“EV ÜÇÜN YER AXTARIRIQ” | Media

	12 fevral 2012


Onlayn ictimai-siyasi qəzet

Media

“EV ÜÇÜN YER AXTARIRIQ”

2010-07-28

Vüqar Səfərli: “Yaxşı bir yerin ayrılmasına çalışırıq”

Xəbər veridyimiz kimi, iyulun 22-də prezident İlham Əliyev mətbuat işçilərinin sosial müdafiəsinin gücləndirilməsi tədbirlərini nəzərdə tutan sərəncam imzalayıb. Sərəncamla mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədilə Azərbaycan Respublikası Prezidentinin Ehtiyat Fondundan Kütləvi İnformasiya Vasitələrinin İnkişafına Dövlət Dəstəyi Fonduna 5 milyon manat vəsait ayrılıb.

Ötən həftə qəzetimizə müsahibəsində fondun icraçı direktoru Vüqar Səfərli bildirmişdi ki, bu həftədən etibarən evin tikiləcəyi yerlə bağlı dəqiqləşdirmələr aparılacaq, təklif olunan məkanlara baxış keçiriləcək.
Dünən “Yeni Müsavat”a açıqlamasında V.Səfərli bildirdi ki, hələlik iş danışıq səviyyəsindədir. Onun sözlərinə görə, evin tikiləcəyi yerlə bağlı danışıqlar aparılır: “Öncə bizə müəyyən yerlər təklif olunmalıdır ki, biz də ora baxış keçirə bilək. Hər halda, prezident səviyyəsində verilmiş sərəncamdır. Bina ilə bağlı yerin tapılması da Prezident Administrasiyası, Bakı Şəhər İcra Hakimiyyəti səviyyəsində həll ediləcək”.
Müsahibimiz dedi ki, bütün hallarda bina üçün ən yaxşı yerin ayrılmasına çalışacaqlar: “Ona görə də tələsməyə ehtiyac görmürük. Gələn təklifləri dəqiqliklə qiymətləndirəcəyik. Son qərar isə ümumi məsləhətləşmələrdən sonra veriləcək”.
V.Səfərli xatırlatdı ki, ayrılan vəsaitin bölünməsi, jurnalistlərin bu pulla özlərinə ev alması kimi hal olmayacaq: “Böyük ehtimalla, daha öncə də danışdığımız kimi, mətbuat şəhərciyi qurulacaq. İlk olaraq bir-iki bina tikiləcək. Sonradan güman ki, onların sayı da artacaq. İstəyirik ki, bu binalar kompakt bir yerdə olsun. Jurnalistlərin bir yerdə yaşaması yaxşı hal ola bilər”.
Müsahibimizin sözlərinə görə, ilkin olaraq bu pula neçə kvadratmetr ev tikiləcəyi müəyyənləşdiriləcək. Daha sonra isə sifariş əsasında layihə nümunələri alınacaq. Fond son olaraq podratçı şirkətlə danışandan sonra bütün detallar dəqiqləşəcək. Sonuncular onlara layihə nümunələri təqdim edəcəklər.

Xəbər xidməti

509 dəfə baxılıb