ƏMƏKDAR JURNALİSTLƏR PUL DA ALACAQ

	12 fevral 2012


Onlayn ictimai-siyasi qəzet

Media

ƏMƏKDAR JURNALİSTLƏR PUL DA ALACAQ

2010-07-27

Zahid Səfəroğlu: “Bunu qonorarımıza simvolik əlavə kimi qəbul edirəm”
Gültəkin Knyazqızı: “Müavinətin məbləği artırılsa, yaxşı olar”

Prezident İlham Əliyev Azərbaycan mətbuatının 135-ci ildönümündə mətbuat işçilərindən 38 nəfəri “Əməkdar jurnalist”, 15 nəfəri “Əməkdar mədəniyyət işçisi”, 1 nəfəri “Əməkdar mühəndis” fəxri adları, 38 nəfəri isə “Tərəqqi” medalı ilə təltif edib.

Əmək və Əhalinin Sosial Müdafiəsi Nazirliyi mətbuat xidmətinin rəhbəri Elnur Kələntərov “Media forum”a bildirib ki, “Tərəqqi” medalına görə dövlət büdcəsindən müavinət ödənilmir. “Əməkdar jurnalist”, “Əməkdar mədəniyyət işçisi” və “Əməkdar mühəndis” fəxri adlarına layiq görülənlər isə büdcədən ayda 30 manat məbləğində müavinət alacaqlar: “Bu məbləğ hər ayın sonunda verilir. Əgər fəxri ad sahibləri dövlət büdcəsindən maaş alırsa, onda fəxri ada görə pul onlara işlədikləri yerdən verilir. Dövlət büdcəsindən maliyyələşməyən təşkilatlarda çalışan əməkdar işçilərə isə fəxri adlara görə pulu onların yaşadıqları rayonun Sosial Müdafiə Mərkəzi hər ay ödəyir”.
Elnur Kələntərov qeyd edib ki, bu məbləğ fəxri ad sahiblərinə ömürlük ödənilir. Əmək fəaliyyəti başa çatdıqda isə pensiyaya əlavə olunur.
“Yeni Müsavat” qəzetinin redaktoru, “əməkdar jurnalist” adına layiq görülmüş Zahid Səfəroğlu hesab edir ki, bu, normal prosedurdur. Onun sözlərinə görə, dövlətin verdiyi mükafat onların jurnalist fəaliyyətinə verilən qiymətdir: “O ki qaldı müavinətə, bunu da qonorarımıza simvolik əlavə kimi qəbul edirəm. Fəxri adı almışıqsa, müavinəti də qəbul etməliyik. Amma istərdik ki, jurnalistlər üçün elə şərait yaradılsın ki, belə müavinətlərə ehtiyac olmasın. Medianın iqtisadi durumu arzu edilən səviyyədə olsa, jurnalistlər də haqq etdikləri səviyyədə yaşaya bilərlər”.
Digər laureat, “Azadlıq” qəzetinin əməkdaşı Gültəkin Knyazqızı da bildirdi ki, fəxri adla yanaşı, müavinətin ayrılması yaxşı haldır. Amma müsahibimiz müavinətin məbləğinin az olduğunu düşünür: “Reallıq üçün baxanda çox az məbləğdir. Artım olarsa, yaxşı olar. Ad alan jurnalistlər bu müavinətlə hansısa problemlərini həll edə bilərlər”.
Müsahibimiz bu müavinətdən imtina etməyəcəyini dedi. Onun sözlərinə görə, fəxri adı qəbul edibsə, müavinətlə bağlı da eyni mövqe sərgiləyəcək: “Amma hesab edirəm ki, məbləği bu qədər qalsa, simvolik xarakter daşıyacaq”.

Xəbər xidməti

933 dəfə baxılıb