı necə tərtib olunacaq? Fəxri adlarda olduğu kimi bu dəfə də ev alacaq jurnalistlər redaksiyalardan gələn siyahılar əsasında müəyyənləşəcəkmi?

- O məsələ hələ dəqiqləşməyib. Verilmə mexanizmi müəyyənləşməyib. İlkin olaraq yeri tapaq, büdcəyə uyğun neçə bina, neçə ev tikiləcəyini dəqiqləşdirək, ondan sonra jurnalistlərdən gələcək təkliflər məsələsinə baxarıq.

- Ən azı neçə jurnalistin evlə təmin olunacağını proqnozlaşdırırsınız? Büdcə bəlli, Azərbaycanda ev tikməyin neçəyə başa gəldiyi də bəlli. Mənzərə nəyi göstərir?

- İlkin olaraq bu pula neçə kvadratmetr ev tikiləcəyini müəyyənləşdirəcəyik. Layihədən də çox şey asılıdır. Sifariş verəcəyik, bizə layihə nümunələri verəcəklər. Bilirsiniz ki, hər binanın fərqli layihəsi var. Bütün hallarda çalışacağıq ki, bu işdən daha çox jurnalist yararlansın, ev problemi həll olunsun. Evlər tam sıfırdan tikiləcək. Podratçı şirkətlə danışandan sonra bütün detalları biləcəyik.

- 5 milyon manat bir bina üçün az deyilmi? Bunun davamı gələcəkmi?

- Bu, ilkin addımdır. Bu günə qədər mətbuat tarixində belə şey olmayıb. Digər ölkələrin təcrübəsində də bu hal yaşanmayıb. 5 milyon manat isə bina tikintisi üçün kiçik məbləğ sayılmır. Ümid edirik ki, bu addımın davamı da gələr və cənab prezident bütün evsiz jurnalistlərin mənzil probleminin həlli üçün lazımi sərəncamlar verər.

S.TELMANQIZI

199 dəfə baxılıb

[09.09.2010] - NƏCƏF NƏCƏFOVLA ELMAR HÜSEYNOV ANILDI

[08.09.2010] - JURNALİSTLƏR SEÇKİYƏ HAZIRLAŞIR

[08.09.2010] - “XAN SARAYI”, YOXA ÇIXAN İPƏKLƏR VƏ ADAMLAR

[08.09.2010] - “AZƏRBAYCANDA SÖZ VƏ İFADƏ AZADLIĞINA DƏSTƏK” FORUMUNA START VERİLDİ

[08.09.2010] - 10 BEYNƏLXALQ TƏŞKİLAT EYNULLA İLƏ GÖRÜŞ İSTƏYİR

[08.09.2010] - BİR AYDA 44 FAKT...

[07.09.2010] - “BƏZİ HÖKUMƏTLƏR MƏTBUATIN ÖZÜNÜ TƏNZİMLƏMƏSİNİ ÖZÜNÜSENZURAYA ÇEVİRMƏK İSTƏYİRLƏR”

[07.09.2010] - BU GÜN EYNULLA FƏTULLAYEVİN MƏHKƏMƏSİDİR

[07.09.2010] - SÖZ VƏ İFADƏ AZADLIĞINA DƏSTƏK FORUMU İŞƏ BAŞLAYIR

[07.09.2010] - BƏZİ YAYIM FİRMALARI MƏHKƏMƏYƏ VERİLƏ BİLƏR